ފީފާ ވޯލްޑް ކަޕް 2026 ގެ ސެމީ ފައިނަލްގެ ފޯރިގަދަ މެޗުގައި 2-1 ގެ ނަތީޖާއަކުން އިންގްލެންޑް ބަލިކޮށް، ޖެހިޖެހިގެން ދެވަނަ ފަހަރަށް މުބާރާތުގެ ފައިނަލަށް އާޖެންޓީނާ ދަތުރުކޮށްފިއެވެ. ފައިނަލްގައި އާޖެންޓީނާ ބައްދަލުކުރާނީ ސްޕެއިނާއެވެ.

ކެޕްޓަން ލިއޮނެލް މެސީގެ މޮޅު ކުޅުމާއެކު، ދުނިޔޭގެ ޗެމްޕިއަން އާޖެންޓީނާއިން ފަހަތުން އަރައި މެޗު ކާމިޔާބުކުރީ އިތުރު ވަގުތުގެ ދެވަނަ މިނެޓުގައި ލައުޓާރޯ މާޓިނޭޒް ކާމިޔާބުކޮށްދިން ލަނޑުންނެވެ.

އެމެރިކާގެ އެޓްލާންޓާ ސްޓޭޑިއަމްގައި މިރޭ، 68،239 ސަޕޯޓަރުންގެ ކުރިމަތީގައި ކުޅުނު މި މެޗުގެ ފުރަތަމަ ހާފަށްފަހު، 55 ވަނަ މިނެޓުގައި އެންތަނީ ގޯޑަން ޖެހި ލަނޑާއެކު އިންގްލެންޑް އޮތީ 1966 ވަނަ އަހަރަށްފަހު ފުރަތަމަ ފަހަރަށް ފައިނަލަށް ދިއުމުގެ މަގުމަތީގައެވެ. އެކަމަކު މި ދެ ޤައުމުގެ މެދުގައި އޮންނަ ޒަމާންވީ ވާދަވެރިކަމުގެ ތެރެއިން އާޖެންޓީނާއިން ވަނީ މެޗުގެ ފަހު ވަގުތު ދެ ލަނޑު ޖަހައި އިންގްލެންޑުގެ އުއްމީދުތައް ފުނޑުފުނޑުކޮށްލާފައެވެ.

މެޗުގެ 85 ވަނަ މިނެޓުގައި މެސީ ތަނަވަސްކޮށްދިން ފުރުސަތަކުން އެންޒޯ ފެނާންޑޭޒް ނަތީޖާ އެއްވަރުކުރިއިރު، އިތުރު ވަގުތުގެ ދެވަނަ މިނެޓުގައި މެސީ ނަގައިދިން ހުރަހަކުން ބޮލުން ގޯލުގެ ތެރެއަށް ބޯޅަ ފޮނުވާލައިގެން މެޗު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މާޓިނޭޒެވެ.

މި މެޗުން ހޯދި މޮޅާއެކު އާޖެންޓީނާއަށް ވަނީ ޖެހިޖެހިގެން ދެ ފަހަރު ވޯލްޑް ކަޕް ކާމިޔާބުކުރާ ފުރަތަމަ ޓީމަށްވުމުގެ ފުރުސަތު ބޮޑުވެފައެވެ. 1962 ވަނަ އަހަރު ބްރެޒިލްއަށްފަހު އެއްވެސް ޓީމަކަށް ތަށި ދިފާއުކުރެވިފައެއް ނުވެއެވެ. އަދި މެސީ ވެގެންދާނީ ބްރެޒިލްގެ ކަފޫއަށްފަހު ތިން ވޯލްޑް ކަޕެއްގެ ފައިނަލްގައި ކުޅޭ ދެވަނަ ކުޅުންތެރިޔާއަށެވެ.

މުބާރާތުގެ ފައިނަލް މެޗު އަންނަ އާދީއްތަ ދުވަހުގެރޭ ނިއު ޔޯކް ނިއު ޖާޒީ ސްޓޭޑިއަމްގައި ކުޅޭއިރު، މިއީ ދެކުނު އެމެރިކާގެ ޗެމްޕިއަނުންނާއި ޔޫރަޕުގެ ޗެމްޕިއަނުންގެ ކުރިމަތިލުމެކެވެ. އުމުރުން 39 އަހަރުގައި މެސީ އިންގްލެންޑާ ދެކޮޅަށް ފުރަތަމަ ފަހަރަށް ކުޅުނުއިރު، ފައިނަލްގައި އޭނާ ފުރަތަމަ ފަހަރަށް ވާދަވެރި މެޗެއްގައި ސްޕެއިނާ ދެކޮޅަށް ނުކުންނާނެއެވެ. 2022 ވަނަ އަހަރު ގަތަރުގައި އާޖެންޓީނާއަށް ތަށި ހޯދައިދިނުމަށްފަހު މެސީގެ ކެރިއަރު ފުރިހަމަވެފައިވާ ކަމަށް ބެލެވުނު ނަމަވެސް، އޭނާ އަދިވެސް ހުރީ ވަރުގަދަ ފޯމެއްގައެވެ.

އަނެއްކޮޅުން އިންގްލެންޑަށް މިވަނީ ބޮޑު މާޔޫސްކަމަކާ ކުރިމަތިލާން ޖެހިފައެވެ. އެ ޓީމު ދެން ނުކުންނާނީ ހޮނިހިރު ދުވަހުގެރޭ މަޔާމީގައި ފްރާންސާ ދެކޮޅަށް، ތިންވަނަ ހޮވާ މެޗަށެވެ. 60 އަހަރުގެ ތެރޭގައި ފުރަތަމަ ފަހަރަށް ފައިނަލަށް ދިޔުމާ ގާތަށް ޖެހިލުމަށްފަހު، ފަހު ވަގުތު މެޗު އަތުން ދޫވުމަކީ ކޯޗު ތޯމަސް ޓުޗެލްގެ ޓީމަށް ލިބުނު ބޮޑު ހިތާމައެކެވެ. ޚާއްސަކޮށް އެ ޓީމުގެ މުހިންމު ކުޅުންތެރިން ކަމަށްވާ ޖޫޑް ބެލިންހަމް އަދި ކެޕްޓަން ހެރީ ކޭންގެ ފަރާތުން މި މެޗުގައި އެދެވޭ ކުޅުމެއް ފެނިފައެއް ނުވެއެވެ.

މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ގިނަ ފައުލްތަކެއް ފެނުނެވެ. ނަމަވެސް ދެވަނަ ހާފުގެ 55 ވަނަ މިނެޓުގައި މޯގަން ރޮޖާސް ނަގައިދިން ހުރަހަކުން ގޯޑަން ވަނީ އިންގްލެންޑަށް ކުރިހޯދައިދީފައެވެ. އާޖެންޓީނާއިން މެޗުގެ ފަހުބައިގައި ކުޅުން ވަރުގަދަކޮށް، ގިނަ ހަމަލާތަކެއް އުފެއްދިއެވެ. މީގެ ތެރެއިން އެލެކްސިސް މެކް އެލިސްޓާ ފޮނުވާލި ހަމަލާއެއް ގޯލުގެ ދަނޑިއަށްވެސް އަމާޒުވިއެވެ.

މެޗުގެ ފަހު ކޮޅު މެސީގެ މޮޅު ޕާސްތަކަކުން ފެނާންޑޭޒް އާއި މާޓިނޭޒް ޖެހި ލަނޑުތަކާއެކު އާޖެންޓީނާ ވަނީ ފައިނަލުގެ ޖާގައެއް ކަށަވަރުކޮށް، އިންގްލެންޑުގެ އުއްމީދުތައް ނިމުމަކަށް ގެނެސްފައެވެ.