ކޮންމެ އަހަރެއްގެ ފިނި މޫސުމުގެ ފުރަތަމަ ކޮޅިގަނޑަށް ފަހު އޮސްޓްރޭލިޔާގެ ޖަޒީރާ ރަށެއް ކަމަށްވާ ކްރިސްމަސް އައިލެންޑަށް ދުނިޔޭގެ އެކި ކަންކޮޅުތަކުން އެތައް ހާސް ފަތުރުވެރިން ޖަމާވެއެވެ. އޮސްޓްރޭލިޔާގެ ޕާރތުއާ 2600 ކިލޯމީޓަރު ދުރުގައި އޮންނަ މިރަށަކީ ހިތްގައިމު ދޮންވެލި ތުނޑިތަކާ، ބަލާފޫހި ނުވާނެ ޖަންގަލިތަކާ، ކަނޑުއަޑީގެ ޤުދުރަތީ މުއްސަނދިކަން ވެސް ލިބިފައިވާ ރަށެކެވެ.

ނަމަވެސް ފަތުރިވެރިންގެ މެދުގައި މިރަށް އެންމެ ބޮޑަށް މަޤުބޫލުވެފައި ވަނީ، އަހަރަކު އެއްފަހަރު މިރަށުގެ ޖަންގަލީގައި އުޅޭ އެތައް މިލިޔަން ރަތް ކަކުނި އަތިރިމައްޗަށް ކުރާ ދަތުރު ބަލާލެވޭތީއެވެ. މި އާދަޔާޚިލާފު ދަތުރު ފެށެނީ ކޮންމެ އަހަރެއްގެ ފިނިމޫސުމުގައި ވެސް، ފުރަތަމަ ފަހަރަށް ވާރޭ ވެހުމުންނެވެ. މި ދުވަސްވަރު އާއްމުކޮށް ދިމާވަނީ އަހަރުގެ ފަހު ދެމަހުން ކުރެ މަހަކާއެވެ.

ސަތޭކަ މިލަޔަނަށްވުރެ ގިނަ ކަކުނި ބައިވެރިވި މި އަހަރުގެ ދަތުރު ފެށިފައިވަނީ ނޮވެމްބަރު މަހުއެވެ. މިރަށުގެ ހުރިހާ ރަތް ކަކުންޏެއް ބައިވެރިވާ މި ޝައުގުކުރުނިވި ދަތުރަކީ، ރަތް ކަކުނީގެ ދަރިފަސްކޮޅު އާލާކުރުމަށް ކޮންމެ އަހަރަކު މި ކަކުނިތައްވާ ވަރަށް ބޮޑު ޤުރުބާނީއެކެވެ. އަންހެން ކަކުނިތަކަށްވުރެ ކުރިން، ފިރިހެން ކަކުނިތައް އަތިރިމައްޗަށް ފައިބައި "މޭޓް" ކުރުމަށްޓަކައި ފަސް މަޑުތަނަކުން ވަޅެއް ކޮނެއެވެ. އިސާހިތަކު މުޅި ސަރަހައްދުގައި އަންހެން ކަަކުނިތައް ފެތުރިލައެވެ. މޭޓް ކުރުމަށްފަހު ފިރިހެން ކަކުނިތައް އެއްގަމާ ދިމާލައް ދަތުރު ފަށައެެވެ. އަންހެން ކަކުނިތަކުގެ ހަށިގަނޑުގައި ބިސް އަށަގަންނަން ފަަށަނީ މޭޓް ކުރާތާ ތިން ދުވަސް ތެރޭގައެވެ. އަދި ބިސްއަޅަން ތައްޔާރުވަންދެން ވެސް، އެ ކަކުނިތައް މަޑުކުރަނީ ހަރުގައެވެ.

ގާތްގަނޑަކަށް 14 ދުވަސް ފަހުން، ދިޔަވަރު އެންމެ ބޮޑުވެ، ހިކިދިޔައަށް ލޮނުގަނޑު ދަމައިގަންނަ ވަގުތު، ކަކުނިތައް މޫދަށް ބިސްއަޅައެވެ. އާންމު ގޮތެއްގައި ކޮންމެ ކަކުންޏެއް ލައްކައެއްހާ ބިސް އަޅައެވެ. ބިސްއެޅުމާ އެކުއެކީގައިހެން ބިސްތައް ވަގުތުން "ލާވާ" އަށް ބަދަލުވެއެވެ. އަދި އުފެދުމުގެ އެކިއެކި މަރުހަލާތައް ކަޑައްތު ކުރުމަށްފަހު މަސް ދުވަސް ތެރޭގައި ފަސް ވަރަކަށް މިލިމީޓަރުގެ ކުޑަ ކަކުންޏަކަށް ބަދަލުވެއެވެ. އޭގެފަހުން ކުދި ކަކުނިތައް އެއްގަމާ ދިމާލަށް ދަތުރު ފަށައެވެ.

މޫދުގައި އުޅޭ ބޮޑެތި މަސްތަކުގެ ކިބައިން ސަލާމަތް ވެގެން އެއްގަމަށް އެރެނީ ވަރަށް މަދު ކަކުންޏަކަށެވެ. މި ކުދި ކަކުނިތައް ހަޔާތުގެ ފުރަތަމަ ތިން އަހަރު ހޭދަކުރަނީ މާބޮޑަށް ނުނިކުމެ އެކިއެކި ތަންތަނުގައި ފިލައިގެންނެވެ. ނަމަވެސް މި ކަކުނިތަކުގެ އުމުރުން ހަތަރު އަހަރު ވުމުން، އެހެން ކަކުނިތަކެކޭ އެއްގޮތަށް އަހަރީ ހިޖުރައިގައި ބައިވެރިވެއެވެ.

ކޮންމެ އަހަރަކު ވެސް ކަކުނިތަކުގެ މި ދަތުރަށް، މިރަށުގެ ރައްޔިތުން ވަރަށް ބޮޑަށް ތައްޔާރުވެެއެވެ. އެގޮތުން ކަކުނިތަކަށް ފަސޭހައިން މަގު ހުރަސް ކުރުމުގެ އިންތިޒާމުތައް ހަަމަޖައްސައިދީ، ކަކުނިތަކުގެ ރައްކާތެރިކަމަށްޓަކައި ދުއްވާ އެއްޗިހި ނުދުއްވޭގޮތަށް މަގުތައް ބަންދުކޮށްދެއެވެ. އަދި ކަކުނިތަކުގެ ހިޖުރަ ބަލާލަން އެރަށަށް ޒިޔާރަތްކުރާ ފަތުރުވެރިނަށް އެ މަންޒަރު އެންމެ ފުރިހަމަޔަށް ބަލާލުމުގެ އިންތިޒާމުތައް ހަމަޖައްސައިދިނުމަކީ ވެސް އެރަށު މީހުން ވަރަށް ފޯރިއާއެކު ކުރާކަމެކެވެ.