ދަތުރުފަތުރު ކުރާއިރު، އަޅުގަނޑުމެން އެންމެންވެސް ބޭނުންވަނީ އެސްފިޔައެއް ޖަހާލާހާ އަވަހަށް މަންޒިލަށް ވާޞިލުވުމަށެެވެ. ދުނިޔޭގެ އެންމެ ކުރު މަތިންދާބޯޓު ދަތުރުގައި، މިކަން ޙަޤީޤަތަކަށް ވެދާނެެއެވެ.

ދުނިޔޭގެ އެންމެ ދިގު ފްލައިޓްގައި، ނިއުޔޯކާއި ސިންގަޕޫރާ ދެމެދު 19 ގަޑިއިރުގެ ދިގު ދަތުރެއް ކުރަންޖެހޭއިރު، ދުނިޔޭގެ އެންމެ ކުރު ފްލައިޓް ދަތުރުގައި ނަގަނީ ދެ މިނެޓަށްވުރެ ކުޑަ ވަގުތުކޮޅެކެވެ.

ގާތްގަނޑަކަށް 90 ސިކުންތު ހޭދަވާ މި ދަތުރުގައި ގުޅުވައިދެނީ، ސްކޮޓްލެންޑްގެ އޯކްނީ ޖަޒީރާތަކުގެ ތެރެއިން ވެސްޓްރޭ އާއި ޕާޕާ ވެސްޓްރޭއެވެ. މި ފްލައިޓްގައި ކަވަރުކުރަނީ އެންމެ 1.7 މޭލެވެ. މިއީ ގާތްގަނޑަކަށް އެޑިންބަރާ އެއަރޕޯޓުގެ ރަންވޭގެ ދިގުމިނާ އެއްވަރުގެ ދުރުމިނެކެވެ. އަދި ގިނަ މަތިންދާބޯޓުތައް އާންމުކޮށް ދަތުރުކުރާ އުސްމިނަށް އަރުމަށް ވެސް 15 ވަރަކަށް މިނިޓު ނަގާއިރު، މިޔަށް ވުރެ މާކުޑަ ވަގުތުކޮޅެއްގެ ތެރޭގައި ދުނިޔޭގެ އެންމެ ކުރު ކޮމާޝަލް ފްލައިޓް އޭގެ ދަތުރު ނިންމާލައެވެ.

ނަވާރަ ސަތޭކަ ފަސްދޮޅަށް ހަތް ވަނަ އަހަރު އެ ސަރަހައްދުގެ އެއަރލައިނެއް ކަމަށްވާ ލޯގަންއެއަރ އިން މި ދެރަށުގެ ދެމެދުގައި ކޮމާޝަލް  ފްލައިޓް ދަތުރުތައް ފެށިއެވެ. ހޮނިހިރު ދުވަސް ފިޔަވައި ހަފްތާގެ ކޮންމެ ދުވަހަކު މި ދަތުރު ކުރެއެވެ. މިހާތަނަށް ވެސްޓްރޭ އާއި ޕާޕާ ވެސްޓްރޭ އާ ދެމެދު ރެކޯޑު ކުރެވިފައިވާ އެންމެ އަވަސް ފްލައިޓްގެ ވަގުތަކީ އެންމެ 53 ސިކުންތެވެ. މިދޭތެރޭގައި އެންމެ ގިނަ ދަތުރު ކޮށްފައިވާ ޕައިލެޓްގެ ރެކޯޑް ހާސިލް ކޮށްފައިވަނީ ލޯގަންއެއަރގެ ޕައިލެޓެއް ކަމަށްވާ ސޮޓުއަރޓް ލިންކްލޭޓަރ އެވެ. އޭނާ ވަނީ 2013 ގައި ރިޓަޔަރ ކުރުމުގެ ކުރިން މި ދޭތެރޭގައި 12،000 ފަހަރަށްވުރެ ގިނައިން ދަތުރުކޮށްފައެވެ.   

މި މަގަކީ މި ޖަޒީރާ ރަށްތަކަށް ދެވޭ ދަތުރުފަތުރުގެ ޚިދުމަތުގެ ވަރަށް މުހިންމު ބައެކެވެ. މި ޚިދުމަތުން ގުޅުވައިދެނީ އޯކްނީގެ އުތުރުގެ ޖަޒީރާތަކާއި ކަރކްވޯލެވެ. ކަރކްވޯލްއަކީ އެ ޖަޒީރާތަކުގެ އެންމެ ބޮޑު ރަށުގެ އިތުރުން ދަތުރުފަތުރުގެ މައި މަރުކަޒެވެ. މި ޚިދުމަތް ރޭވިފައި އޮންނަގޮތުން ކަރކްވޯލްއަށް ދެވެނީ ވެސްޓްރޭ އާއި ޕާޕާވެސްޓްރޭއާ ދޭތެރޭ ކުރެވޭ  90 ސިކުންތުގެ ފްލައިޓް ދަތުރަކަށް ފަހު އެވެ.

"ބްރިޓެން-ނޯމަން BN2B-26" މަރުކާގެ 10 ވަރަކަށް މީހުންގެ ޖާގައިގެ ފްލައިޓެއްގައި ލޯގަންއެއަރއިން އެތައް އަހަރުތަކެއް ކުރިން ފެށިގެން ކުރާ މި ދަތުރުތަކަކީ، މި ސަރަހައްދުގެ ތަރައްގީއާ ވަރަށްބޮޑަށް ގުޅިފައިވާ ދަތުރުތަކެކެވެ. ގަވާއިދުން މި ފްލައިޓްްގެ ޚިދުމަތް ހޯދާ ފަރާތްތަކުގެ ތެރޭގައި އެ ސަރަހައްދުގެ ފުލުހުން، ޑޮކްޓަރުން، ޓީޗަރުންނާ އަދި ދަރިވަރުން ހިމެނެއެވެ.

މީގެ އިތުރުން މި ޚާއްޞަ ދަތުރުގެ ސަބަބުން މިރަށްތައް ވެފައިވަނީ ފަތުރުވެރިންގެ މެދުގައި ވެސް މަޤްބޫލު މަންޒިލަކަށެވެ. މި ކުރު ދަތުރުގެ ތަޖުރިބާ ކުރުމަށް ދުނިޔޭގެ އެކި ކަންކޮޅުތަކުން ފަތުރުވެރިން މިރަށްތަކަށް ޒިޔާރަތްކުރެއެވެ.

ޕާޕާ ވެސްޓްރޭ އަކީ ގުދުރަތީ ގޮތުން ރީތި ފަރުތަކާ، ހުދު ދޮންވެލި ތުނޑިތަކެއް ލިބިފައިވާ ރަށެކެވެ. އަދި މިރަށަކީ ގަދީމީ ޒަމާނުގެ ނިޝާންތަައްް ފެންނަންހުރި އެތަކެއް އާސާރީ ތަރިކަތަކުން ވެސް ފުރިފައިވާ ރަށެކެވެ. ބުނެވޭ ގޮތުގައި ވައިކިންގްސް ޒަމާނުގެ އާސާރު ވެސް މިރަށުން ފެންނަން ހުރެއެވެ. ޓްރިޕްއެޑްވައިޒަރގައި ރިވިއު ދީފައިވާ ފަރާތްތަކުން މި ތަނަކީ "އަންތަރީސްވާފަދަ" އަދި "ޖާދޫވެރި" ތަނެއްކަމުގައި ބުނެފައިވެއެވެ.

ފަތުރުވެރިންގެ މެދުގައި މަގުބޫލުކަން އިތުރުވެފައިވާ މި ދަތުރުގެ އަގަކީ ކޮޅަކަށް 17 ޕައުންޑެވެ. އެއީ ގާތްގަނޑަކަށް 340 ދިވެހި ރުފިޔާއެވެ. މިދޭތެރޭގައި ހަފްތާއަކު ދެ ފަހަރު ދަތުރުކުރާ ފެރީއެއް ވެސް އޮވެއެވެ. ފްލައިޓް ދަތުރާ ޚިލާފަށް ފެރީގައި އެއް ގަޑީރާއި 45 މިނިޓް ހޭދަވެއެވެ.