މި ރަމަޟާން މަހު ވެސް ސަލަފުން ގިނަ ހަރަކާތްތަކެއް ކުރިއަށް ގެންދާ ކަމަށާ އެ ހަރަކާތްތަކުގައި ބައިވެރިވުމުގެ ފުރުސަތު އާންމުންނަށް އޮންނާނެ ކަމަށް އެ ޖަމިއްޔާއިން ބުނެފި އެވެ.

ސަލަފުން ހިންގާ ހަރަކާތްތަކުގެ ތެރެއިން މި އަހަރުވެސް ރަމަޟާން މަހަށް މަރުހަބާ ކިޔުމުގެ ގޮތުން ހަދިޔާ ދިނުމުގެ ބޮޑު އިވެންޓެއް ވަނީ ބާއްވާފަ އެވެ. 101 އިނާމު ހިމެނޭ މި އިވެންޓުގައި އަގުހުރި ތަފާތު އިނާމުތައް އިވެންޓަށް ޙާޟިރުވެގެންނާއި އޮންލައިނުކޮށް ބައިވެރިވެގެން ގުރުވަތުން ދީފައިވެ އެވެ. މި އަހަރު ރޯދަ ހަދިޔާ އިވެންޓު ބާއްވާފައިވަނީ ފެބްއަރީ 13 ވަނަ ދުވަހު ހުޅުމާލެ ސެންޓަރަލް ޕާކުގަ އެވެ. 4000 އަށް ވުރެ ގިނަ މީހުން ބައިވެރިވި އިވެންޓުގައި އެއްވަނަ ހަދިޔާއަކަށް މިފަހަރު ސަލަފުން ދިނީ ޙައްޖު ދަތުރެކެވެ. އޭގެ އިތުރުން ސައިކަލަކާއި ޢުމުރާ ދަތުރަކާއި އަދިވެސް އަގުހުރި ބޮޑު ނުވަ ހަދިޔާދިނެވެ.

އަދި އޮންލައިނުކޮށް ބައިވެރިވި 15 ހާސް މީހުންނަށް ވެސް ބައިވެރި ވެވޭގޮތަށް 90 ހަދިޔާވަނީ ބަހާލާފައެވެ. ޚާއްޞަ ފޯރަމަކާ އެކު ކުރިއަށް ދިޔަ އެ ހަރަކާތުގައި ބައިވެރި ބޭފުޅުން ދީނީ ގޮތުން އޮޅުން ފިލުވަން ބޭނުންވާ ސުވާލުތަކަށް ޢިލްމުވެރިންގެ ޕެނަލަކުން ޖަވާބު ދިނުންވެސް ކުރިއަށް ގެންދިޔަ އެވެ.

މީގެ އިތުރުން ވެސް ގިނަ ހަރަކާތްތަކެއް ދަނީ ކުރިއަށް ގެންދަމުންނެވެ.

މިއީ ކޮންމެ ރޯދަމަހަކުވެސް ނިކަމެތި ޢާއިލާތަކަށް ރޯދަމަހަށް ބޭނުންވާ އަސާސީ ކާބޯތަކެތި ފޯރުކޮށްދިނުމަށް ސަލަފު އެއިޑުން ކުރިއަށް ގެންދާ ޚާއްޞަ ޕޮރޮގްރާމެކެވެ. މި ޕޮރޮގްރާމުގެ ދަށުން ކޮންމެ ޢާއިލާއަކަށްވެސް ވައުޗާ ދޫކުރެއެވެ. އެ ވައުޗާތައް ބޭނުންކޮށްގެ ރެޑްވޭވުގެ 3 ފިހާރައަކުން ގެއަށް ބޭނުންވާ ތަކެތި ގަނެވޭނެއެެވެ. މިއަހަރުވެސް ވާބިލު މި ޕޮރޮގްރާމުގެ ދަށުން މިހާތަނަށް 61 ޢާއިލާއަކަށް ވަނީ ވައުޗާ ދޫކޮށްފަ އެވެ.

މިއީ ހަސްފަތާލުތަކުގައި ޑިއުޓީގައި ތިއްބަވާ ނަރުހުންނާއި ޑޮކްޓަރުން އަދި ބަލިމީހުންގެ އެހީތެރިންނަށް ރޯދަވީލުމަށް ދޭ ހަދިޔާ ޕެކެވެ. މި ޕޮރޮގްރާމުގެ ދަށުން ރަމަޟާން މަހުގެ ކޮންމެ ދުވަހަކު ސަރުކާރުގެ މައި ހަސްފަތާލު އައިޖީއެމްއެޗާއި ހުޅުމާލެ ހޮސްޕިޓަލުގައި ރޯދަވީލުމަށް ޚާއްޞަ މި ޕެކް ބެހުން އޮވެ އެވެ. މި ރަމަޟާން މަހުގެ ފުރަތަމަ ދިހަ ދުވަސް ފާއިތުވެގެން ދިޔައިރު އައިޖީއެމްއެޗް ގައި 3650 ހަދިޔާ ޕެކް އަދި ހުޅުމާލެ ހޮސްޕޮޓަލުގައި 2100 ހަދިޔާ ޕެކް ވަނީ ބަހާފައިވެ އެވެ. އަދި މި އަހަރު ހަދާޔާ ޕެކް ރ.އުނގޫފާރު ރީޖަނަލް ހޮސްޕިޓަލުގައިވެސް ވަނީ ބަހަން ފަށާފަ އެވެ.

ކޮންމެ ރަމަޟާން މަހަކުވެސް ސަލަފުގެ ފަރާތުން ހުޅުމާލެ ފޭސް 2 ގެ މަސްޖިދު އަބޫބަކުރު އައްޞިއްދީޤާއި މާލޭގެ އިސްލާމީ މަރުކަޒުގައި ރޯދަވީއްލުމަށް ސުފުރާއަޅަ އެވެ. އެވުރެޖުކޮށް ހުޅުމާލެ މިސްކިތުގައި ދުވާލަކަށް 50 ވުރެ ގިނަ މީީހުންނަށް ރޯދަވީލުމުގެ ޚިދުމަތް ފޯރުކޮށްދޭއިރު އިސްލާމީ މަރުކަޒުގައި އެވުރެޖްކޮން ދުވާލަކު 400 މީހުންނަށް ރޯދަވީލުމުގެ ޚިދުމަތް ފޯރުކޮށްދެ އެވެ.

ރަމަޟާން މަހު ކޮންމެ ދުވަހަކު މާލޭގެ ފުރުޤާން މިސްކިތުގައި ޢަޞްރު ނަމާދު ފަހުން ސިލްސިލާކޮށް ދަރުސް ބާއްވަ އެވެ. 30 މިނެޓަށް ކޮންމެ ދުވަހަ ކުުރިއަށްދާ މި ސިލްސިލާ މިއަހަރު ކުރިއަށް ގެންދަނީ " ދުޢާ" މި ނަމުގަ އެވެ. މި ގޮތަށް ރަމަޟާން މަހު އަޞްރު ފަހުން ފުރުޤާން މިސްކިތުގައި ދަރުސް ސިލްސިލާ ކުރިއަށް ގެންދާތާ 11 އަހަރުވެއްޖެ އެވެ. އަދި މިއަހަރު ހުޅުމާލެ މަސްޖިދު ރަޝީދުގައި ކޮންމެ ދެދުވަހުން އެއްދުވަހުވެސް ސަލަފުގެ ޢިލްމުވެރިންގެ ދަރުސްތައް ކުރިއަށް ގެންދެ އެވެ.

މިއީ އަހަރުގެ ކޮންމެ ހަފްތާ ބަންދެއްގައި ރާއްޖޭގެ އެކި ރަށްރަށުގައި ކުރިއަށް ގެންދާ ހޭލުންތެރިކަމުގެ ޕޮރޮގްރާމެކެވެ. ރަމަޟާންމަހު ހަފްތާގެ ތެރޭގެ ބައެއް ދުވަސްތަކާއި ހަފްތާ ބަންދުގައި މި ޕޮރުގްރާމު ކުރިއަށް ގެންދެ އެވެ. މި އަހަރުގެ ރަމަޟާން މަހުގެ ފުރަތަމަ ދިހައެއް ނިމުނު އިރު ސަލަފުގެ ފަރާތުން ޖުމުލަ 17 ރަށެއްގައި ވަނީ ހޭލުންތެރިކަމުގެ ޕުރޮގްރާމު ގެންގޮސްފަ އެވެ. އެއީ އއ.ތޮއްޑޫ، މ.މުލީ، މަޑުއްވަރީ،ވޭވަށް، ދިއްގަރު، ކ.ގުރައިދޫ، ދ.ކުޑަހުވަދޫ، ޅ.ހިންނަވަރު، ބ.ދަރަވަންދޫ، ހއ.ހޯރަފުށި، އުތީމު، ވަށަފަރު، ކެލާ، ހދ.ނޭކުރެއްދޫ، ގއ.ވިލިގިލި، ދެއްވަދޫ އަދި އއ.މާމިއިގިއްޔެވެ. މިތަނުން މާމިއިގިއްޔާއި ދިއްގަރުގައި ސަލަފު ފޯރަމުގެ ދެ ފޯރަމް ވަނީ ގެންގޮސްފަ އެވެ.

މި އަހަރުވެސް ސަލަފުގެ ފޭސްބުކު ޕޭޖް މެދުވެރިކޮށް ސަލަފު ރޯދަ ސުވާލު މުބާރާތް ކުރިއަށް ގެންދެ އެވެ. މި އަހަރު ކޮންމެ ދުވަހުކުވެސް ރަނގަލު ޖަވާބު ދެއްވާ ފަރާތްތަކުގެ މެދުގައި ގުރުއަތު ނަގައިގެން ދިމާވާ ފަރާތަކަށް ކޮންމެ ދުވަހަކުވެސް 150 ރުފިޔާގެ ފައިސާގެ އިނާމު ލިބޭނެ އެވެ. އަދި އިނގެރޭސި ބަހުން ޑޯން އެންޑް ޑަސްކް ގެ ނަމުގައި މަދަރުސާ ކުދިންނަށް ޚާއްޞަކޮށްގެ ކުއިޒެއް ކުރިއަށް ގެންދެ އެވެ. މި ކުއިޒުގައި ރަނގަޅު ޖަވާބު ދިމާކުރާ ކުދިންގެ މެދުގައި ގުރުވަތު ލައިގެން ދިމާވާ ކުއްޖަކަށް ޑަންކް އެންޑް ޑިޕްގެ ފަރާތުން ކޮންމެ ދުވަހަކު ޕިއްޒާއެއް ދެ އެވެ.

މި އަހަރުގެ ރަމަޟާން މަހު ރާއްޖޭގައި މަސައްކަތް ކުރާ ބަގުލަދޭޝް ރައްޔިތުންނަށް ޚާއްޞަ ކޮށްގެން ބަންގާޅު ބަހުން އެޤައުމުގެ ޢިލްމުވެރި އެއް ރާއްޖެ ގެނެސް ކޮންމެ ދުވަހަކު ޢަޞްރު ނަމާދު ފަހުން ވިޔަފާރިވެރިންގެ މިސްކިތުގައި ދަރުސްތައް ކުރިއަށްދެ އެވެ. އަދި ސަލްމާން މިސްކިތު ގޯތިތެރޭގައި ރޯދަވީއްލަން ދާ މީހުންނަށް ދަރުސް ކުރިޔަށް ގެންދެ އެވެ.

މިދިޔަ އަހަރު ވެސް ސަލަފުން ވަނީ މި ޕްރޮގާމްތައް ހިންގާފަ އެވެ.