ENGLISH
03 އޭޕްރީލު 2025
24.12.24 : ރީތި ތާރީޚުގައި މާލޭގައި 52 ކައިވެނި
24 ޑިސެމްބަރު 2024
|
ފެމިލީ ކޯޓް
އެންމެ މަޤްބޫލު
މިއަދުގެ ރީތި ތާރީޚުގައި މާލޭގައި 52 ކައިވެނި ކޮށްދޭނެ ކަމަށް ފެމެލީ ކޯޓުން ބުނެފި އެވެ.
ފެމިލީ ކޯޓުން އާންމުކުރި ތަފާސް ހިސާބުތަކުން ދައްކާ ގޮތުން މިއަދު 16 ކައިވެންޏެއް ކޮށްދިނީ ރަސްމީ ގަޑީގަ އެވެ. އަދި 36 ކައިވެނި ކޮށްދިނުމަށް ހަމަޖެހިފައި ވަނީ ނުރަސްމީ ގަޑީގަ އެވެ.
ކައިވެންޏަށް ތައްޔާރުވާއިރު ރީތި ތާރީޚުތަކަށް ގިނަ ބަޔަކު އިސްކަންދެ އެވެ. އެގޮތުން މި އަހަރު ދެން އެންމެ ގިނަ މީހުން ކައިވެނި ކޮށްފައިވަނީ އޭޕްރީލް މަހުގެ 24 ގަ އެވެ. އެއީ 24.4.24 ގަ އެވެ. އެ ދުވަހު 38 ކައިވެނި ކޮށްދީފައިވެ އެވެ.
މި އަހަރުގެ ޖަނަވަރީ މަހުން ފެށިގެން ނޮވެމްބަރު މަހުގެ ނިޔަލަށް ފެމިލީ ކޯޓުން 2،128 ކައިވެންޏާއި 1،249 ވަރި ކޮށްދީފައިވެ އެވެ.
ފެމިލީ ކޯޓުގެ ތަފާސް ހިސާބުތަކުން އެނގޭ ގޮތުގައި މިދިޔަ 2023 ވަނަ އަހަރު ފެމިލީ ކޯޓުން 2،425 ކައިވެންޏާއި 1،281 ވަރި ކޮށްދީފައިވެ އެވެ.
އެ އަހަރު އެންމެ ރީތި ތާރީޚު ކަމަށް ގިނަ ބަޔަކު ގަބޫލްކުރި މާޗް 23 (23.3.23) ރަމަޟާން މަހުގެ ފުރަތަމަ ދުވަހަށް ވުމުން އެ ދުވަހު ކައިވެނީގެ އަދަދު މަދެވެ. އެ ދުވަހު 12 ކައިވެނި ކޮށްދިން ނަމަވެސް ދެން އެންމެ ރީތި ތާރީޚު ކަމަށް ބެލެވުނު ޖޫން 23 (23.6.23) ގައި އެ ކޯޓުން 43 ކައިވެނިކޮށްދީފައިވެ އެވެ.
ދެހާސް ބާވީސް ވަނަ އަހަރު އެންމެ ގިނަ ބަޔަކު ކައިވެނި ކޮށްފައިވަނީ ފެބްރުއަރީ 22 (22.2.22) ގަ އެވެ. އެ ދުވަހު 58 ކައިވެނި ކޮށްފައިވާއިރު އެ އަހަރުގެ ޑިސެންބަރު 22 (22.12.22) ގައި 58 ކައިވެނި އެ ކޯޓުން ކޮށްދީފައިވެ އެވެ.
އެ އަހަރު 2،514 ކައިވެނި ކޮށްދީފައިވާ އިރު ވަރީގެ އަދަދަކީ 1،346 އެވެ.