ޖަޕާނުގެ ސެޓޯ އިންލޭންޑް ކަނޑުގައި އޮންނަ ނައޯޝިމާ ރަށަކީ އެއްދުވަސްވަރެއްގައި ތަޣައްޔަރުވުމާ އާބާދީ މަދުވުމުގެ ބޮޑު މައްސަލައަކާ ކުރިމަތިލާންޖެހިފައި އޮތް ރަށެކެވެ. ނަމަވެސް، މިއަދު އެ ރަށް ވެފައިވަނީ ޒަމާނީ ފަންނުވެރިކަމުގެ ދުނިޔޭގެ މަރުކަޒަކަށެވެ.

ނަވާރަ ސަތޭކަ އަށްޑިހައިގެ އަހަރުތަކުގައި ނައޯޝިމާއަކީ "ކޮޕާ ސްމެލްޓިންގ" މަސައްކަތްކުރާ ސިނާއީ ރަށެކެވެ. އޭގެ ސަބަބުން ރަށުގެ ތިމާވެށި ވަރަށް ބޮޑަށް ތަޣައްޔަރުވެ، ގަސްގަހާގެހި ނެތިގެން ދިޔައެވެ. އަދި ވަޒީފާގެ ފުރުސަތުތައް ހޯދުމަށް ރަށުގެ ޒުވާނުން ބޮޑެތި ސިޓީތަކަށް ހިޖުރަކުރުމުގެ ސަބަބުން ރަށުގެ އާބާދީ ވަރަށް ބޮޑަށް ދަށަށް ދިޔައެވެ.

ޖަޕާނުގެ ނައޯޝާމާ ރަށުގެ މަންޒަރެއް-- ފޮޓޯ: ބީބީސީ 

މި ރަށް އަލުން އާރާސްތުކުރުމުގެ މަސައްކަތް ފެށުނީ 1989 ވަނަ އަހަރު، މަހުޖަނު ސޯއިޗިރޯ ފުކުޓަކޭގެ އިސްނެންގެވުމުގެ މަތިން "ބެނޭސޭ އާޓް ސައިޓް ނައޯޝިމާ" މަޝްރޫޢު ފެށުމާ ހިސާބުންނެވެ. މަޝްހޫރު އާކިޓެކްޓް ތަޑާއޯ އަންޑޯގެ ފަރުމާތަކަށް ބިނާކޮށް، ރަށުގެ ގުދުރަތީ ރީތިކަމާއި ފަންނުވެރިކަން އެއްކޮށްލައިގެން ތަފާތު މިއުޒިއަމްތަކާއި އާޓް އިންސްޓަލޭޝަންތައް ގާއިމުކުރެވުނެވެ.

މި މަޝްރޫޢުގެ ދަށުން 1992 ވަނަ އަހަރު "ބެނޭސޭ ހައުސް މިއުޒިއަމް" ހުޅުވުނެވެ. އަދި 1994 ވަނަ އަހަރު ޔަޔޯއި ކުސާމާގެ މަޝްހޫރު "ޔެލޯ ޕަމްޕްކިން" ބެހެއްޓުމާއެކު، ނައޯޝިމާއަށް ބައިނަލްއަގުވާމީ ސަމާލުކަން ލިބެން ފެށިއެވެ. އޭގެ ފަހުން 2010 ވަނަ އަހަރު ފެށުނު "ސެޓޫޗީ ޓްރިއެނާލޭ" އާޓް ފެސްޓިވަލާއެކު، ކޮންމެ އަހަރަކު ފަސްލައްކައަށްވުރެ ގިނަ ފަތުރުވެރިން މިހާރު މި ރަށަށް ޒިޔާރަތްކުރެއެވެ.

ރަށުގެ މޭޔަރު ޝިނިޗީ ކޮބަޔާޝީ ވިދާޅުވި ގޮތުގައި، މި ބަދަލާއެކު ރަށުގެ އިގްތިސާދަށް ބޮޑެތި ކުރިއެރުންތަކެއް ވަނީ އައިސްފައެވެ. ގިނަ އަދަދެއްގެ ރެސްޓޯރެންޓްތަކާއި ގެސްޓްހައުސްތައް ހުޅުވައި، ރަށުގެ ދިރިއުޅުމަށް އައު ދިރުމެއް އަންނަނީ ލިބެމުންކަމަށް އޭނާ ބުނެފައިވެއެވެ. އަދި ފާއިތުވި ފަސް އަހަރު ދުވަހުގެ ތެރޭގައި 500 އެއްހައި މީހުން އަލަށް ރަށަށް ހިޖުރަކޮށްފައިވާކަންވެސް އޭނާ ފާހަގަކޮށްފައިވެއެވެ.

އިތުރަށް ޝިނިޗީ ވިދާޅުވީ، މި މަޝްރޫޢުގެ މައިގަނޑު މަގްސަދަކީ ހަމައެކަނި ފަތުރުވެރިކަން ކުރިއެރުވުން ނޫން ކަމަށާއި، އެއީ ރަށުގެ ރައްޔިތުންނަށް އެމީހުންގެ އުފަން ރަށާމެދު ފަޚުރުވެރިވުމުގެ އިހުސާސް ހޯދައިދިނުން ކަމަށެވެ.

ނައޯޝިމާގެ މި ކާމިޔާބީއަކީ ފަންނުވެރިކަމުގެ ޒަރީއާއިން މުޖުތަމައުތައް އަލުން ދިރުވައި އާލާކުރެވިދާނެކަމުގެ ނަމޫނާއެކެވެ.