އެމެރިކާއިން ފެށިގެން އުތުރު އެފްރިކާއާ ހަމައަށް، އަހުރާމުތަކަކީ ޤަދީމީ ދުނިޔޭގައި ވަރަށް މަޤްބޫލު އެއްޗެއް ކަމުގައިވި އެވެ. މިކަހަލަ ބިނާތައް އެންމެ ގިނައިން ނިސްބަތްވަނީ މިޞްރަށް ކަމުގައިވީ ނަމަވެސް، ދުނިޔޭގެ އެންމެ ގިނަ އަދަދަކަށް އަހުރާމުތައް ހުރި ޤައުމަކީ މީހުން ވަރަށް މަދުން ޒިޔާރަތް ކުރާ އެހެން ގައުމެކެވެ. އަދި އެބައިމީހުން ބިނާކުރި އަހުރާމުތަކުގެ އަދަދު މިސްރުގެ ޚުފޫ އާއި އޭނާގެ ބައިވެރިން އިމާރާތްކުރި އަދަދަށްވުރެ މާ ބޮޑުތަނުން ވެސް ގިނައެވެ.

ގާތްގަނޑަކަށް 220 އާއި 255 އާ ދެމެދުގެ އަދަދަކަށް އަހުރާމުތައް އެ ގަައުމުގެ ސަރަޙައްދުގެ ތެރޭގައި ހުރުމާއެކު، މި ލިސްޓުގެ އެންމެ ކުރީގައިވާ ގައުމަކީ ސޫދާންއެވެ. މިޞްރާ އިންވެގެންވާ އެފްރިކާގެ މި ގައުމުގައިވާ އަހުރާމުތަކުގެ އަދަދު، މިސްރަށްވުރެ ގިނައެވެ. މިޞްރުގެ އަދަދާ މެދު ޚިލާފު އުފެދިފައިވީ ނަމަވެސް، އެ އަދަދު ގާތްގަނޑަކަށް 118 އަށް އަރާނެއެވެ.

އާންމު ގޮތެއްގައި މިޞްރުގައި ހުރި އަހުރާމުތަކަށް ވުރެ ކުދި، ސޫދާނުގެ އަހުރާމުތައް އިމާރާތްކޮށްފައި ވަނީ ޤަދީމީ ކުޝް ރަސްކަމުގައެވެ. މިޞްރުގެ އަސްވާނުން ފެށިގެން ސޫދާނުގެ ޚަރުޠޫމާ ހަމައަށް ފެތުރިފައިވާ ނޫބިއާ ސަރަޙައްދުގައި، އީސާގެފާނު އުފަންވުމުގެ އަށް ގަރުނު ކުރިން މުހިންމު ބާރެއްގެ ގޮތުގައި ފާހަގަވި ކުޝީންނަކީ، ޤަދީމީ މިޞްރުގެ ވެރިކަން ކުރި ބައެކެވެ.

މިދަރިކޮޅުގެ ރަސްކަލުންގެ ތެރެއިން މިސްރު ފަތަހަ ކޮށްފައިވަނީ ޕައީ ނަމަކަށް ކިޔާ ރަސްކަލެކެވެ. އޭނާ ވެރިކަން ކުރީ ކުޝީންގެ ވެރިރަށް ކަމުގައިވާ ނަޕަޓާގައި ހުރެގެންނެވެ. ކުރީގެ ފިރުޢައުނުންގެ ޚައިބަތު ބޮޑު މަގުބަރާތައް އާޝޯހިވެގެން، ރަސްގެފާނު ޕައީ، އޭނާ ވެސް އެފަދަ ގޮތަކަށް ވަޅުލުމަށް އޭނާގެ އަހުލުވެރިންގެ ކައިރިން އެދުނެވެ. އޭނާ ވެފައިވަނީ ސޫދާނުގެ ޤަދީމީ އެލް-ކުރްރޫ ޤަބުރުސްތާނުގައި އަހުރާމެއް ޚާއްސަކުރެވުނު އެ ޚާންދާނުގެ ފުރަތަމަ މެންބަރަށެވެ.              

ކުޝީންނަށް މިޞްރުގެ ބާރު ގެއްލުމަށްފަހު، އެމީހުން އަނބުރާ ނޫބިއާއަށް ފަހަތަށް ޖެހުނުވެ. އަދި ފަހުން މެރޯއޭގައި އާ ވެރިކަމުގެ ވެރިރަށެއް ގާއިމުކުރިއެވެ. މިތަނުގައި ގިނަ އަހުރާމުތަކެއް ވެއެވެ. އީސާގެފާނު އުފަންވުމުގެ ތިން ގަރުނު ކުރިން ފެށިގެން މި ޤަދީމީ ސަހަރުގެ ޤަބުރުސްތާނުގައި ގާތްގަނޑަކަށް ކޮޅުތޫނުކޮށްހުރި 200 އަހުރާމު ބިނާކުރެވިފައިވެއެވެ. މީގެ ތެރޭގައި 41 ކުޝް ރަސްކަލުންގެ އަހުރާމު ހިމެނެއެވެ.

އެތަކެއް ޒަމާންތަކަކަށް، ވަރުގަދަ ރަސްކަމެއްކުރި ކުޝްގެ އަތުން މެރޯއޭގެ ބާރުގެ ދަށުން ގެއްލުނީ ރޯމަނުންނާ ކުރި ހަނގުރާމައަކަށް ފަހުގައެވެ. އޭގެ ފަހުން އެތަނުގައިވާ އަހުރާމުތައް ހަލާކުވާން ދޫކޮށްލެވުނެވެ.

އޭގެ އެތައް ގަރުނެއް ފަހުން 1830 ވަނަ އަހަރު މި ސަރަހައްދު ހޯދައިފައިވަނީ އާކިއޮލެޖިސްޓެއް ކަމަށްވާ ޖިސެޕް ފާލިނީއެވެ. އެހެން ނަމަވެސް އެ ސަރަހައްދު ދިރާސާ ކުރުމުގެ ނަމުގައި އޭނާ ވަނީ އަހުރާމުތަކަށް ވަރަށް ބޮޑެތި ގެއްލުންތަކެއް ދީފައެވެ. ގިނަ އަދަދެއްގެ އަހުރާމުތައް މަރާމާތު ކުރަންޖެހޭ ގޮތަށް ދޫކޮށްލިއެވެ.

މިހާރު މެރޯއޭގެ ބައެއް އަހުރާމުތައް މަރާމާތު ކުރެވިފައިވީ ނަމަވެސް، ގިނަ އަހުރާމުތައްް ދަނީ ވީރާނާވަމުންނެވެ.

ސޫދާނުގައި ހިނގާ އަހުލީ ހަނގުރާމަތަކުގެ ސަބަބުން އަހުރާމުތައް މަރާމާތުކުރުމުގެ މަސައްކަތް އެއްވެސް ވަރަކަށް ނުކުރެވެއެވެ. ނަވާރަ ސަތޭކަ ފަންސާސް ވަނަ އަހަރުން ފެށިގެން ސޫދާނުގައި ހިނގާ މި ހަނގުރާމަތަކަކީ އާސާރީ ދިރާސާއަށް ބައިނަލްއަގުވާމީ އިދާރާތަކުން ފޯރުކޮށްދޭ ފައިސާ ލިބުމުގައި އޮތް އެންމެ ބޮޑު ހުރަސް، އަދި އެ ސަރަހައްދުގެ ފަތުރުވެރިކަަމަށް ވެސް އޮތް ހުރަހަކީ ވެސް މިއީއެވެ.

ސޫދާނުގައި މިސްރަށްވުރެ ކިތަންމެ ގިނަ އަހުރާމުތަކެއް ހުއްޓަސް ދުނިޔެއަށް އޭގެ ފުރިހަމަކަން، ވަންހަނާވެފައިވާ ސަބަބީ މިއީއެވެ.