އިސްލާމިކް ޑިޖިޓަލް އެސެޓް ސެންޓަރެއް ޤާއިމުކުރުމަށް ދިރާސާއެއް ކޮށްދޭނެ ފަރާތެއް ހޯދުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިޢުއުލާނުކޮށްފިއެވެ.

މަރުކަޒީ ބޭންކުން ބުރާސްފަތި ދުވަަހު ނެރުނު އިޢުލާނެއްގައި ވިދާޅުވީ، މި ދިރާސް ކޮށްދިނުމަށް ޝައުގުވެރިވާ ފަރާތްތަކުން އީމެއިލް މެދުވެރިކޮށް، ޑިސެމްބަރ 24 ވާ އަންގާރަ ދުވަހުގެ 11:00 ގެ ކުރިން މައުލޫމާތު ހޯދަން ޖެހޭނެ ކަމަށެވެ. އަދި އިޢުލާނުގައި ވިދާޅުވެފައިވާ ގޮތުގައި މި ދިރާސާ ކުރިއަށް ގެންދަން ބޭނުންވާ ފަރާތްތަކުން ޑިސެމްބަރ 29 ވާ އާާދީއްތަ ދުވަހުގެ 11:00 އަށް އަންދާޒާ ހިސާބު ހުށަހަޅަންޖެހޭނެއެވެ.

އެމްއެމްއޭގެ އިޢުލާނާ އެކު ހިމަނާފައިވާ ކަރުދާހުގައި ވިދާޅުވެފައިވާ ގޮތުގައި ޑިޖިޓަލް އެސެޓްތަކާއި އިސްލާމިކް ފައިނޭންސަށް ޤައުމުތަކުގެ މެދުގައި ޝައުގުވެރިކަން އިތުރުވަމުންދާއިރު، މި ދާއިރާއިން ރާއްޖެއަަށް ކުރިއެރުންތައް ގެނެސް، ސަރަހައްދީ ހަބަކަށް ހެދުމަކީ އަމާޒެކެވެ. ޑިޖިޓަލް އެސެޓް ސެންޓަރެއް ޤާއިމްކުރުމުގެ މަޤްޞަދުތަކުގެ ތެރޭގައި އިސްލާމީ ޝަރީޢާ އާ އެއްގޮތް ހައްލުތައް ގެނެސް މާލީ ބައިވެރިވުން އިތުރުކުރުމާއި ބޭރުގެ އިންވެސްޓަރުންގެ ޝައުޤުވެރިކަން ސަރަޙައްދީ ގޮތުންނާއި ތަންފީޒީ ގޮތުން އިތުރުކުން ވެސް ހިމެނޭ ކަމަށް އެމްއެމްއޭއިން ވިދާޅުވެފައިވެއެވެ.

ރާއްޖެއަށް ޑިޖިޓަލް ފައިސާ ތަޢާރަފް ކުރުމުގެ މަސައްކަތް ކުރަމުންދާ ކަމަށް މިދިޔަ އޮކްޓޯބަރ މަހު އެމްއެމްއޭއިން ވިދާޅުވެފައިވެއެވެ. ރާއްޖެއަކީ މާލީ ހަބަކަށް ހެދުމަކީ ސަރުކާރުގެ އަމާޒެކެވެ. އަދި 2030 ވަނަ އަހަރާ ހަމައަށް، ރާއްޖޭގެ ޖީޑީޕީގެ 15 އިންސައްތަ ޑިޖިޓަލް ދާއިރާ ހިއްސާކުރާ ގޮތަށް ހެއްދެވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޞައްވުރެކެވެ.