އިނގިރޭސި ޕްރިމިއަރ ލީގު 7 ފަހަރަށް ކާމިޔާބުކުރި މެންޗެސްޓަރ ސިޓީ ވަނީ ރޭގައި ބޯންމައުތުއާ ދެކޮޅަށް ކުޅުނު މެޗުން ބަލިވެފައެވެ. ބޯންމައުތުން އެމީހުންގެ ދަނޑުގައި ސިޓީ ބަލިކުރީ 2-1 ނެވެ. މިއީ ހުރިހާ ގޮތަކުން ބަލާއިރުވެސް ބޯންމައުތަށް ތާރީޚީ ކާމިޔާބެކެވެ.

މެޗުގެ ނުވަވަނަ މިނެޓުގައި  ފުރަތަމަ ލަނޑު ކާމިޔާބުކޮށް ބޯންމައުތުން ވަނީ ސިޓީ ސިއްސުވާލައިފައެވެ. އެ ޓީމަށް ލީޑް ނަގައިދިނީ ސެމެންޔޯ އެވެ. ދެވަނަ ލަނޑު ދެވަނަ ހާފުގައި ޖަހާ ލީޑް ވަރުގަދަ ކޮށްދިނީ އިވާނިލްސޮން އެވެ. މި ދެ ލަނޑު ޖަހަންވެސް ފުރުޞަތުތައް ތަނަވަސްކޮށްދިނީ ކާކޭޒް އެވެ.

ސިޓީގެ ހަމައެކަނި ލަނޑު ޖަހާފައި ވަނީ މެޗުގެ 83 ވަނަ މިނެޓުގައި ގުންޑޮގާން ތަނަވަސްކޮށްދިން ފުރުޞަތުގެ ބޭނުން ހިފައި ޑިފެންޑަރ ގުވާޑިއޯލް އެވެ.

މިއީ 32 މެޗަށްފަހު ލީގުގައި ސިޓީގެ ފުރަތަމަ ބައްޔެވެ. ލީގުގައި ކުރިން ސިޓީ ބަލިވެފައިވަނީ މިދިޔަ އަހަރުގެ ޑިސެމްބަރު މަހުގެ 6 ވަނަ ދުވަހު އެވެ. މިއީ ހަތަރު ދުވަސް ތެރޭގައި ސިޓީގެ ދެވަނަ ބައްޔެވެ. ކަރަބޯ ކަޕްގައި ޓޮޓްނަމް އަތުން ބަލިވެ ކެޓީވެސް މިހަފްތާގައެވެ.

ސިޓީ ބަލިވުމުގެ ފައިދާ ނަގާ ލިވަޕޫލު ވަނީ 2-1 ން ބްރައިޓަން ބަލިކޮށް، ލީގު ތާވަލްގެ އެއްވަނައިން ޖާގަ ހޯދާފައެވެ. ފަހަތުން އަރައި އަމިއްލަ ދަނޑުގައި ލިވަޕޫލުން ފަހަތުން އަރައި ވަނީ މެޗު ކާމިޔާބުކޮށްފައެވެ. މެޗުގައި ބްރައިޓަން އިން 14 ވަނަ މިނިޓްގައި ކަޑިއޯގުލޫ ޖެހި ގޯލައިން ލީޑް ނެގިނަމަވެސް  70 ވަނަ މިނިޓްގައި ލިވަޕޫލްއިން ވަނީ ކޯޑީ ގަކްޕޯގެ ގޯލައާއެކު ނަތީޖާ ހަމަހަމަ ކޮށްފައެވެ. މެޗުން ލިވަޕޫލް ލީޑް ނެގި ލަނޑު އޭގެ މިނިޓެއް ފަހުން ޖެހީ މުޙައްމަދު ސަލާހު އެވެ.

މިނަތީޖާތަކާއެކު ލިވަޕޫލް ތާވަލްގެ އެއްވަނައިގައި އޮތީ 10 މެޗުން 25 ޕޮއިންޓާއެކު އެވެ. ދެވަނަގައި މެންޗެސްޓަރ ސިޓީ އޮތީ 23 ޕޮއިންޓާއެކުއެވެ. އަސެނަލް އޮތީ 18 ޕޮއިންޓާއެކު 4 ވަނާގައެވެ. ތިން ވަނާގައި އޮތީ 19 ޕޮއިންޓާއެކު ނޮޓިންގހަމް ފޮރެސްޓް އެވެ.