މަސައްކަތް ދިގުލައިގެން ގޮސްފައިވާ މ. މުލީ އެއާޕޯޓް ތަރައްޤީކޮށް ނިންމާ އަންނަ ފެބްރުއަރީ މަހު ހުޅުވޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ވިދާޅުވެއްޖެއެވެ.

ފެބްރުއަރީ 28، 2021 ގައި މުލީގައި ބިން ހިއްކައިގެން 1،200 މީޓަރުގެ ރަންވޭއަކާއެކު، އެއާޕޯޓް ތަރައްޤ ކުރުމުގެ މަސައްކަތް އެމްޓީސީސީ އާ ހަވާލުކުރީ 212 މިލިއަން ރުފިޔާއަށެވެ.

އެމްއެމްޓީވީގެ "ބޮޑު ޚަބަރު" ޕްރޮގަރާމުގައި، އެމްޓީސީސީން މިހާރު ކުރަމުންދާ މަސައްކަތްތަކާއި ބެހޭ ގޮތުން ވާހަކަދައްކަވަމުން އެމްޓީސީސީގެ މެނޭޖިންގ ޑިރެކްޓަރ އަޙްމަދު ސަޢުދީ ވިދާޅުވީ މުލީ އެއާޕޯޓަކީ ވަރަށް ދިގުލައިގެން ގޮސްފައިވާ މަސައްކަތެއް ކަމަށެވެ. ނަމަވެސް މިހާރު އެމްޓީސީސީގެ ކޮންނަ ބޯޓު، މަހާ ޖައްރާފާ އެރަށުގައި ބާއްވައިގެން އިތުރަށް ބޭނުންވާ ބިން ހިއްކުމުގެ މަސައްކަތާއި ޓާމިނަލް ނިންމުމާއި ލައިޓިންގެ މަސައްކަތް ކުރަމުން ގެންދަވާ ކަމަށް އޭނާ ވިދާޅުވިއެވެ. އެމްޓީސީސީން އެންމެ ބާރަށް ކުރިއަށްގެންގޮސް ނިންމާލަން މިހާރު އަމާޒު ހިފާފައި ވަނީ މުލީ އެއާޕޯޓުގެ މަސައްކަތެވެ.

“ރައީސް ޑރ. މުޢިއްޒުގެ ވެސް އަމާޒަކީ ފެބްރުއަރީ މަސް ނިމުގެކުރިން އެތަނަށް ފްލައިޓް ޖެއްސި ރައްޔިތުންނަށް ޚިދުމަތް ލިބޭ ތަނަކަށް ހެއްދެވުން،" ސަޢުދީ ވިދާޅުވިއެވެ.

މ. މުލީ އެއާޕޯޓުގެ ރަންވޭ: މިއީ 1،200 މީޓަރުގެ ރަންވޭއެއް.

މިއަހަރުގެ އެޕްރީލް މަހާއި ހަމައަށް އައިރު، މުލީ އެއާޕޯޓުގެ ރަންވޭގެ މަސައްކަތާއި ޓާމިނަލްގެ މައިގަނޑު މަސައްކަތް ހުރީ ނިންމައިފައެވެ. އެމްޓީސީސީން ކުރިން ބުނެފައިވާ ގޮތުގައި އެ ޕްރޮޖެކްޓުގެ މަސައަތް މަޑުޖެހުނީ ފައިސާގެ ތާށިކަން ކުރިމަތިވެގެންވެ. މުއްޔާއި ނާލާފުށި ކޯޒްވޭއަކުން ގުޅައިލުމުގެ މަސައްކަތް ވެސް އެމްޓީސީސީއާ އޮތީ ހަވާލުކޮށްފައެވެ.