އަންނަ އަހަރު މުޅި ރާއްޖެއަށް އާރުޓީއެލް ފެރީގެ ޚިދުމަތް ފުޅާކުރުމަށް އިތުރު 56 އުޅަނދު ބޭނުންވާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ވިދާޅުވެއްޖެއެވެ.

އެމްޓީސީސީން މިހާރު ކުރަމުންދާ މަސައްކަތްތަކާއި ބެހޭ ގޮތުން އެމްއެމްޓީވީގެ "ބޮޑު ޚަބަރު" ޕްރޮގަރާމުގައި ވާހަކަ ދައްކަވަމުން އެ ކުންފުނީގެ މެނޭޖިންގ ޑިރެކްޓަރ އަޙްމަދު ސަޢުދީ ވިދާޅުވީ އާރުޓީއެލް ފެރީގެ ޚިދުމަތް ރާއްޖޭގެ ހުރިހާ އަތޮޅަކަށް އަންނަ އަހަރު ފުޅާކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާއިވާ ކަމަށެވެ.

"އެހެންވެއްޖެ ކަމަށްވަންޏާއި އަޅުގަނޑުމެންގެ ފްލީޓަށް އިތުރުކުރަން ޖެހޭ 56 އުޅަނދު. 56 އުޅަނދަކީ ކުރިން ބަނދެފައިހުރި އުޅަނދުތަކުގެ އަގަށް ބަލާކަމަށްވަންޏާއި ގާތްގަނޑަކަށް 508 މިލިއަން ރުފިޔާ،" ސަޢުދީ ވިދާޅުވި އެވެ.

އާރުޓީއެލް ފެރީގެ ޚިދުމަތް އެމްޓސީސީން މިހާރު ދަނީ ނުވަ އަތޮޅެއްގެ ހުރިހާ ރަށަކަށް ދެމުންނެވެ.

އެމްޓީސީސީން ވިދާޅުވި ގޮތުގައި ފެރީގެ ޚިދުމަތް ދިނުމުގައި ބެކަޕް އުޅަނދެއް ކޮންމެ އަތޮޅެއްގައި އޮންނަ ޖެހޭގޮތަށް އޮތަސް، މޫސުން ގޯސްވުމާއި ގިނަ އަދަދެއްގެ އުޅަނދު ފަހަރު މަރާމާތުކުރަން ޖެހުމުގެ ސަބަބުން ޚިދުމަތް ދިނުމުގައި ދަތިތައް ދިމާވެއެވެ.

އެ ކުންފުނިން ވިދާޅުވީ މާލެ- ތިލަމާލެ ބްރިޖުގެ މަސައްކަތް ނިމެމުންދާވަރަށް ބަލާފައި، މާލޭ- ވިލިމާލެ ގުޅިފަޅަށް ބަހުގެ ޚިދުމަތް ދިނުމަށް ވެސް ތައްޔާރުވަމުން އަންނަ ކަމަށެވެ.

އެމްޓީސީސީން ރާއްޖޭގައި ހުރިހާ ސިޓީއެއްގައި ބަހުގެ ޚިހުމަތް މިހާރު ވެސް ފޯރުކޮށްދެއެވެ.