މިދިޔަ ސަރުކާރުން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްފައި ހުރި ޕްރޮޖެކްޓްތައް ނުނިމި މަޑުޖެހުމުގެ އެންމެ ބޮޑު ސަބަބަކީ އެ ޕްރޮޖެކްޓްތަކަށް ޚަރަދުކުރާނެ ފައިސާ ނެތުން ކަމަށް އެ ކުންފުނިން ވިދާޅުވެއްޖެއެވެ.

އެމްއެމްޓީވީގެ "ބޮޑު ޚަބަރު" ޕްރޮގަރާމުގައި އެމްޓީސީސީން މިހާރު ކުރަމުންދާ މަސައްކަތްތަކާއި ބެހޭ ގޮތުން ވާހަކަދައްކަވަމުން އެ ކުންފުނީގެ މެނޭޖިންގ ޑިރެކްޓަރ އަޙްމަދު ސަޢުދީ ވިދާޅުވީ މި ސަރުކާރާ ހަމައަށްއައިއިރު، ކުރީގެ ސަރުކާރުގެ 187 ޕްރޮޖެކްޓް އެމްޓީސީސީއިން ފެށި ނަމެވެސް، އެ ޕްރޮޖެކްތަކަށް ބޭނުންވާ ފައިސާ އާއި ތަކެތި ވެސް ނެތް ކަމަށެވެ. އެ ޕްރޮޖެކްޓަތަކުގެ ޖުމްލަ އަކު 5.4 ބިލިއަން ރުފިޔާއަށް އަރާކަމަށް އޭނާ ވިދާޅުވިއެވެ.

"މި ޕްރޮޖެކްޓްތަކާއި ހަވާލުވެގެން ނިންމުގެ މަސައްކަތްކުރަމުން ދިޔައިރު އެއަށްވާވަރަށް ފައިސާއެއް ނެތް. ފައިސާ ނެތުމުގެ ސަބަބުން ވަރަށް ގިނަ ޕްރޮޖެކްޓްތައް ވަނީ މަޑުޖެހިފައި އަދި ކުރިއަށް ގެންދާ ޕްރޮޖެކްޓްތައް ވެސް އޭގެ ޒާތުގައި ކުރިއަށްގެންދަން ދަތި އުނދަގޫވެފައިވާ ސަބަބަކީ މިއަށް ބެނުންވާ މެޓީރިއަލް ނެތުން،" ސަޢުދީ ވިދާޅުވިއެވެ.

ސަރުކާރުގެ ޕީއެސްއައިޕީ ޕްރޮޖެކްޓުތައް ހިންގުމުގެ އިތުރުން އަމްދަނީ ލިބޭނެ އެހެނިހެން ކަންކަމަށް އެމްޓީސީސީން އިންވެސްޓްކުރާނެ ކަމަށް ސަޢުދީ ވިދާޅުވިއެވެ. އޭނާ ވިދާޅުވީ ރައީސުލްޖުމްހޫރިއް ޑރ. މުޙައްމަދު މުޢިއްޒު އިރުޝާދުދެއްވާފައި ވަނީ ވެސް އެމްޓީސީސީ އަކީ އަމިއްލަ ޒާތުގައި ހިނގާ ކުންފުންޏަކަށް ހެއްދެވުމަށް ކަމަށެވެ.

"ރައީސުލްޖުމްހޫރިއްޔާ ވިދާޅުވި އެމްޓީސީސީ އަކީ އޭގެ ޒާތުގައި ކުރިއަށްދާންޖެހޭ ކުންފުންޏެކޭ، އެ ސިޔާސަތާއި އެއްގޮތަށް، ކުންފުނީގެ ޒާތުގައި ކުރިއަށް ދިއުމަށްޓަކައި ކެޕޭސިޓީ ހުރި ކުންފުޏްނެއް އެމްޓީސީސީއަކީ،" އޭނާ ވިދާޅުވި އެވެ.  

އެމްޓީސީސީގެ އެމްޑީ ސައުދީ ވިދާޅުވީ މިހާރުވެސް އެމްޓީސީން 108 ރަށެއްގައި ހަރަކާތްތެރިވާއިރު، 78 ރަށެއްގައި ޕްރޮޖެކްތައް ހިންގަމުން ގެންދާ ކަމަށެވެ. އެމްޓީސީސީ އަށް މި ސަރުކާރު އައިފަހުން ހަވާލުކުރި 24 ޕްރޮޖެކްޓުގެ ތެރެއިން 13 ޕްރޮޖެކްޓް މިހާތަނަށް ނިމިފައިވާކަމަށް އޭނާ ވިދާޅުވިއެވެ.

އެމްޓީސީއަކީ ފަންނީ ޤާބިލު މުވައްޒަފުން ތިބި ކުންފުންޏަކަށްވާއިރު، ރައީސް ޑރ. މުޢިއްޒު އަންނަ އަހަރަށް ވަޢުދުވެވަޑައިގެންފައިވާ ޕްރޮޖެކްޓައް ހިނގުމަށް ވާންޖެހޭ ތައްޔާރީތައް ވެސް ވަމުންދާކަމަށް ސަޢުދީ ވިދާޅުވިއެވެ. އޭނާ ވިދާޅުވީ އަންނަ އަހަރު ސަރުކާރުން 600 އަށްވުރެ ގިނަ ޕީއެސްޕީ ޕްރޮޖެކްޓް ހިންގާނެކަމަށް ބެލެވޭއިރު، އޭގެ ތެރެއިން ގިނަ ޕްރޮޖެކްޓްތަކެއް އެމްޓީސީސީއަށް ލިބޭނެކަމަށް ބެލެވޭ ކަމަށެވެ.

އެމްޓީސީސީ އަށް އިތުރު އާމްދަނީ ހޯދުމުގެ ގޮތުން ކުރާ އެންމެ މުޙިއްމު އެއް ކަމެއްގެ ގޮތުގައި ސައުދީ ފާހަގަކުރެއްވީ އެ ކުންފުނީގެ ތިލަފުށީ ބޯޓުޔާޑު މަސަކަތް ފުޅާކުރެއްވުމާއި ކުދި އަދި މެދު ސައިޒުގެ ބޯޑުފަހަރު ޑޮކް ކުރުމުގެ ޚިދުމަތް ދިނުމަށް ޑޮކްޔާޑެއް ތިލަފުއްޓަށްވުރެ ބިމުކުލި އަގުހެޔޮ ތަނެއްގައި ޤާއިމު ކުރުމެވެ. ސައުދީ ވިދާޅުވި ގޮތުގައި އެކަމަށް ޝައުޤުވެރިވާ ބޭރުގެ ފަރާތްތަކާއި އެކަމާ ބެހޭ ގޮތުން އަންނަނީ ވާހަކަ ދައްކަމުން ކަމަށެވެ.