ENGLISH
04 އޭޕްރީލު 2025
ދިވެހި އުފެއްދުންތައް އުފައްދާ ފަރާތްތަކަށް 26 މިލިއަން ރުފިޔާ މިއަހަރު ބީސީސީން ދޫކޮށްފި
15 ޑިސެމްބަރު 2024
|
އެންމެ މަޤްބޫލު
ދިވެހިންގެ އުފެއްދުންތައް ވިއްކައިދީގެން، 26 މިލިއަން ރުފިޔާ މި އަހަރު ތެރޭގައި ސަޕްލަޔަރުންނަށް ދޫކުރެވިފައިވާނެ ކަމަށް ބިޒްނަސް ސެންޓަރ ކޯޕަރޭޝަން (ބީސީސީ) އިން ވިދާޅުވެއްޖެއެެވެ.
އެމްއެމްޓީވީގެ "ބޮޑު ޚަބަރު" ޕްރޮގްރާމުގައި ބީސީސީގެ ޑެޕިއުޓީ މެނޭޖިންގ ޑިރެކްޓަރ ސާމިހް އާދަމް ވިދާޅުވީ އެ ކުންފުނިން ހިންގާ އޮތެންޓިކް މޯލްޑިވްސްގެ ފިހާރަތައް މެދުވެރިކޮށް، ދިވެހި އުފެއްދުންތައް ވިއްކައިގެން، މިދިޔަ ފަސް އަހަރު ދުވަހުގެ ތެރޭގައި ދޫކުރި ފައިސާގެ ތެރެއިން 29 ޕަސެންޓް ދީފައިވަނީ މި އަހަރުގެ ތެރޭގައި ކަމަށެވެ.
ކުދި އަދި މެދުފަންތީގެ ވިޔަފާރިތަކަށް ފަންނީ އެހީފޯރުކޮށްދީ މާކެޓް ހޯދައިދިނުމަށް އުފައްދާފައިވާ ބީސީސީގެ އޮތެންޓިކް މޯލްޑިވްސްގެ އައުޓްލެޓްތައް، މާލެ އާއި ރާއްޖޭގެ ދެ އެއާޕޯޓެއްގަ އާއި، ކްރޮސްރޯޑްސްގަ އާއި އއ. ތޮއްޑޫގައި ވެސް ހުރެ އެވެ. މީގެ އިތުރުން ޖަޕާނުގެ ދެ އެއާޕޯޓެއްގަ އާއި ވޮޝިންޓަންގައި ހުންނަ ވޯލްޑް ބޭންކުގެ ހެޑް އޮފީހުގައި ވެސް ދިވެހިން އުފައްދާ ތަކެތި ލިބެން ހުންނާނެ ކަމަށް ސާމިހު ވިދާޅުވިއެވެ.
ބީސީސީން ވިދާޅުވީ އެތަނުގެ 12 ރީޖަނަލް ބިޒްނަސް ސެންޓަރ މެދުވެރިކޮށް 700 ފަރުދަކަށް މި އަހަރުގެ ތެރޭގައި ފަންނީ ލަފާދީފައިވާ ކަމަށެވެ. އަދި ބީސީސީގެ ޓްރޭނިން އިންސްޓިޓިއުޓް މެދުވެރިކޮށް 600 އެއްހާ ދަރިވަރުންނަށް، ތަފާތު ވައްތަރުގެ ޓެރޭނިންތައް ފޯރުކޮށްދެވިފައިވާ ކަމަަށް ވެސް ސާމިހު ވިދާޅުވިއެވެ.
ބީސީސީން ވިދާޅުވީ އެތަނުގެ ހުރިހާ ޚިދުމަތްތަކެއް އޮންލައިންކޮށް އެއް ޕްލެޓްފޯމަކުން ދޭން 'ކުމެވި' ޕޯޓަލް ދާދިފަހުން އިފުތިތާޙު ކޮށްފައިވާނެ ކަމަށެވެ. މަސްވެރި އުފެއްދުންތައް ވިއްކުމަށް ޚާއްޞަ "މަހަ" ޕޯޓަލްގެ ޚިދުމަތްތައް ހޯދުމަށާއި، އަމިއްލަ މަސައްކަތް ކުރާ ފަރާތްތަކުގެ ދަފްތަރުގައި ރަޖިސްޓަރ ކުރުމުގެ އިތުރުން، ބީސީސީން ދާދިފަހުން ފެށި ކްރިއޭޓިވް އިކޮނޮމީ ފަންޑުގެ ދަށުން ފޯރުކޮށްދޭ ޚިދުމަތްތައް ވެސް މި ޕޯޓަލް މެދުވެރިކޮށް ލިބޭނެ ކަަމަށް ބީސީސީން ވިދާޅުވި އެވެ.