ENGLISH
03 އޭޕްރީލު 2025
ފަރުބަދަ ކަނޑައިގެން ހެދި ލޯބީގެ މަގު
15 ޑިސެމްބަރު 2024
|
ފޮޓޯ: ގެޓީ އިމޭޖްސް
އެންމެ މަޤްބޫލު
ބައެއްް މީހުންނަކީ ދިރިއުޅުމުގައި ހިތާމަވެރި ކަމެއް ދިމާވުމުން، އެފަދަ ކަމެއް ދެން ތަކުރާރުވިޔަ ނުދިނުމަށް ކޮންމެފަދަ ގުރުބާނީއެއް ވެސް ވެދާނެ ބަޔެކެވެ. މިކަލަ ބައެއް މީހުންގެ ނުގުޑާފަދަ އަޒުމާއި ހިތްވަރުގެ ފަހަތުގައި ގިނަފަހަރު ކޮންމެވެސް ލޯބިވާ ފަރާތެއް ވެއެވެ.
މިގޮތުން އިންޑިޔާގެ ދަނޑުވެރިއެއް ކަމަށްވާ ދަޝްރަތު މާންޖީ ވަނީ، އޭނާގެ އަންހެނުންނަށް ދިމާވި ހާދިސާއަކާ ގުޅިގެން، 22 އަހަރު ވަންދެން، ހަމައެކަނި މަރުތޭލަކާއި ފުށްކައްޓެއް ބޭނުން ކޮށްގެން ފަރުބަދަ ކަނޑައިގެން މަގެއް ހަދާފައެވެ.
ނަވާރަ ސަތޭކަ ފަންސާސް ނުވަވަނަ އަހަރު އިންޑިޔާގެ ބިހާރުގެ އަވަށެއް ކަމަށްވާ ގެލައުރުގައި، މާންޖީގެ އަންހެނުން ފަލްގުނީ ދޭވީ ފަރުބަދައެއްގެ މަތިން ވެއްޓި ލިބުނު ޒަހަމްތަކަށް ފަރުވާދޭން ހަސްފަތާލަކަށް ގެންދިޔުމުގެ މަގުމަތީގައި ނިޔާވިއެވެ.
ގެލައުރުގެ އެއްފަރާތުގައިވާ ފަރުބަދައިގެ ސަބަބުން، އެންމެ ކައިިރި ހަސްފަތާލަކަށް ދެވެން އޮންނަނީ ފަރުބަދަ މައްޗަށް އަރައިގެން ނޫނީ ފަރުބަދަ ވަށާލުމަށްފަހުގައެވެ. މިދަތުރުގައި ގާތްގަނޑަކަށް 70 ކިލޯމީޓަރު ކަޑައްތުކުރަން ޖެހެއެވެ.
ފަލްގުނީގެ ކުއްލިވަކިވުމުން ހިތް ކުދިކުދި ވެފައިވާ، އޭނާގެ ފިރިމީހާ ދަޝްރަތު މާންޖީ، މި ހާދިސާއަށްފަހު ވަރަށް އާދަޔާ ޚިލާފު ކަމެއް ކުރުމަށް އަޒުމު ކަނޑައެޅިއެވެ. އެއީ ކައިރީގަ އޮންނަ ފަރުބަދަ ކަނޑައިގެން އެންމެ ކައިރިގައި ހަސްފަތާލެއް ހުންނަ އަވަށާއި ދޭތެރޭ މަގެއް ހެދުމެވެ.
މާންޖީ ގަބޫލުކުރާ ގޮތުގައި އޭނާގެ އަންހެނުންނަށް ލިބުނު ޒަހަމްތަކަށް ފަރުވާދޭން ހަސްފަތާލަކަށް ގެންދެވުނު ނަމަ ފުރާނަ ސަލާމަތް ކުރެވުނީހެވެ. އެހެން ކަމުން އޭނާގެ އަންހެނުންނަށް ދިމާވިފަދަ ކަމެއް އެ އަވަށުގެ އެހެން މީހަކަށް ތަކުރާރުވިޔަ ނުދިނުމުގެ އަޒުމުގައި ހަމައެކަނި މަރުތޭލަކާއި ފުށްކައްޓެއް ހިފައިގެން ފަރުބަދަ ކެނޑުމުގެ މަސައްކަތް 1960 ވަނަ އަހަރު ފެށިއެވެ.
މި އާދަޔާ ހިލާފު ބޮޑު މަސައްކަތްކުރަން މާންޖީ ފެށުމުން މީހުންގެ ފުރައްސާރަޔާ ވަރަށް ބޮޑަށް ކުރިމަތިލާން ޖެހުނެވެ. އެގޮތުން އަވަށުގެ ގިނަ މީހުން އޭރު މާންޖީ ސިފަކުރީ މޮޔައެއްގެ ގޮތުގައެވެ. އެއީ މާންޖީ ކުރަންފެށި މަސައްކަތަކީ ވެދާނެ ކަމެއްކަމަށް އެމީހުނަށް ގަބޫލު ނުކުރެވޭތީއެވެ.
މީހުންގެ ފުރައްސާރައާއި އެތަކެއް ދަތި އުނދަގޫ ކަންތައްތަކެއް ތަހައްމަލު ކުރުމަށްފަހު، 1982 ވަނަ އަހަރު، މަސައްކަތްފެށިތާ 22 އަހަރު ފަހުން މާންޖީ ވަނީ ފަރުބަދަ ކަނޑައިގެން އޭނާގެ ލޯބީގެ މަގު ފުރިހަމަ ކޮށްފައެވެ.
މި މަގު ފުރިހަމަ ކުރިމަށް މާންޖީ ވަނީ 360 ފޫޓުދިގު، 30 ފޫޓު ފުޅާ އަދި 25 ފޫޓު ފުން ސަރަހައްދެއް ފަރުބަދަ ތެރެއިން ކަނޑާ ނަގައިފައެވެ.
ކުރިން މާންޖީގެ އަވަށުން ފެށިގެން އެންމެ ކައިރީގައިވާ ހޮސްޕިޓަލާ ދޭތެރޭ 55 ކިލޯމީޓަރު ހުރެއެވެ. ނަމަވެސް މި ފަރުބަދަ ކަނޑައިގެން މާންޖީ ހެދި މި މަގުގެ ސަބަބުން މި ރާސްތާ 15 ކިލޯމީޓަރަށް ކުރުވިއެވެ.
މާންޖީގެ މިއާދަޔާހިލާފު ބުރަ މަސައްކަތުގެ ސަބަބުން، އެއަވަށުގެ އިތުރުން މުޅި އިންޑިޔާއަށް ވެސް އޭނާ މަޝްހޫރުވިއެވެ.
ދެހާސް ހަތް ވަނަ އަހަރު މާންޖީ ނިޔާވި ފަހުން ސަރުކާރުން ވަނީ، މާންޖީ ހެދިމަގު ޒަމާނީ ފެނަވަރަށް ހަދާފައެވެ. މާންޖީގެ ޖަނާޒާގެ ކަންކަންވެސް ބިހާރުގެ ސަރުކާރުން ކުރިއަށް ގެންގޮސަފައި ވަނީ ރަސްމީ އިއްޒަތުގައެވެ. ދެހާސް ސޯޅަ ވަނަ އަހަރު މާންޖީގެ ހަނދާނުގައި ސްޓޭމްޕެއް ވެސް ވަނީ ނެރެފައެވެ. ގެލައުރުގައި މާންޖީގެ ހަނދާނީ ބިނާއެއް ވެސް ވަނީ ބިނާކޮށްފައެވެ. އަދި 2015 ވަނަ އަހަރު "މާންޖީ- ދަ މައުންޓެން މޭން"ގެ ނަމުގައި ހިންދީ ފިލްމެެއް ވެސް ވަނީ ނެރެފައެވެ.
މާންޖީގެ މި މަސައްކަތަކީ ކިތަންމެ ވަރަކަށް އެކަމުގެ ވާހަކަ ދެއްކިޔަސް، އޭނާގެ ހަޔާތާ ގުޅޭގޮތުން ކިތަންމެ ފިލްމެއް ނެރުނަސް އަގު ނުކުރެވޭނެ ފަދަ ޚިދުމަތެކެވެ. މާންޖީގެ މި މަސައްކަތަކީ އޭގެ ފައިދާާ އެތަކެއް ޖީލުތަކަކަށް ދެމިގެންދާ، އަދި ހަގީގީ ލޯބި އޭގެ އެންމެ ފުންމިނުގައި ދައްކުވައިދޭ މަސައްކަތެކެވެ.