އޭނާ ވަނީ މެންޗެސްޓަރ ޔުނިޓެޑްގެ 26 މެނޭޖަރުން ދެކެފައެވެ. އެންމެ ފުރަތަމަ މަތިންދާބޯޓެއް އުފެއްދިއިރުވެސް އޭނާ ދުނިޔޭގައި އުޅެމުން ދިޔައެވެ. ރާނީ ވިކްޓޮރިޔާގެ ރަނިކަންވެސް ދެކެފައިވާ ޖޮނަތަން ވަނީ އެމެރިކާގެ 40 ރައީސެއްގެ ވެރިކަމުގައި ވެސް ދުނިޔޭގައި އުޅެފައެވެ.

ދައްކަންމިއުޅެނީ އުމުރުން ދެ ގަރުނުވާން ކައިރިވެފައިވާ، މިހާރު ދުނިޔޭގައި ހުރި އެންމެ ދުވަސްވީ އެއްގަމުގައި އުޅޭ ޖަނަވާރު ކަމަށްވާ ޖޮނަތަންގެ ވާހަކައެވެ.

ޖޮނަތަންއަކީ 1888 ވަނަ އަހަރު ސީޝެލްސްގެ ސަރުކާރުން އެޓްލާންޓިކް ކަނޑުގައި އޮންނަ އިނގިރޭސީން އިސްތިއުމާރުކޮށްފައިވާ ގައުމެއް ކަމަށްވާ ސެއިންޓް ހެލީނާގެ ގަވަރުނަރ ސަރ ވިލިއަމް ގްރޭ ވިލްސަން އަށް ހަދިޔާ ކޮށްފައިވާ ކަހަނބެކެވެ. އޭރުން ފެށިގެން މިއަދާ ހަމަޔަށް ވެސް ޖޮނަތަން ދިރިއުޅެމުން ދަނީ ސެއިންޓް ހެލީނާގެ ގަވަރުނަރުގެ ރަސްމީ ގެކޮޅު ކަމަށްވާ "ޕޮލާންޓޭޝަން ހައުސް"ގައެވެ.

ބުނެވޭ ގޮތުގައި ސެއިންޓް ހެލީނާ އަށް ޖޮނަތަން ގެނެވުނުއިރު ވެސް މަދުވެގެން އެޔަށް 50 އަހަރު ވެދާނެއެވެ. އެހެންކަމުން މިހިނގާ 2024 ވަނަ އަހަރު ޖޮނަތަންއަށް ވަނީ 192 އަހަރު ވެފައެވެ. ޖޮނަތަން އަކީ ދެ ކަމަކުން ގިނީސް ރެކޯޑު ފޮތުން ޖާގަ ހޯދައިފައިވާ ފަރާތެކެވެ. އެއީ އެންމެ ގިނަ ދުވަސްވީ އެއްގަމު ޖަނަވާރުގެ ރެކޯޑާއި، އެންމެ ގިނަ ދުވަސްވީ "ކޮލޯނިއަން" ގެ ރެކޯޑެވެ. ކޮލޯނިއަންއަކީ ހުރިހާ ވައްތަރެއްގެ ވެލާ/ކަހަނބު ، އެއްގަމާއި މޫދުގައި ވެސް އުޅޭ ބާވަތްތައް ހިމެނޭހެން ޖުމްލަ ގޮތެއްގައި ކިޔާ އުޅޭނަމެކެވެ.

ޖޮނަތަންގެ އެހީތެރިއެއްގެ ގޮތުގައި ހަރަކާތްތެރިވާތާ 10 އަހަރަށް ވުރެ ގިނަ ދުވަސްވެފައިވާ ލޫސީ ބުނެފައިވަނީ މީގެ ވިއްސަކަށް އަހަރު ކުރިން ޖެހުނު ލޮލުގެ ބައްޔެއްގެ ސަބަބުން ޖޮނަތަންގެ ލޮލުގެ ފެނުން ގެއްލިފައިވާ ކަމަށެވެ. އެހެން ނަމަވެސް އަދިވެސް ޖޮނަތަން ފާހަގަ ކުރެވިފައިވަނީ އުމުރަކަށް ބެލުމެއް ނެތި އޭނާގެ ބައިވެރިންނާއެކު ހަރަކާތްތެރި ދިރިއުޅެމެއް އުޅެމުންދާ ފަރާތެއްގެ ގޮތުގައެވެ.

ލޫސީ ގަބޫލުކުރާ ގޮތުގަ ޖޮނަތަންގެ ދިގު އުމުރުގެ ސިއްރަކީ އޭނާގެ ކެއުމުގެ ވައްޓަފާޅިއެވެ. ޖޮނަތަންއަށް ކާންދެނީވެސް ލޫސީގެ އަތުންނެވެ. ސަބަބަކީ ލޯއަނދިރި ވުމުގެ ސަބުން ޖޮނަތަންއަށް ކެއުމުގައި އުނދަގުލެއް ކުރިމަތިވެދާނެ ކަމަށްޓަކައެވެ. އާއްމު ގޮތެއްގައި ޖޮނަތަން ކަައި އުޅެނީ ކެރެޓް، އާފަލު، ލެޓިއުސް އަދި ދޮންކޭލެވެ.

ދުވަސްވީ ދިރުންތަކާ ގުޅޭގޮތުން ދިރާސާ ކުރާފަރާތެއް ކަމަށްވާ ޑރ. ޖޯ ހޮލިންްސް ފާހަގަކޮށްފައިވާ ގޮތުގައި ޖޮނަތަންގެ ދިގު އުމުރުގެ ސިއްރަކީ އޭގެ ޖެނެޓިކްސްއެވެ. މި ވައްތަރުގެ ކަހަނބަކީ ކެންސަރަށް ވެސް ރެސިސްޓެންސް ޖަނަވާރެކެވެ. އެއީ މި ބާވަތުގެ ކަހަނބު އުފެދިފައިވާ ގޮތުން އަމިއްލަޔަށް ޖީންސް ރިޕެއާ ވާތީއެވެ. ވަރަށް އަގުބޮޑު ރިސާޗްތަކަކަށް ފަހު، މި މައުލޫމާތުތައް ހިއްސާކުރަމުން ޖޯ ހޯލިންސް ބުނެފައިވަނީ 400 އަހަރު ނުވަތަ 500 އަހަރު ދުވަހު ވެސް ޖޮނަތަން ދުނިޔޭގައި އުޅުމަކީ ނާދިރު ކަމެއް ނޫން ކަމަށެވެ.

ރާނީ ވިކްޓޯރިޔާގެ ރަނިކަން ވެސް ދެކެފައިވާ ޖޮނަތަން އަކީ އިނގިރޭސި ޝާހިީ އާއިލާގެ މެމްބަރުންނާ ވެސް ގާތް ކަހަނބެކެވެ. އެގޮތުން ޕްރިންސް އެޑްވާޑް ވަނީ މި އަހަރު ވެސް ޖޮނަތަންއަށް ޒިޔާރަތް ކޮށްފައެވެ.

އަދި މީގެ ކުރިން ޕްރިންސް އެޑްވާޑް ގެ މާމަ (ރާނީ އެލިޒެބަތު) ،ކާފަ (ރަސްގެފާނު ޖޯޖް)، މަންމަ (ޕްރިންސަސް އެލިޒަބަތު) އަދި ބޮދުދައިތަ  (ޕްރިންސަސް މާގޮރެޓް) ހިމެނޭހެން ޝާހީ އާއިލާގެ ވަފްދެއް ވަނީ 1947 ވަނަ އަހަރު ޖޮނަތަންއާ ބައްދަލު ކޮށްފައެވެ.

ޖޮނަތަންއަކީ މިހާރު ސެއިންޓް ހެލީނާގެ ސަރުކާރުގެ ހާޒާނާއެކެވެ. ޖޮނަތަންގެ ކަންކަންމަށް ސަރުކާރުން ޚާއްސަ މުވައްޒަފުން ކަނޑައަޅާފައިވާއިރު، ޖޮނަތަންގެ ތަސްވީރުގައި އެތަކެއް ސްޓޭމްޕެއް ވެސް ސެއިންޓް ހެލީނާ އިން ވަނީ ނެރެފައެވެ.