ސެޕްޓެމަބަރ 10، 1945 ގައި އެމެރިކާގެ ކޮލުރާޑޯގެ އަވަށެއް ކަމަށްވާ ފްރޫޓާގެ ދަނޑުވެރި ދެމަފިރިން ކަމަށްވާ ލޮއިޑް އޮލްސަން އަދި އޭނާގެ އަނބިމީހާ ކްލާރާ އޮލްސަން ދިޔައީ ރޭގަނޑުގެ ވަރުގަދަ ކެއުމެއް ތައްޔާރު ކުރުމަށް ކުކުޅުތަކެއް ކަތިލަމުންނެވެ. ލޮއިޑް ކުކުޅުތަކުގެ ކަރު ބުރިކުރަމުންދިޔައިރު، ކްލާރާ ދިޔައީ ކުކުޅުތައް ސާފު ކުރަމުންނެވެ.

ގާތްގަނޑަކަށް ސާޅީހަކަށް ކުކުޅު ކަތިލިފަހުން، ކަތިލާފައިވާ ކުކުޅުތަކުގެ ތެރެއިން ކުކުޅެއް ހަރަކާތް ކުރާތަން ފެނުނެވެ. ނަމަވެސް މިކަމަށް އެދެމަފިރިން މާބޮޑު ސަމާލުކަމެއް ނުދެއެވެ. ސަބަބަކީ ކުކުޅު އުފެދިފައިވާ ގޮތުން ކަރު ބުރިކޮށްލުމަށްފަހު ބައެއް ފަހަރު ދިހަވަރަކަށް މިނިޓަށް ކުކުޅު ހަރަކާތްކުރުން އެއީ މަދުން ނަމަވެސް ފެންނަ ކަމަކަށް ވާތީއެވެ. ކްލާރާ ހުރިހާ ކުކުޅެއް ސާފުކޮށްނިމެން ކައިރިވި އިރުވެސް އެ ކުކުޅު އޮތީ ހަރަކާތްކޮށްލަ ކޮށްލައެވެ. އޭރު މި ކުކުޅުގެ ކަރު ބުރި ކޮށްލިފަހުން ގާތްގަނޑަކަށް އެއްގަޑިއިރަށްވުރެ ގިނަ އިރުވެދާނެއެވެ.

މިމަންޒަރު ފެނި ހައިރާންވެފައި ހުރި ލޮއިޑް އެ ކުކުޅު ނަގާ އެހެން ކުކުޅުތަކާ ވަކިކުރި، ނަމަވެސް ކަރު ބުރިކޮއްލާފައިވާއިރު ވެސް އާދައިގެ އެހެން ކުކުޅުތަކެކޭ އެއްގޮތަށް މި ކުކުޅު ދިޔައީ އުޅެމުންނެވެ. މައިކްއަށް ކާންދެނީ ލޮަލަށް ބޭސް އަޅަން ބޭނުންކުރާ ސިރިންޖެއް ބޭނުން ކޮށްގެން އެކިކަހަލަ ދިޔާ އެއްޗިހި ކަރުގެ ހުޅުވިފައިވާ ދިމާއިން ސީދާ ގޮހޮރަށް ފޮނުވައިގެންނެވެ.

މައިކްގެ ނަމުން ނަންދެވުނު މި ކުކުޅު އިތުރު 18 މަސް ދުވަހު ދުނިޔޭގައި އުޅުނެވެ. މަރުވި އިރު މައިކް ވަނީ ކަރު ބުރިކޮށްލުމަށްފަހު އެންމެ ގިނަދުވަހު ދުނިޔޭގައި ހުރުމުގެ ރެކޯޑް ހަދައި ގިނިސް ދުނިޔޭގެ ރެކޯޑް ފޮތުން ޖާގަ ހޯދާފައެވެ.

ކަރުބުރިކޮށްލެވުނު ފަހުން މައިކްއަށް ވަރަށްގިނަ ބައެއްގެ ސަމާލުކަން ލިބުނެވެ. އެގޮތުން އެ ޒަމާނުގައި އެމެރިކާގެ އެކި ސަރަހައްދުތަކުގައި ސާކަސް ހިންގާފަރާތެއް އޮލްސަންއާ ބައްދަލުކޮށް ހުށަހެޅީ މައިކް ސާކަސްގައި ބައިވެރިކުރުމަށެވެ. މައިކް ސާކަސްގައި ބައިވެރިކުރުމުގެ ނަތީޖާއަކަށްވީ މައިކް ދައްކާލައިގެން ކޮންމެ މަހަކު އެތައްހާސް ޑޮލަރެއް ލިބުމެވެ. އެގޮތުން އޭރު މަހެއްގެ މައްޗަށް 5،000 ޑޮލަރު މައިކްގެ ފަަރާތުން އޮލްސަންއަށް ލިބެއެވެ. މިހާރުގެ އަގުން ވަޒަންކުރާއިރު މިއީ މަހެއްގެ މައްޗަށް 70،000 އެމެރިކާ ޑޮލަރެވެ.

އެދުވަސްވަރުގެ އެމެރިކާގެ މަޝްހޫރު ގިނަ މަޖައްލާތަކުން ވަނީ މައިކުގެ ޚަބަރުތައް ލިޔެފައެވެ. އޭގެތެރޭގައި ޓައިމް މެގަޒިން ވެސް ހިމެނެއެވެ.

ޔުނިވާސިޓީ އޮފް ނިއުކާސަލްގެ ކުކުޅާބެހޭ މާހިރެއް ކަމަށްވާ ޑރ. ޓޮމް ސްމަލްޑާސް ފާހަގަކުރި ގޮތުގައި، އޭނާ އެންމެ ހައިރާން ކުރުވި ކަމަކީ މައިކްގެ ކަރު ބުރިކޮއްލުމަށް ފަހު ލޭމަނާވުމެވެ. ސަބަަބަކީ މިގޮތަށް ކަރުބުރިކޮށްލުމުން ލޭމަނާ ވުމުކީ ވަރަށް ވެސް ނާދިރު ކަމަކަށްވާތީއެވެ. މައިކް ސަލާމަތްވީ އޭގެ ކަރު ބުރިކޮށްލުމުން ދެލޯ، ކަންފަތް އަދި ތުންފަތް ހަށިގަނޑާވަކިވުމުން އުފެދުނު އާދަޔާ ހިލާފު ބްލަޑް ކްލޮޓްގެ ސަބަބުންނެވެ.

އަދި ސިކުނޑީގެ އެންމެ މުހިންމު ބަައި ކަމުގައިވާ ސެރެބެލަމް ހަށިގަނޑާ ވަކިނުވެ އޮވެ، މަައި ލޭނާރެއް ކަމަށްވާ ޖަގުޔުލާ ވެއިން ބުރިނުވެ އޮތުމަކީ ކަރުބުރިކޮށްލުމުން ވެސް މައިކް އެހާ ގިނަ ދުވަހު ދުނިޔޭގައި ހުންނަން ދިމާވި ސަބަބު ކަމުގައި ޑރ. ޓޮމް ފާހަގަ ކުރިއެވެ.

މައިކް މިދުނިޔެ ދޫކުރިތާ 77 އަހަރު ވެފައިވާ އިރުވެސް މައިކްގެ ހަނދާންތައް، މައިކްގެ އަވަށު މީހުން ދަނީ ކޮންމެ އަހަރަކު ވެސް އާކުރަމުންނެވެ. އެގޮތުން އެމެރިކާގެ ކޮލުރޯޑާގެ ފްރޫޓާ އަވަށުގެ މީހުން ކޮންމެ އަހަރެއްގެ މޭ މަހުގައި "ހެޑްލެސް ޗިކެން ފެސްޓިވަލް" ގެ ނަމުގައި ފެސްޓިވަލެއް ބާއްވައެވެ.

ފްރޫޓާގައި މައިކްގެ ހަނދާނީ މޮނިޔުމެންޓެއް ވެސް ބިނާ ކޮށްފައި ހުރެއެވެ.