ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ތައްޔާރުވުމުގެ ގޮތުން، ޕީޕަލްސް ނޭޝަނަލް ކޮންގްރެސް ޕާޓީ (ކޮންގްރެސް) ޕާޓީގެ ހެންވޭރު އުތުރު ދާއިރާގެ ކެމްޕޭން ޖަގަހަ ފަސްޓް ލޭޑީ ސާޖިދާ މުޙައްމަދު ހުޅުއްވައިދެއްވައިފި.

ކޮންގްރެސް ޕާޓީގެ ހެންވޭރު އުތުރު ދާއިރާގެ ކެމްޕޭން ޖަގަހަ ފަސްޓް ލޭޑީ ސާޖިދާ މުޙައްމަދު ހުޅުއްވައިދެއްވުން. ފޮޓޯ: ކޮންގްރެސް ޕާޓީ

ހެންވޭރު އުތުރު ދާއިރާގެ ޖަގަހަ ހުޅުވީ ހުސްނުހީނާ މަގު، ގ. ހެޕީސައިޑްގަ. 

ޖަގަހަ ހުޅުއްވައިދެއްވުމުގެ ޙަފްލާގައި، ފަސްޓް ލޭޑީގެ އަރިހުގައި ކޮންގްރެސް ޕާޓީގެ ޕީޖީ ލީޑަރު އަދި މިފަހަރުގެ ކެމްޕޭންގެ އެ ޕާޓީގެ ކެމްޕޭން މެނޭޖަރު އިބްރާހީމް ފަލާޙް އާއި ޕާޓީގެ ލީޑަރޝިޕްގެ ބޭފުޅުން ބައިވެރިވެވަޑައިގެންނެވި.

ކޮންގްރެސް ޕާޓީގެ ހެންވޭރު އުތުރު ދާއިރާގެ ކެމްޕޭން ޖަގަހަ ހުޅުއްވައިދެއްވި ޙަފްލާގައި ފަސްޓް ލޭޑީ، ކެންޑިޑޭޓުން ހިމެނިވަޑައިގަންނަވާ ފޮޓޯފުޅަކަށް ހުއްޓިވަޑައިގެން. ފޮޓޯ: ކޮންގްރެސް ޕާޓީ

ޙަފްލާގައި ކޮންގްރެސް ޕާޓީގެ ފަރާތުން މާލޭ ސިޓީގެ މޭޔަރުކަމުގެ މަޤާމަށް ވާދަކުރައް މޫސާ ޢަލީ ޖަލީލް އާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ރައީސާ ކަމަށް ވާދަކުރައްވާ އަލްއުސްތާޛާ އާޝިޔަތު އަލައިކާ އަދުނާންގެ އިތުރުން ހެންވޭރު އުތުރު ދާއިރާގެ ކެންޑިޑޭޓުން ވެސް ބައިވެރިވެވަޑައިގެންނެވި.

ޖަގަހަ ހުޅުުވުމުގެ ޙަފްލާގައި ފަސްޓް ލޭޑީ ސާޖިދާ މުޙައްމަދު ދޮށީ އުމުރުގެ މީހަކާ ސަލާންކުރައްވަނީ. ފޮޓޯ: ކޮންގްރެސް ޕާޓީ

އަންނަ އޭޕްރީލް މަހުގެ ހަތަރުވަނަ ދުވަހު ބޭއްވުމަށް ހަމަޖެހިފައިވާ ކައުންސިލް އިންތިޚާބަށް އެންމެ ގިނަ ކެންޑިޑޭޓުން ނެރެނީ ކޮންގްރެސް ޕާޓީންނެވެ. އެ ޕާޓީން ދަނީ މުޅި ރާއްޖޭގައި ޚާއްސަކޮށް ވެރިރަށް, މާލޭގައި ވަަރަށް ފުޅާ ދާއިރާއެއްގައި ކެމްޕެއިން ހިންގަމުން.