ޕީޕަލްސް ނޭޝަނަލް ކޮންގްރެސް (ކޮންގްރެސް ޕާޓީ) ގެ މައްޗަންގޮޅި އުތުރު ދޮރުން ދޮރަށް ހަރަކާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވަޑައިގަންނަވައިފި. 

މި ހަރަކާތް ފެށީ 04 މާރިޗު 2026 ވަނަ ދުވަހުގެ މެންދުރު ފަހު 1:30 ގަ. ހަރަކާތް ފެށީ މަޖީދީމަގު، ދަނބުރުއްމަގު ކަންމަތިން މާލޭ ގްރޭންޑް ކައިރިން.

މި ހަރަކާތުގައި ރައީސުލްޖުމްހޫރިއްޔާގެ އަރިހުގައި، މާލޭ ސިޓީގެ މޭޔަރުކަމަށް ވާދަކުރައްވާ މޫސާ ޢަލީ ޖަލީލާއި އަންެހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި މާލޭ ސިޓީގެ ރައީސްކަމަށް ވާދަކުރައްވާ އަލްއުސްތާޛާ ޢާއިޝަތު އަލައިކާ އަދުދާން ވަނީ ބައިވެރިވެވަޑައިގެންފަ. 

ކޮންގްރެސް ޕާޓީގެ ފަރާތުން މަންޗަންގޮޅި އުތުރު ދާއިރާއަށް ވާދަކުރައްވާ ސިޓީ ކައުންސިލް ކެންޑިޑޭޓް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ކެންޑިޑޭޓް ވެސް ވަނީ މި ހަރަކާތުގައި ބައިވެރިވަޑައިގެންފަ. 

ޕާޓީގެ ލީޑަރޝިޕްގެ އިސް ބޭފުޅުންގެ އިތުރުން، ބައެއް ވަޒީރުން ވެސް މި ހަރަކާތުގައި ބައިވެރިވަޑައިގެންނެވި. 

މަންޗަންގޮޅި އުތުރު ދޮރުން ދޮރަށް ހަރަކާތުގައި ވެސް ކެންޑިޑޭޓުންނާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ބައެއް ގޭގެއަށް ޒިޔާރަތްކުރައްވައި އާއިލާތަކުގެ މެންބަރުންނާއެކު ވަގުތުހޭދަކުރައްވާފަ. އަދި، މަގުމަތިން ބައެއް އާއްމު ރައްޔިތުންނާ ބައްދަލުކުރައްވައި އެ ރައްޔިތުންގެ އަޑުއެއްސެވުމުގައި ވަގުތު ހޭދަކުރައްވާފައިވޭ.