އިސްރާއީލާއި އެމެރިކާއިން އީރާނާ ދެކޮޅަށް ފެށި އުދުވާނީ ހަނގުރާމަ ކުރިއަށް އޮތް ހަތަރު ފަސް ހަފުތާއަށް ދެމިގެންދާނެ ކަމުގައި އެމެރިކާގެ ރައީސް ޑޮނާލްޑު ޓުރަމްޕު ވިދާޅުވެއްޖެއެވެ. 

އީރާނަށް ދިން އުދުވާނީ ހަމަލާގެ ރައްދުގައި އީރާނާ އެ ގައުމާ ގުޅިފައިވާ ހަނގުރާމަވެރި ޖަމާއަތްތަކުގެ ވިއުގައިން މެދުއިރުމަތީގައި ހުރި އެމެރިކާގެ އެސެޓުތަކަށާއި އަސްކަރީ މަރުކަޒުތަކުގެ އިތުރަށް، އިސްރާއީލަށް އަމާޒުކޮށް ވަރުގަދަ ހަމަލާތެއް ދީފައިވެއެވެ. އޭގެ ތެރޭގައި ގަތަރުގެ ހަކަތައާ ގުޅޭ މަރުކަޒަކާއި ސައުދީ އަރަބިއްޔާގަައި ހުންނަ އެމެރިކާގެ އެމްބަސީ ހިމެނެއެވެ. 

އެމެރިކާއިން ދިން ހަމަލާތަކުގެ ގަދަފަދަކަމާއި، އެ ހަމަލާތަކުގައި އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަވުމާއި އެ ހަމަލާތައް ހުއްޓާލައި ހަނގުރާމައިން ނުކުންނާނެ ގޮތާމެދު ސާފު ޕްލޭނެއް އެކުލަވައިލެވި އާއްމުކުރެވިފައިނުވުމާއެކު ދިގުދެމިގެންދަނިވި މުޅި ދުނިޔެއަށް އެއިން އަސަރުކުރާނެ ހަނގުރާމައަކަށް މަސްރަހު މިހާރުވަނީ ތައްޔާރުވެފައެވެ. 

މެދުއިރުމަތީގައި ރައްކާތެރި މަންޒިލުތައް ކަމުގައި ކުރިއްސުރެ ގަބޫލުކުރެވެމުންއައި ދުބާއީ ފަދަ ސަރަހައްދުތަކަށް އީރާނުގެ ހަމަލާތައް އަމާޒުވެ އެ ސިޓީތަކުގެ މުހިއްމު ސަރަހައްދުތަކުން އަލިފާނުގެ އަސަރު ފެނިފައިވާއިރު، ހަކަތައިގެ އަގު އުފުލިފައިވެއެވެ. 

ޓުރަމްޕު ވިދާޅުވީ އޮޕަރޭޝަންތައް ހަތަރު ފަސް ހަފުތާއަށް ދެމިގެންދިއުން އެކަށީގެންވާ ކަމަށާއި، ފަހަރުގައި ހަނގުރާމަ އެއަށްވުރެ ދިގުލައިގެން ދިއުމަކީ އެކަށީގެންވާ ކަމެއް ކަމަށެވެ. 

އެމެރިކާގެ ސްޓޭޓު ޑިޕާޓުމެންޓުންވަނީ މެދުއިރުމަތީގެ ގިނަ އަދަދެއްގެ ގައުމުތަކުގައި ދިރިއުޅޭ އެމެރިކާ ރައްޔިތުން ވީހާވެސް އަވަހަށް އެ ގައުމުތައް ދޫކޮށް އެމެރިކާއަށް އަނބުރާ އައުމަށް އެދިފައިވެއެވެ.

ޓުރަމްޕު ވިދާޅުވި ގޮތުގައި އެމެރިކާގެ އަސްކަރީ ކެމްޕެއިނުގެ އަމާޒަކީ އީރާނުގެ މިސައިލުތައް ނެތިކޮށްލައި، އީރާނުގެ ކަނޑުގެ އަސްކަރިއްޔާ ސުންނާފަތިކޮށް، އެ ގައުމަށް ނިއުކުލިއާ ހަތިޔާރެއް ނުލިބޭނެކަން ކަށަވަރުކުރުމާއެކު، މެދުއިރުމަތީގެ އެކި ގައުމުތަކުގައި އީރާނުން މަދަދުވެރިވަމުންދާ ހަތިޔާރު އެޅި ޖަމާއަތްތަކަށް މަދަދުވެރިނުވެވޭނެ ގޮތަށް އީރާން ބަލިކޮށިކޮށްލުން ކަމަށެވެ.