ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބަށް ސިނާއި ސަރަހައްދުތަކާއި ރާއްޖެއިން ބޭރު އެއްވެސް ތަނެއްގައި ވޯޓު ފޮށި ނުބަހައްޓާނެ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.

އެ ކޮމިޝަނުން މި ނިންމުން ނިންމީ ވޯޓުލުމަށް ހަމަޖެހިފައިވާ ވޯޓު ފޮށި އެހެން ތަނަކަށް ބަދަލު ކުރުމަށް ބަދަލު ކުރުމަށް ރީރަޖިސްޓަރ ވުމަށް ހުޅުވާލުމުންވެސް އެކަށީގެންވާ ވަރަށް މީހުން ރަޖިސްޓަރީ ވެފައި ނުވާތީ އެވެ.

ސިނާއީ ސަރަހައްދުގައި ވޯޓުލުމަށް ރަޖިސްޓަރީ ވެފައިވަނީ އެންމެ 11 މީހުންނެވެ. ރާއްޖެއިން ބޭރުގެ ފޮށިތަކުގެ ތެރެއިން މެލޭޝިއާގައި ވޯޓުލުމަށް ރަޖިސްޓަރީ ވެފައިވަނީ 499 މީހުންނެވެ. އަދި ސްރީލަންކާގައި 189 މީހުންނެވެ.

އިލެކްޝަން ކޮމިޝަނުން ބުނީ އިންތިހާބުގައި 29 ރިސޯޓެއްގައި އަދި ސިނާއި 3 ސަރަހައްދެއްގައި (ހުޅުލެ، ތިލަފުށި، ގދ.ކާޑެއްދޫ) ވޯޓުފޮށި ނުބަހައްޓާނެ ކަމަށެވެ.

އެ ތަންތަނުގައި ދިރިއުޅޭ އަދި މަސައްކަތް ކުރާ ދިވެހިން ވޯޓުލާން ރަޖިސްޓަރީ ވެފައިވާ ތަން ނޫން އެހެން ތަނެއްގައި ވޮޓުލުމަށްޓަކައި، ރަޖިސްޓަރީ ކުރުމަށް މުއްދަތެއް ދޭނެކަމަށް އިލެކްޝަންސް ކޮމިޝަނުނެ ބުނިއެވެ. އަދި އެ މުއްދަތުގައި ރަޖިސްޓަރީ ބަދަލު ނުކޮށްފިނަމަ އެ ފަރާތްތަކަށް ވޯޓު ލެވޭނީ ރަށްވެހިވެފައިވާ ރަށުގައިކަމަށް އެ ކޮމިޝަނުން ބުންޏެވެ.

އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓުދިނުމަށް 26454 މީހަކު ރީ ރަޖިސްޓްރީވެފައިވެއެވެ.