ނިމިދިޔަ އެމްޑީޕީގެ ވެރިކަންތަކުގައި މިސްކިތްތަކަށް ގެއްލުން ދޭ މީހުންނަށް ހައްގު އަދަބު ނުދީ މުޖުތަމައުގެ ތެރެއަށް ދޫކޮށްލީ އެ ޕާޓީގެ ލާދީނީ ސިޔާސަތުތަކުގެ ތެރެއިންކަމަށް ބާރަށު ދާއިރާގެ މެމްބަރު އިބްރާހީމް ޝުޖާއު ވިދާޅުވެއްޖެއެވެ.

ޝުޖާއު މިފަދައިން ވިދާޅުވީ މިސްކިތްތަކަށް ގެއްލުން ދިނުމަކީ ޓެރަރިޒަމްގެ ކުށެއް ކަމަށް ކަނޑައެޅުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި ޓެރަރިޒަމް މަނާކުރުމުގެ ގާނޫނަށް އިސްލާހު ގެނައުމުގެ ބިލާ ގުޅޭގޮތުން ވާހަކަފުޅު ދައްކަވަމުންނެވެ.

މިސްކިތްތަކަށް ގެއްލުން ދޭ މީހުންނަށް ހަރުކަށި އަދަބުތައް ދިނުމަކީ ޕީއެންސީން ތާއީދުކުރާ ކަމެއްކަމަށް މެމްބަރު ވިދާޅުވިއެވެ.

މިސްކިތްތަކަށް ގެއްލުން ދިނުމުގެ މައްސަލަތައް އެމްޑީޕީގެ ވެރިކަންތަކުގައި ފެންމަތިވަމުން އައިސްފައިވާ މިންވަރު އިތުރުކަމަށާއި އަދި ނިމިދިޔަ އެމްޑީޕީގެ ވެރިމުގައި މިސްކިތްތަކަށް ގެއްލުން ދިނުން ރެކޯޑު މިންވަރަކަށް އިތުރުވިކަމަށް މެމްބަރު ވިދާޅުވިއެވެ.

ޕީއެންސީއަކީ މިފަދަ ކަންކަމާ ދެކޮޅު ޕާޓީއެއްކަން ހާމަކުރައްވައި މެމްބަރު ވިދާޅުވީ މާލޭ ސިޓީ ކައުންސިލް ޕީއެންސީއަށް ލިބިގެން ދިއުމާއިއެކު މިސްކިތްތަކަށް ގެއްލުންދޭ މީހުން ދެނެގަތުމަށްޓަކައި މިސްކިތްތަކުގައި ސީސީޓީވީ ހަރުކޮށް ބަލަހައްޓަން ފެށުނުކަމަށެވެ.  

މިއާ ހިލާފަށް މިސްކިތްތަކަށް ގެއްލުން ދޭޭ މީހުން އެމްޑީޕީގެ ވެރިކަންތަކުގައި ހައްޔަރުކުރި ނަމަވެސް އެކަށީގެންވާ އަދަބެއް ނުދީ މުޖުތަމައުގެ ތެރެއަށް ދޫކޮށްލާ މަންޒަރު ފެނިފައިވާކަމަށް ޝުޖާއު ވިދާާޅުވިއެވެ.

20 ވަނަ ރައްޔިތުންގެ މަޖިލީހަކީ ބޭނުންތެރި މަސައްކަތްތަކެއް ކުރާ މަޖިލީހެއްކަން ފާހަގަކުރައްވަމުން ޝުޖާއު ވިދާޅުވީ ވާދަވެރިންވެސް ރަނގަޅުކަމެއް ކޮށްފިނަމަ ބަލައިގަންނާނެކަމަށެވެ.