އެހެން މީހަކު ސަރުކާރު ޖަވާބުދާރީ ކުރުވަންދެން އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޑު ނުކުރައްވާނެކަމަށް ރައީސް އޮފީހުގެ ވަޒީރު އަލީ އާރިފް ވިދާޅުވެއްޖެއެވެ. 

ސަރުކާރު ޖަވާބުދާރީ ކުރުވުމަށް ކުރިއަށް އޮތް ލޯކަލް ކައުންސިލް އިންތިހާބުގައި އެމްޑީޕީއަށް ވޯޓު ދިނުމަށް ތަކުރާރުކޮށް އެ ޕާޓީގެ އިސް ވެރިން ގޮވާލަމުން އަންނަ ދަނޑިވަޅެއްގައި އެކްސްގައި ކުރެއްވި ޕޯސްޓެއްގައި އަލީ އާރިފް ވިދާޅުވީ ސަރުކާރު ޖަވާބުދާރީ ކުރުވުމުގެ މަސައްކަތް އެހެން ބަޔަކު ކުރައްވަން ރައީސް މުއިއްޒު މަޑު ނުކުރައްވާކަމަށެވެ. 

އެމަނިކުފާނު ގެންދަވަނީ ދައުލަތުގެ ވަޒީރުންނާއި، ކުންފުނިތަކުގެ ވެރިންނާއެކު ރާއްޖޭގެ ހުރިހާ ރައްޔިތުންގެ ގާތަށް ސީދާ އެމަނިކުފާނު ވަޑައިގެން އަމިއްލަފުޅަށް ސަރުކާރު ޖަވާބުދާރީ ކުރުވަމުން ކަމަށް އަލީ އާރިފް ވިދާޅުވިއެވެ.

އެމްޑީޕީގެ މި ވާހަކަތަކަށް މީގެ ކުރިން ރައީސް މުއިއްޒު ވެސް ވަނި ރައްދު ދެއްވާފައެވެ. އެގޮތުން ކައުންސިލުތައް އިންތިޚާބުކުރަނީ ސަރުކާރު ޖަވާބުދާރީކުރުވުމަށް ކަމަށް ބުނާ ބުނުމަކީ ގޯހެއްކަމަށް އެމަނިކުފާނު ވަނީ ވިދާޅުވެފައެވެ. 

ރައީސް ވިދާޅުވީ ތިން ބާރު ވަކިވެފައިވާއިރު، ކައުންސިލުތަކަކީ، ވެރިކަން ހިންގުމުގެ ބާރުގެ ތެރޭގައި ހިމެނޭ ފަށަލައެއް ކަމަށެވެ. އަދި ކައުންސިލް އިންތިޚާބުގައި، ސަރުކާރު ޖަވާބުދާރީކުރުވުމުގެ މަޤްޞަދުގައި ބަޔަކު އިންތިޚާބުކުރެވިއްޖެނަމަ، އެ ރަށެއް ނުވަތަ އެ ސިޓީއެއްގައި ހިނގާނީ މުނިސިޕަލް އަދި ތަރައްޤީގެ މަސައްކަތުގެ ބަދަލުގައި ސިޔާސީ މަސައްކަތްތައްކަން އާރިފް ފާހަގަކުރެއްވިއެވެ.