ޙާފިޒުން އިމްތިޙާން ކުރާ ކޮމިޓީއެއް ޅ. އަތޮޅުގައި ވެސް އެކުލަވާލައްވާނެ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސައީދު ވިދާޅުވެއްޖެއެވެ.

ފޭސްބުކުގައި އެމަނިކުފާނު ލިޔުއްވާފައިވާ ގޮތުގައި، މާލެއާއި އައްޑޫ ސިޓީއާއި ފުވައްމުލަކުގެ އިތުރުން ދެން އެންމެ ގިނައިން ޙާފިޒުން އުފެދެމުން އަންނަނީ ނައިފަރުގައި ކަމަށެވެ. ވުމާއެކު، މަސައްކަތް ކުރަމުންދަނީ ޙާފިޒުން އިމްތިޙާން ކުރާ ކޮމިޓީއެއް ޅ. އަތޮޅުގައި ވެސް އެކުލަވާލުމަށްކަމަށް ވަޒީރު ވިދާޅުވިއެވެ. ވަޒީރު ވިދާޅުވީ އެކަން ކުރައްވަނީ، ދަރިވަރުން އިމްތިހާނަށް މާލެ އައިސް ގިނަ ދުވަސްތަކެއް ވަންދެން ތިބެން ޖެހޭ ޖެހުމަށް ލުޔެއް ހޯދައި ދިނުމަށްޓަކައި ކަމަށެވެ.

ވަޒީރު ވިދާޅުވީ، ރާއްޖޭގައި ހަދާ ޙާފިޒުކަމުގެ އިމްތިހާނަކީ ވަރަށް އިތުބާރު ހުރި ގޮތަކަށް ކުރިއަށް ގެންދެވޭ އިމްތިޙާނެއް ކަމަށާއި ޙާފިޒުން އިމްތިހާން ކުރާ ކޮމިޓީތަކުގައި މެންބަރުންނަށް ތިއްބަވަނީ ތަޖުރިބާކާރު ޙާފިޒުން ކަމަށެވެ.

ދަރިވަރުގެ އިމްތިޙާން ކުރިއަށްދާ ގޮތަކީ ކޮންމެ ދުވަހަކު މަދުވެގެން އެއް ފޮތް ހިތުން ކިޔައިދީ މުޅި ޤުރުއާން އެއްކޮށް ހިތުން ކިޔައިދީ ނިންމުން ކަމަށާއި ބައެއް ދަރިވަރުން ދެ ފޮތް ވެސް ކިޔައިދޭއިރު، ކިޔައިދޭ މިންވަރު ދަރިވަރުގެ ޙާލަތަށް ބަލައި ޤުރުއާން މަރުކަޒުން ކަނޑައަޅާ ކަމަށް ވިދާޅުވިއެވެ.

މާލޭގެ ދެ މަރުކަޒެއްގައި އިމްތިހާން ކޮމިޓީ ކަނޑައެޅިފައި އޮވެއެވެ. އެއީ ކީރިތި ޤުރުއާނާ ބެހޭ މަރުކަޒާއި އިސްލާމީ ޔުނިވަރސިޓީއެވެ. އޭގެ އިތުރުން ފުވައްމުލައް ސިޓީއާއި އައްޑޫ ސިޓީގައި ވެސް ކޮމިޓީއެއް ކަނޑައެޅިފައި އޮވެއެވެ.

ޝަހީމް އިތުރަށް ވިދާޅުވި ގޮތުގައި މިއަހަރު ޙާފިޒުން ދަސްވެނިވުމުގެ ޝަރަފްވެރި ޙަފްލާގެ އެންމެހައި ކަންކަމެއް ވަނީ ފުރިހަމަ ކުރެވިފައެވެ. އަދި މި އަހަރު އަލަށް 31 ޙާފިޒުން ދަސްވެނިވާނެކަމަށް ވިދާޅުވިއެވެ.

ރާއްޖޭގައި ޙާފިޒުންގެ އަދަދު އިތުރުކުރަން ސަރުކާރުން އިސްކަމެއްގެ ގޮތުން ހާފިޒުންގެ އެލަވަންސް 2000 ރުފިޔާއިން 4000 ރުފިޔާއަށް ވަނީ ބޮޑުކޮށްފައެވެ.