އެކްސިޑެންޓަކުން މުޅިދުނިޔޭގެ ސަމާލުކަން ލިބޭ ވަރުގެ ފަތުރުވެރިންގެ މަންޒިލެއް އުފެދުމަކީ އާދައިގެ ކަމެއް ނޫނެވެ. ނަމަވެސް މީގެ ފަންސާހަކަށް އަހަރު ކުރިން ތުރްކުމެނިސްތާނުގައި ވަނީ މިކަހަލަ އާދަޔާ ހިލާފު ކަމެއް ހިނގާފައެވެ.

ނަވާރަސަތޭކަ ހަތްދިހައިގެ އަހަރުތަކުގެ ތެރޭގައި ރޫސީވިލާތުގެ ދިރާސާކުރާ ފަރާތްތަކުން ގުދުރަތީ ގޭސް ހޯދުމުގެ ބޭނުމުގައި، ތުރްކުމެނިސްތާނުގެ ކަރަކުމް ސަހަރާގެ އެކިއެކި ސަރަހައްދުތައް ކޮނުމުގެ ތެރޭގައި ދިމާވި އެކްސިޑެންޓަކުން ވަނީ 70 މީޓަރު ފުޅާ، ފުންމިނުގައި 20 މީޓަރު ހުންނަ ވަޅުގަނޑެއް އުފެދިފައެވެ.

މިވަޅުގަނޑުގައި އާދަޔާ ހިލާފު ގިނަ މިންވަރަކަށް ނުރައްކާ ގޭސް ހުރުމުގެ ސަބަބުން، ގޭސްތައް ފެތުރިދާނެ ކަމުގެ ބިރަށް ސައިންޓިސްޓުން ވަނީ އެވަޅުގަނޑުގައި އަލިފާންގަނޑެއް ރޯކޮއްފައެވެ. އަލިފާންގަނޑު ރޯކުރުމުގެ ކުރިން ހީވެފައި އޮތީ ހަފްތާއެއްހާ ދުވަސްތެރޭ އެތަނުގައި އެކުލެވިގެންވާ ހުޅުހިފާ ނުރައްކާ ގޭސްތައް ހުސްވެގެން އަލިފާންގަނޑު ނިވޭނެ ކަމަށެވެ.

ނަމަވެސް ޑަރްވާޒާ ގެ ނަމުން ނަން ދެވިފައިވާ މި ވަޅުގަނޑު، އޭގެ ފަންސާހައްވުރެ ގިނަ އަހަރު ފަހުން މިއަދު ވެސް ދަނީ ހުއްޓުމެއް ނެތި އަނދަމުންނެވެ. ޑަރްވާޒާ މިނަން ދެވިފައި ވަނީ މި ވަޅުގަނޑާ ކައިރި ޑަރްވާޒާ އޭކިޔުނު އަވަށަށް ނިސްބަތްކޮށެވެ. މި ވަޅުގަނޑަށް ކިޔާ އިތުރު ނަންތަކުގެ ތެރޭގައި "ގޭޓްސްް އޮފް ހެލް" އަދި "ޝައިނިން އޮފް ކަރަކުމް" ހިމެނެއެވެ.

މިހާތަނަށް މި ވަޅުގަނޑުގެ އެންމެ އަޑިޔަށް ފައިބައިފައިވާ ހަމައެކަނި އިންސާނަކީ ކެނެޑާގެ ދިރާސާ ކުރާ މީހެއް ކަމަށްވާ ޖޯޖް ކުރޯނިސް އެވެ. އޭނާ މި ވަޅުގަނޑުގެ އަޑިޔަށް ފައިބައިފައިވަނީ އެކަމަށް ހާއްސަކޮށް ތައްޔާރު ކޮށްފައިވާ ހެދުމެއްގައި ހާއްސަ އާލާތްތަކެއް ބޭނުން ކޮށްގެންނެވެ.

 ޖޯޖް ކުރޯނިސް މައުލޫމާތު ދިން ގޮތުގައި، މި ވަޅުގަނޑުގައި ގިނަ އަދަދަކަށް މީތެން ގޭސް އެކުލެވިގެންވެއެވެ. އަދި ވަޅުގަނޑުގެ އެތެރޭގައި ހުންނައިރު އިވޭ އަޑަކީ ޕްރެޝަރުގައި އަލިފާން ފަރުބަދައެއް ގޮވާ ކަހަލަ އަޑެއް ކަމަށާއި، މީގެ އިތުރުން މި ސަރަހައްދުން ނެގުނު ސާމްޕަލްތަކަށް ބިނާކޮށް، މިއީ ގުދުރަތީ ގޭހުން މުއްސަނދި ސަރަހައްދެއް ކަމަށް ވެސް ކުރޯނިސް ބުނެފައި ވެއެވެ.

މިހާރު މި ސަރަހައްދު ވެފައި ވަނީ އަހަރަކު އެތަކެއް ހާސް ފަތުރުވެރިން ޒިޔާރަތްކުރާ މަގުބޫލު މަންޒިލަކަށެވެ. ޚާއްސަކޮށް ރޭގަނޑުގެ ވަގުތު ތަކުގައި ސަހަރާ ތެރެއިން އެތަކެެއް މޭލު ދުރަށްވެސް ފެންނަ ޑަރްވާޒާގެ މަންޒަރު ތަކަކީ ޝައުގުވެރި މަންޒަރު ތަކެކެވެ.

ދެހާސް ނަވާރަ ވަނަ އަހަރުގެ ރިޔާސީ އިންތިހާބުގެ ކެމްޕެއިންެ ތެރޭގައި ތުރްކުމެނިސްތާނުގެ ކުރީގެ ރައީސް އަވަހާރަވި ކަމުގެ ދޮގު ޚަބަރު އިދިކޮޅު ފަރާތް ތަކުން ފެތުރުމުން، އެ ޚަބަރު ދޮގު ކުރުމަށް އެ ބޭފުޅާ ވަނީ ޑަރްވާޒާ ގެ ވަށައިގެން ކާރު ދުއްވާ ވީޑިޔޯއެއް މީސް މީޑިޔާއަށް ދޫކޮށްލާފައެވެ. މި ވީޑިއޯއަށް މީސް މީޑިޔާގައި ދުނިޔޭގެ އެކި ކަންކޮޅު ތަކުގައި ވަރަށް ގިނަ ބައެއްގެ ތަރުހީބު ލިބިފައިވެއެވެ.