މާފަންނު މަދަރުސާއަށް 40 އަހަރު ފުރުން ފާހަގަކުރުމުގެ ގޮތުން އިއްޔެ ބޭއްވި ޚާއްޞަ ޙަފްލާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިތުރުން ސަރުކާރުގެ އިސް ބޭފުޅުންނާއި، ދަރިވަރުންނާއި، ބެލެނިވެރިން ބައިވެރިވެވަޑައިގެންނެވިއެވެ. މި ޙަފްލާގައި އެންމެންގެ ސަމާލުކަން ހޯދީ އުމުރުން ފަސް އަހަރުގެ ތުއްތު،  ޝާޢިމް ޝާހިދު އާއި ޢަދުލް އިސްމާޢީލް މުޙްތަބް، ދެއްކި ވާހަކައިންނެވެ.

އެއްވެސް ނޯޓަކަށް ނުބަލައި، ޝާޢިމް ވާހަކަދެއްކި ގޮތުން އެކުދިންގެ ޤާބިލުކަމާއި ހިތްވަރު ފާހަގަކުރެވުނެވެ. އެކުދިންގެ ކުޅަދާނަ ވާހަކަދެއްކުމުގެ ހުނަރާއި ވާހަކަ ކިޔައިދިނުމުގެ ހުނަރު ފެނި، ރައީސް މުޢިއްޒު ވެސް ހިނިތުންވެވަޑައިގެން ނުހަނު ޝައުގުވެރިކަމާއިއެކު އަޑުއެއްސެވިއެވެ. ޝާޢިމްގެ ބަސްތައް ހިތްގައިމުވުމުގެ އިތުރުން މާނަވެސް ފުންމެއެވެ.

ހަމްދު ސަލަވާތުގެ ރީތި ޅެމަކުން ޙާޒިރީންނަށް މަރުހަބާ ދެންނެވީ ޢަދުލް އިސްމާޢީލް އެވެ. އަދުލްގެ ވާހަކައިން ސްކްރީނުން ލިބޭ ގެއްލުން މަންމަމެނާއި މުދައްރިސުން ކިޔާދެއްވާފައިވާކަން ފާހަގަކޮށް ވާހަކަކޮޅު ފެށުމުގެ ކުރިން ޖަލްސާގެ ބައިވެރިން ފޯނާއި ދުރުވެލާ ވާހަކަ ކޮޅަށް ސަމާލުކަން ދިނުމަށް ނުހަނު އަދަބުވެރިކަމާއި އެކު އެދުނެވެ.

އަދުލްގެ ވާހަކަ ދެއްކުމުގައި ފަރިތަކަމާއި ކެރުންތެރިކަން ހުއްޓެވެ. އެއްޗެއް ބަލައިގެން ކީނަމަވެސް އަދުލްގެ އުމުރާއި ބަލާފައި ހުށައަޅައިދިނުން އެއަށްވުރެއް މާފުރިހަމައެވެ.

ޖަލްސާގެ މަރުހަބާ ދެންނެވުން ކުރިއަށް ގެންދިއުމަށް ދެން ވާހަކަ ދެއްކީ ޝާޢިމް އެވެ. އެއްވެސް އެއްޗެއް ނުބަލާ ފަރިތަކަމާއި އެކު ވާހަކަ ދައްކައި އޯޑިއަންސަށް ދިން މެސެޖްތަކަށް ގިނަ ބަޔަކު ތަޢުރީފްކުރިއެވެ. ދިވެހި ބަހަށް ފަރިތަކަމާއި ވާހަކަ ކުރިއަށް ގެންދިޔައިރު އޯޑިއަންސަށް ބަލަހައްޓައިގެން ހުރެ އޭނާގެ ހިނިތުންވުން ގެއްލުވައި ނުލައި ވާހަކަ ކުރިއަށް ގެންދިޔަ ގޮތުން އޯޑިއަންސްގެ ސަމާލުކަން ހުއްޓުނެވެ.

ޝާއިމްގެ މަޢުސޫމް ތުއްތު ބަސްތަކުގެ ސަބަބުން ޖަލްސާގެ އެންމެހާ ހާޒިރީންގެ މޫނުމަތިން ހިނިތުންވުން ފަނޑުނުވެ ހުއްޓެވެ. ރައީސް މުޢިއްޒުގެ މޫނުމަތިންވެސް އުފާވެރިކަމާއި ހިނިތުންވުން ފާޅުވިއެެވެ.

ޝައިމް ވަރަށް އިޙްސާސްތަކާއެކު ވާހަކަދައްކަމުން، ސްކޫލުގެ ޙަފްލާތަކަށް އުމުރުން ދުވަސްވީ މާމަ މެނާއި ކާފަމެެން ޙާޟިރުވުމުގައި ދިމާވާ ދަތިތަކާ ބެހޭގޮތުން ވާހަކަދެއްކިއެވެ. ސްކޫލަށް ދިމާވާ ދަތިކަން ހާމަކޮށްދިނީ ނުހަނު އިޙްލާސްތެރިކަމާއި އެކުއެވެ.

ސްކޫލް ހޯލް ތިންވަނަ ފަންގިފިލާގައި ހުރުމުން ސްކޫލަށް ދިމާވެފައިވާ ދަތިކަން ޝައިމް ހިއްސާކުރީ ފަރިތަކަމާއި ޤާބިލްކަމާއި އެކުގައެވެ. ޙާޟިރީންގެ މޫނުމަތިން ހިނިތުންވުމާއި ޝައިމްއަށް އެއްބަސްވާތަން ފެނުނެވެ. ކުޑަކުއްޖާގެ ވިސްނުންތެރި އެދުމުން އެންމެން ޝުޢޫރުވެރިވިއެވެ. ރައީސް މުޢިއްޒުގެ މޫނުފުޅުމަތިން އަދި އިތުރަށް އުފާވެރިކަން ފެނުނެވެ.

މިހަފްލާގައި ރައީސް ވާހަކަފުޅު ދައްކަވަމުން، ކުޑަކުޑަ ޝައިމްގެ ބަސްތަކަށް އިޝާރާތްކުރައްވައި، އިސްރަށްވެހިންނަށްވެސް ފަސޭހައިން ބޭނުން ހިފޭ ފަދަ ގޮތަކަށް، 2025 ވަނަ އަހަރުގެ ތެރޭގައި، އެ ސްކޫލުގެ ގްރައުންޑް ފްލޯރގައި، ހޯލެއް ތަރައްޤީކޮށްދެއްވާނެ ކަމުގެ ޔަޤީންކަން ދެއްވިއެވެ.

އަދި މާތްވެގެންވާ އިސްލާމް ދީނުގެ ވަރުގަދަ ޢަޤީދާގެ މަތީގައި ތިބި، ދިވެހި ޤައުމު ދެކެ ލޯބިވާ، ޤައުމިއްޔަތުގެ ރޫޙު ފުރިހަމައަށް އަށަގެންފައިވާ، ޤައުމުގެ މުސްތަޤުބަލާ ޙަވާލުވެވޭނެ ފަދަ ޒިންމާދާރު، ލޮބުވެތި ދިވެހި ދަރިންތަކެއް ބިނާ ކުރުމަށް އެންމެން އެކުގައި، އެއް ރޫޙެއްގައި، ޤައުމީ ވިސްނުމެއްގައި މަސައްކަތް ކުރެއްވުމަށް ޢަޒުމު ކަނޑައެޅުއްވުމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިލްތިމާސް ކުރެއްވިއެވެ.

މާފަންނު މަދަރުސާގެ ތަރައްޤީއަށްޓަކައި އެ ސްކޫލުން ސަރުކާރުގައި އެދޭ ކޮންމެ ކަމެއް، ކުރިއަށް އޮތް ތަނުގައިވެސް ކޮށްދެއްވަމުން ގެންދަވާނެ ކަމުގައި ވިދާޅުވެ، ވާހަކަފުޅުކުރިއަށް ގެންދަވަމުން ރައީސުލްޖުމްހޫރިއްޔާ ވަނީ، މާފަންނު މަދުރަސާ ބެލެހެއްޓުންތެރި ފަރާތުގެ ގޮތުގައި މި ވަގުތު އޮތް މާލޭ ސިޓީ ކައުންސިލުން ވެސް ސަރުކާރާ ގުޅިގެން، ސްކޫލުން އެދޭ ކަންކަން ފުރިހަމަކޮށްދެއްވުމަށް ގޮވާލައްވާފައެވެ.

ހަމައެހެންމެ ޚާއްޞަ އެހީއަށް ބޭނުންވާ ދަރިވަރުންނަކީ އެހެން ކުދިންނެކޭ އެއްފަދައިން، ސްކޫލު މާޙައުލުގައި ޝާމިލުވާ ދަރިވަރުން ކަމުގައި ކަށަވަރު ކުރުމަށްޓަކައި، އެ ރޮނގުން މުދައްރިސުން ބިނާކޮށް، ތަމްރީނު ދިނުމުގެ މަސައްކަތްތައް ވެސް ކުރިއަށް އޮތް 2025 ވަނަ އަހަރުގެ ތެރޭގައި އިތުރަށް ފުޅާވެގެންދާނެ ކަމުގެ ޔަޤީންކަން، ރައީސުލްޖުމްހޫރިއްޔާ ވަނީ ދެއްވާފައެވެ.

މި ޙަފްލާ ވެގެން ދިޔައީ ހަމައެކަނި ސްކޫލުގެ ކާމިޔާބީތައް ފާހަގަކުރުމުގެ ޙަފްލާއަކަށް ނޫނެވެ. އޭގެ ބަދަލުގައި ހުރިހާ އެންމެން ހިމެނޭ ގޮތަށް އަދި މުޖުތަމަޢުގެ އަގުތައް ދަމަހައްޓާ ގައުމުގެ މުސްތަޤްބަލްގެ އަންނަންއޮތް ޖީލުތަކުގެ ބާރުގަދަކަން ދައްކުވައިދިން ޙަފްލާއެކެވެ. ބެލެނިވެރިންނާއި، މުދައްރިސުންނާއި އަދި މެހުމާނުން ފަޚުރުވެރިކަމުގެ އިހުސާސް ގެނެސްދިނެވެ. ޝާޢިމް އަދި ޢަދުލް ފަދަ ކުދިންގެ އަތްމަތީގައި މުސްތަޤުބަލު އޮތްކަން އެނގި ހިތްހަމަޖެހުނެވެ.

އިލްހާމް ލިއްބައިދިން މި ވަގުތުކޮޅުން އެންމެންނަށް ހަނދާންކޮށްދިނީ ކޮންމެ އުމުރެއްގެ މީހެއްކަމުގައި ވީނަމަވެސް ހިތުގެ އަޑިން އަދި ޔަޤީންކަމާއެކު ދައްކާ ވާހަކަތަކުން، މުހިންމު ބަދަލުތައް ގެނެވިދާނެކަމެވެ. އަދި ރައްޔިތުންގެ ބޮޑު ކުޑަމިނެއް ނުބަލާ ހަމަހަމަކަމާއި އެކު ރައީސް މުޢިއްޒު ހުންނެވީ ރައްޔިތުންނާއި އެކު ރައްޔިތުންގެ ފަޅީގައި ކަން ހާމަވިއެވެ.

މި ޙަފްލާގައި ފެނުނު މަންޒަރުތަކަކީ ޤައުމުގެ މުސްތަޤުބަލާ މެދު އުންމީދު އާކޮށްދިން ކަމެކެވެ. ކުރިމަގުގެ ލީޑަރުންނާއި ވިސްނުންތެރިންގެ ގޮތުގައި މިފަދަ ހުނަރުވެރި އަދި އޯގާތެރި ޖީލެއް އުފެދެމުންދާކަން ޔަޤީންވެގެން ދިޔައެވެ. މާފަންނު މަދަރުސާގެ 40 އަހަރުގެ ޖުބައިލީ ފާހަގަކުރި މި ދުވަހަކީ ހަމައެކަނި އެ ސްކޫލުގެ ތާރީޚީ ދުވަހެއް ނޫނެވެ. މިއީ މުޅި ޤައުމުގެ ތަޢުލީމީ ދާއިރާގެ އުޖާލާ މުސްތަޤުބަލުގެ ނިޝާނެއްގެ ގޮތުގައި ފާހަގަކުރެވިގެންދިޔަ ދުވަހެކެވެ.