ތޮއްޑޫގައި ޑޮލަރު އޭޓީއެމްއެއް ޤާއިމުކޮށްދެއްވާނެ ކަމަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުޢިއްޒު، މިއަދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ރައްޔިތުންނާއި ރަށްރަށުގެ ކައުންސިލުތަކާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކާ ބައްދަލުކުރެއްވުމުށް ފައްޓަވާފައިވާ ސިލްސިލާ ދަތުރުފުޅުތަކުގެ ތެރެއިން އއ. ތޮއްޑޫއަށް ވަޑައިގެން އެރަށުގެ ރައްޔިތުންނާ ބައްދަލުކުރެއްވުމަށް ބޭއްވި ޚާއްޞަ ޖަލްސާގައެވެ.

ތޮއްޑުއަކީ ލޯކަލް ޓޫރިޒަމްއަށް ޚާއްޞަ ރަށެއްކަން ފާހަގަކުރައްވައި އެރަށުގައި ތިބެގެން ޑޮލަރު ލިބޭނެ ޖެހޭނެ ކަމަށް ރައީސް ވިދާޅުވިއެވެ. އަދި ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމްތައް ޤާއިމްކުރުމުގެ މަޝްރޫޢު މިހާރު ހިނގަމުންދާ ކަމަށް އެމަނިކުފާނު ވިދާޅުވިއެވެ.

މީގެ އިތުރުން، ރައީސް ވިދާޅުވީ ތޮއްޑޫ ކައުންސިލުގެ ލޯކަލް އޮތޯރިޓީ ކޮމްޕެނީން ރަށުގެ ފުދުންތެރިކަން އިތުރުކުރުމަށްޓަކައި ހިންގާ ހުރިހާ މަޝްރޫއުތަކަށް ފުރިހަމަ އެއްބާރުލުން ސަރުކާރުގެ ތެރެއިން ދެއްވާނެކަމަށެވެ.

ތޮއްޑޫގެ މަގުތައް ހެދުމުގެ މަޝްރުއުގައި މިހާރު ސޮއި ކުރައްވާފައިވާ ކަމަށާއި މި އަންނަ އަހަރު ވެގެންދާނީ އެރަށުގައި މަގު ހެދުމުގެ މަޝްރޫއު ހިނގާނެ އަހަރެއް ކަމުގެ ޔަގީންކަން ރައީސް ދެއްވިއެވެ. މީގެ ސަބަބުން ރަށުގެ އިޤްތިޞާދު ކުރިއަރައިގެން ދާނެކަމަށް ރައީސް ވަނީ ވިދާޅުވެފައެވެ.

ތޮއްޑޫ ސްކޫލާއި ސިއްޙީ މަރުކަޒަށް ޖާގަ އިތުރުކޮށް، ވަސީލަތްތައް އިތުރުކުރުމުގެ މަސައްކަތް ކުރައްވާނެ ކަމަށް ވެސް ރައީސް ވިދާޅުވިއެވެ.