ބޭންކް އޮފް މޯލްޑިވްސް (ބީއެމްއެލް) އިން ސްވައިޕްގެ ރެޖިސްޓްރޭޝަނަށް ހުޅުވާލައިފިއެވެ. 

ބީއެމްއެލްއިން މިއަދު އާއްމުކުރި މީޑިއާ ބަޔާނުގައި ބުނީ، ސްވައިޕްގެ ރަޖިސްޓްރޭޝަނަށް ހުޅުވާލަނީ ވަކި އަދަދަކަށް ކަމަށެވެ. އެގޮތުން ސްވައިޕްގެ ލިމިޓެޑް ރިލީޒްގައި ސްވައިޕް ބޭނުންކުރުމުގެ ފުރުސަތު ލިބޭނީ ފުރަތަމަ ރަޖިސްޓްރީއާ 5،000 ކަސްޓަމަރުންނަށް ކަމަށެވެ. 

ސްވައިޕްގައި ރަޖިސްޓްރީ ކުރަންޖެހޭނީ swipe.mv މެދުވެރިކޮށެވެ. 

މުޅިން އަލަށް ތައާރަފްކުރަން ތައްޔާރުވާ ސްވައިޕް އަކީ، ރާއްޖެއާއި ރާއްޖޭން ބޭރަށް ފަސޭހަކަމާއެކު ފައިސާގެ މުޢާމަލާތު ކުރެވޭ 100 އިންސައްތަ ދިވެހި އުފެއްދުމެކެވެ. 

ބީއެމްއެލްއިން ބުނީ، ރަޖިސްޓްރީވުމަށް ފަހު، ކަސްޓަމަރުންނަށް ސްވައިޕްގެ ފީޗަރތައް ބޭނުންކުރެވޭ ކަމަށެވެ. އެގޮތުން، ޕަރސަން-ޓު-ޕަރސަން ޓްރާންސްފާތަކާއި ކިއުއާރު މެދުވެރިކޮށް ކުރެވޭ ފައިސާގެ މުޢާމަލާތްތަކާއި ސްވައިޕް މެދުވެރިކޮށް ހޭދަކުރެވޭ ގޮތުގެ އިންސައިޓްސް ބަލާލެވޭނެއެވެ. މީގެ އިތުރުން، ޕޭމަންޓް ލިންކް ފޮނުވައި، ފަސޭހަކަމާއެކު ޓޮޕްއަޕްކޮށް، ވޮލެޓުގައި ހުރި ފައިސާ ބީއެމްއެލް އެކައުންޓަށް އަނބުރާ ފޮނުވޭނެކަމަށް ބީއެމްއެލް އިން ވަނީ ބުނެފައެވެ. 

ބީއެމްއެލްއިން ސްވައިޕް ފަރުމާކޮށްފައިވަނީ ރާއްޖޭގެ ރެގިއުލޭޓަރީ މިންގަނޑުތަކާއި އިންޓަރނޭޝަނަލް ޕޭމަންޓް ސްޓޭންޑާޑްތަކާއި އެއްގޮތަށެވެ. އަދި، މަލްޓި-ކަރަންސީ ވޮލެޓެއްގެ ގޮތުގައި ބޭނުންކުރެވޭ ސްވައިޕް ޓޮޕްއަޕް ކުރުމަށް، ބީއެމްއެލްގެ އެކައުންޓުތަކާއި ކޮންމެ ކްރެޑިޓް އަދި ޑެބިޓް ކާޑެއްވެސް ބޭނުންކުރެވޭނެ ކަމަށް ބީއެމްއެލްއިން ބުނެފައިވެއެވެ.