ރަމަޟާން މަހަށް ޚާއްސަކޮށް، އެޗްޑީސީން ކުރިއަށް ގެންދިއުމަށް ހަމަޖެހިފައިވާ "ރޯދަ ބާޒާރު ފެސްޓިވަލް" އިން ސްޓޯލް ކުއްޔަށް ހިފަން ބޭނުންވާ ފަރާތްތަކަށް އެ ފުރުސަތު އާދިއްތަ ދުވަހު ހުޅުވާލާނެ ކަމަށް އެޗްޑީސީން ބުނެފި އެވެ.

އެޗްޑީސީން ބުނީ، މި އަހަރުގެ ރަމަޟާން މަހާ ގުޅިގެން "ރޯދަ ބާޒާރު ފެސްޓިވަލް" ކުރިއަށް ގެންދިއުމަށް ހަމަޖެހިފައިވަނީ ހުޅުމާލެ ސެންޓްރަލް ޕާކް ސަރަޙައްދުގައި ކަމަށެވެ. އަދި މި ފެސްޓިވަލުގައި ބައިވެރިވުމަށް ޝައުގުވެރިވާ ފަރާތްތަކަށް، ސްޓޯލް ކުއްޔަށް ހިފުމަށް އެދި ހުށަހެޅުމުގެ ފުރުސަތު، އަންނަ އާދިއްތަ ދުވަހުން ފެށިގެން އަންގާރަ ދުވަހުގެ ނިޔަލަށް ހުޅުވާލާނެ ކަމަށެވެ.

ސްޓޯލްތައް ކުއްޔަށް ހިފުމަށް ޝައުގުވެރިވާ ފަރާތްތަކުން، ފޯމް ހުށަހަޅަންޖެހެނީ އެޗްޑީސީގެ ވެބްސައިޓުގައި ޝާއިޢު ކުރާ ލިންކު މެދުވެރި ކޮށެވެ. ސްޓޯލް ދޫކުރަނީ ފޯމު ހުށަހަޅައި ފަރާތްތަކުގެ ތެރެއިން، ޝަރުތުފުރިހަމަވާ ފަރާތްތަކުގެ ތެރެއިން ފުރަތަމަ ފޯމް ހުށަހަޅާ ފަރާތްތަކަށް އިސްކަންދީގެން ކަމަށް އެޗްޑީސީން ވަނީ ބުނެފަ އެވެ.

"ރޯދަ ބާޒާރު ފެސްޓިވަލު" ގައި ތަފާތު ދާއިރާތަކުން ޖުމްލަ 80 ސްޓޯލެއް ދޫކުރާ ގޮތަށް ވަނީ ހަމަޖެހިފަ އެވެ. މިއިން ކޮންމެ ސްޓޯލެއްގެ ބޮޑު މިނަކީ 10 ފޫޓު 10 ފޫޓެވެ.

ސްޓޯލްތަކުގެ ތަފްސީލް؛

އެޗްޑީސީން ބުނީ މި ސްޓޯލްތަކުގެ ކުލީގެ އަގު ކަނޑައަޅާފައިވަނީ 5000 ރުފިޔާއާ 8500 ރުފިޔާއާ ދެމެދުގައި ކަމަށެވެ.

ސްޓޯލް ކުއްޔަށް ހިފާ ފަރާތުން، އާންމުންނަށް އުނދަގޫވާނެ ނުވަތަ ގޯނާއަކަށް ވެދާނެ އެއްވެސް ކަމައް ކުރުމަކީ މަނާކަމެއް ކަމަށް އެޗްޑީސީން ވަނީ ބުނެފަ އެވެ. އަދި އެފަދަ ކަމެއް ދިމާވެއްޖެނަމަ އެކަމުގެ ފުރިހަމަ ޒިންމާ ނަގަން ޖެހޭނީ ކުއްޔަށް ހިފާ ފަރާތުން ކަމަށް ބުންޏެވެ. މީގެ އިތުރުން ކުއްޔަށް ހިފާ ފަރާތުން، އެތަން އެހެން ފަރާތަކަށް ކުއްޔަށް ދިނުމަކީ މަނާކަމައް ކަމަށްވެސް އެޗްޑީސީން ބުންޏެވެ.

މިދިޔަ އަހަރުގެ ރަމަޟާން މަހާ ދިމާކޮށް ވެސް އެޗްޑީސީން ވަނީ ޚާއްސަ ބާޒާރެއް ކުރިއަށް ގެންގޮސްފަ އެވެ.