ރައީސުލްޖުމްހޫރިއްޔާގެ މަޤާމުގައި، ރައްޔިތުންނާ ގާތުން ބައްދަލުކުރައްވައި، އެކި ކަންކަމުގައި ރައްޔިތުންގެ ޚިޔާލާއި މަޝްވަރާ ހޯއްދެވުމުގެ ސަގާފަތަކީ މީގެކުރިން ރާއްޖޭގައި ނެތް ބީރައްޓެހި ކަމެކެވެ. އެހެންނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަން ބަދަލުކުރައްވައި، ރައްޔިތުންނާ ބައްދަލުކުރެއްވުމަށް ސިލްސިލާ ބައްދަލުވުންތައް ބާއްވަވަން ފެއްޓެވުން ވެގެންދިޔައީ ރައްޔިތުން މި ހުރިހާ ދުވަހު އެދިއެދި ފުރުޞަތަށް ލިބިގެންދިޔަ ރަނުގެ ފުރުޞަތަކަށެވެ. 

މާލެ ސަރަޙައްދުގެ ރައްޔިތުންނާ ބައްދަލުކުރައްވަން ނިންމަވައި، އެމަނިކުފާނު މިހާތަނަށް ވަނީ ވިލިމާލެއާއި މާފަންނު، މަންޗަންގޮޅި އަދި ހެންވޭރުގެ ރައްޔިތުންނާ ބައްދަލުކުރައްވައިފައެވެ. ކޮންމެ ބައްދަލުވުމެއްގައި ވެސް ރައްޔިތުންގެ ކަންބޮޑުވުންތައް އަޑުއައްސަވައި އެމަނިކުފާނު ގެންދަވަނީ ޙައްލު ހޯއްދެވުމަށް މަސައްކަތް ކުރައްވަމުންނެވެ.

ރައްޔިތުންގެ ހުށަހެޅުންތައް ސީދާ ރައީސަށް އަރުވަން ލިބުމަކީ މިއަދު ރައްޔިތުން އެކަން އުފަލާއެކު ބަލައިގަންނަ ކަމެކެވެ. މީގެކުރިން ނުލިބުނު އެ ފުރުޞަތު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގައި ލިބުމަކީ ރައްޔިތުން މިއަދު އެމަނިކުފާނަށް ޝުކުރުއަދާކުރާ ސަބަބެވެ. މިދިޔަ ބައްދަލުވުންތަކުގައި ރައްޔިތުން ވަނީ އެކަމުގެ ޝުޢޫރުތައް ފާޅުކޮށް ހައްޤުވާ ޝުކުރު އެމަނިކުފާނަށް އިއްވައިފައެވެ.

ހެންވޭރު ބައްދަލުވުމުގައި ބައިވެރިވި މުޙައްމަދު މުސްތާގު ބުނީ، މިއަދު ފެނިގެންދަނީ ރައްޔިތުންނާ ގާތުން ވެރިކަންކުރުމުގެ ލާމަސީލު މިސާލެއް ކަމަށެވެ. 

މުސްތާގުގެ އުމުރުން 60 އަހަރު ވީއިރު، ރައީސެއްގެ ކުރިމަތީ ވާހަކަދައްކަން ފުރުޞަތެއް ނުލިބުނެވެ. ލިބުނު ފުރުޞަތުގައި ޝުކުރު އަދާކޮށް މުސްތާގު ވަނީ ރައީސް ކުރިފުޅުމަތީގައި ބައެއް ކަންކަން ފާހަގަކޮށްފައެވެ. އެގޮތުން ރައީސް ފެއްޓެވި ވަޠަނީ ޚިދުމަތާއެކު، ކުރިމަގުގައި ލީޑަރުން އުފެދިގެންދާނެކަން އުފަލާއެކު ފާހަގަކުރިއެވެ. 

ބައްދަލުވުމުގައި ބައިވެރިވި ޢަބްދުއްލަޠީފު އުމަރު ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގައި ނިންމަވާފައިވާ މުހިއްމު ނިންމުންތަކަށް ތަޢުރީފުކޮށް ވާހަކަދައްކައިފައެވެ. 

ބައްދަލުވުމުގެ އެހެން ބައިވެރިއެއް ކަމަށްވާ މުހައްމަދު މުސާފުޅު، އޭނާގެ ބައިނަލްއަޤްވާމީ ތަޖުރިބާއާއެކު ބުނީ ޤައުމެއްގެ ވެރިއަކު މިގޮތަށް ރައްޔިތުންނާ ބައްދަލުކުރުމަކީ މީގެކުރިން ނުދެކޭ މަންޒަރެއް ކަމަށެވެ. އެއީ ދިވެހި ތާރީޚުގައި ފާހަގަކުރެވޭ ރައްޔިތުން އުފާވާ ކަމެއްގެ ގޮތުގައި ފާހަގަކުރިއެވެ. 

ރައީސަށް އިއްވި ޝުކުރާއެކު ރައްޔިތުން ވަނީ މީގެކުރިން ނުވެ އޮތް މުހިއްމު ކަންކަން ހައްލުކޮށްދެއްވުމަށް ރައީސަށް ހުށަހަޅައިފައެވެ. ރައްޔިތުންގެ މައިގަނޑު ކަންބޮޑުވުމަށް އޮތީ ހައްލުނުވެ އޮތް ބޯހިޔާވަހިކަމުގެ މައްސަލައެވެ. އެގޮތުން މިދިޔަ ވެރިކަމުގައި ބިންތައް ނުހިއްކާ ދީފައި އޮތް ގޯތިތައް ލިބޭނެގޮތް ހައްދަވައިދެއްވުމަށް ރައީސްގެ ކިބައިން އެދުނެވެ. އަދި، ޕެންޝަން ފަންޑުން ފައިސާ ބޭނުންކުރެވޭ ފަސޭހަ ގޮތްތަކެއް ހޯއްދަވައިދެއްވުމަށާއި، ޕާކިން މައްސަލައަށް ޙައްލު ގެނެސްދެއްވުމަށް ވެސް ރައީސްގެ ކިބައިން ރައްޔިތުން އެދުނެވެ. 

ރައްޔިތުންގެ މައިގަނޑު ކަންބޮޑުވުންތަކާއި ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްކެވި ވާހަކަފުޅުގައި ބޯހިޔާވަހިކަމުގެ ސްކީމްތަކަށް ރައްޔިތުންގެ މަޝްވަރާއާއެކު ހެޔޮ ބަދަލުތައް ގެންނަވާނެ ކަމަށް ވިދާޅުވިއެވެ. ޕެންޝަން ފައިސާ އިތުރު ކަންކަމަށް ބޭނުންކުރެވޭގޮތް ހަދައި، ޕާކިންގެ މައްސަލަ ޙައްލުކުރުމަށް ޕާކިން އިމާރާތްތައް އެޅުމުގެ މަސައްކަތް ކުރައްވާނެކަމުގެ ޔަޤީންކަން ވެސް ރައީސުލްޖުމްހޫރިއްޔާ ވަނީ ރައްޔިތުންނަށް ދެއްވައިފައެވެ.