ދެހާސް ސައްބީސް ވަނަ އަހަރުގެ ޖެނުއަރީ މަހުގެ ފުރަތަމަ ދުވަހުން ފެށިގެން ސިޔާސީ ޕާޓިތަކުގެ އާންމު މެމްބަރުންނަށް އެ ޕާޓީތަކުން ވަކިވެވޭ ގޮތް އިލެކްޝަންސް ކޮމިޝަން (އީސީ) އިން ހަދައިފިއެވެ.

ރާއްޖޭގެ މީޑިއާއަކަށް މިއަދު ދެއްވި އިންޓަވިއުއެއްގައި އެ ކޮމިޝަންގެ ނައިބު ރައީސް އަބްދުއްރަހްމާން ސޮލާހު ރަޝީދު ވިދާޅުވީ ޕާޓީއެއްގެ އާންމު މެމްބަރަކު އެ ޕާޓީއަކުން ވަކިވާން ބޭނުންވެއްޖެ ނަމަ، އީސީގެ ޕޯޓަލް މެދުވެރިކޮށް އެކަމަށް ހުށަހެޅުމުން ވަގުތުން ޕާޓީން ވަކިކޮށްދޭން މިހާރު ނިންމާފައިވާ ކަމަށެވެ.

އެހެން ނަމަވެސް ސިޔާސީ ޕާޓީތަކުގެ މަގާމުތަކުގައި ތިބޭ ފަރާތްތަކާއި ރައްޔިތުންގެ މަޖިލީހުގެ މެމްބަރުން ޕާޓީތަކުން ވަކިކޮށްދޭން އެދިއްޖެނަމަ، ވަކި މުއްދަތެއް ނަގާނެ ކަމަށް ކޮމިޝަންގެ ނައިބު ވިދާޅުވިއެވެ. އީސީ ޕޯޓަލް މެދުވެރިކޮށް އެދެމުން، މިހާރު ޕާޓީތަކުން ވަކިކޮށްދެނީ އެކަމަށް އެދޭތާ 14 ދުވަހުގެ މުއްދަތެއްގެ ތެރޭގައެވެ.  

މި ބަދަލު ގެނައުމުގެ މަގުސަދަކީ ޕާޓީއަކުން ވަކިވެ، އެހެން ޕާޓީއެއްގެ މަގާމަކަށް ކުރިމަތިލާން ނުވަތަ އެތެރޭގެ އިންތިހާބެއްގައި ވާދަކުރަން ބޭނުންވި ނަމަވެސް، 14 ދުވަހުގެ މުއްދަތު އޮތުމުން އެކަމަށް ހުރަސްއެޅޭ ކަމުގެ ޝަކުވާ ލިބޭތީކަމާއި ބައެއް ޕާޓީތަކުން މެމްބަރުން ވަކިވިޔަ ނުދީ ހިފަހައްޓާކަމުގެ ޝަކުވާ ވެސް ބޮޑުވުން ކަމަށް ސޮލާހު ވިދާޅުވިއެވެ.

ޕާޓީތަކުން ވަކިވުމަށް އެދި އިލެކްޝަންސް ކޮމިޝަނަށް ހުށަހެޅޭނެ ގޮތްތައް ފަސޭހަ ކޮށްދީފައިވާކަން ފާހަގަކޮށް ޕާޓީއެއްގައި އުޅުމާއި ނޫޅުމަކީ ކޮންމެ ރައްޔިތަކަށްވެސް އޮންނަ މިނިވަންކަމެއް ކަމުގައި ސޮލާހު ވިދާޅުވިއެވެ.