ސަރުކާރުން ކުރިއަށްގެންދާ "ބޯހިޔާވަހިކަން އެންމެންނަށް" ސިޔާސަތުގެ ދަށުން މާލޭގައި ދިރިއުޅޭ ރައްޔިތުންނަށް ދިރިއުޅުމަށް ބިން ދޫކުރުމުގެ އުޞޫލާއި މާލޭގައި ދިރިއުޅޭ ރައްޔިތުންނަށް ފްލެޓް ދޫކުރުމުގެ އުޞޫލު ގެޒެޓުގައި އާއްމުކޮށް އަންނަ އަހަރުގެ ޖަނަވަރީ 4 ވަނަ ދުވަހުން ފެށިގެން ކުރިމަތިލެވޭގޮތް ހަމަޖައްސައިފިއެވެ. 

އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއިން ބުނީ ގޯއްޗާއި ފްލެޓަށް އެދި ހުށަހެޅުމުގެ ފުރުޞަތު ހުޅުވާލާނީ ޖަނަވަރީ 4 އިން ފެށިގެން މާރިޗު މަހުގެ 3 ވަނަ ދުވަހުގެ ނިޔަލަށް ކަމަށެވެ. ފްލެޓާއި ގޯއްޗަށް އެދި ހުށަހަޅަން ޖެހޭނީ ހިޔާވަހި ޕޯޓަލް މެދުވެރިކޮށެވެ. 

ބިން ދޫކުރުމުގެ މަޝްރޫޢުގެ ދަށުން 1250 އަކަފޫޓުގެ 15،000 ގޯތި ދޫކުރުމަށް ވަނީ ހަމަޖެހިފައެވެ. ގޯތިތައް ދޫކުރަނީ ދެ ކެޓަގަރީއަކަށް ބަހާލައިގެންނެވެ. 

މާލޭގެ ރަށްވެހިންނަށް 10،000 ގޯތި ދޫކުރާއިރު، އެ ގޯތިތައް ވަނީ ތިން ކެޓަގަރީއަކަށް ބަހާލައިފައެވެ. އެއީ އުފަންވީއްސުރެ މާލޭގައި ރަޖިސްޓްރީވެފައިވާ މީހުންނަށް 7000 ގޯއްޗާއި، ފަހުން މާލޭގެ ގެއެއްގައި ރަޖިސްޓްރީވެފައިވާ މީހުންނަށް 2000 ގޯތި އަދި މާލެ ދަފްތަރުގައި ރަޖިސްޓްރީވެފައިވާ މީހުންނަށް 1000 ގޯއްޗެވެ. 

މާލޭގައި ދިރިއުޅޭ އެހެން ރަށްރަށުގެ މީހުންނަށް ގޯއްޗަށް އެދި ހުށަހެޅޭނީ މާލޭގައި ދިރިއުޅޭތާ 15 އަހަރުވެފައި ވާނަމައެވެ. 

މާލެ ސަރަޙައްދުން 7500 ފްލެޓް ދޫކުރުމަށް ނިންމާފައިވާއިރު، 4000 ފްލެޓް ހާއްސަކުރަނީ މާލޭގެ ރަށްވެހިންނަށެވެ. މާލޭގައި ރަށްވެހިވެފައިނުވާ، މާލޭގައި ދިރިއުޅެމުންދާ މީހުންނަށް ޚާއްޞަކޮށްފައިވަނީ 1500 ފްލެޓެވެ. ބާކީ 2000 ފްލެޓް ކަނޑައަޅާފައިވަނީ ދައުލަތުގެ މުއައްސަސާތަކަށާއި ފުލުހުންނާއި ސިފައިންގެ އިތުރުން ޚާއްޞަ އިސްކަންދޭ ކެޓަގަރީތަކަށެވެ. 

އިދާރާތަކާއި މުއައްސަސާތަކުގެ މުވައްޒަފުން ހިމެނޭ 26 އިދާރާއެއް ވަނީ ހިމަނައިފައެވެ. 

ފްލެޓަށް އެދި ހުށަހެޅުމުގައި ވެސް މާލޭގައި ދިރިއުޅޭތާ 15 އަހަރު ވާންޖެހެއެވެ. އުޞޫލުގައި ވާގޮތުން، މާލެއަށް ދިރިއުޅުން ބަދަލުކުރުމަށްފަހު، މާލޭގައި ދިރިއުޅުނު މުއްދަތަށް ވުރެ ކުރު މެދުކެނޑުމެއް އައިނަމަވެސް މާލޭގައި ދިރިއުޅުނު މުއްދަތު 15 އަހަރުވެފައިވާނަމަ، އުޞޫލުގައި ބަޔާންކޮށްފައިވާ ކަންކަމަށް ރިޢާޔަތްކޮށް މާލޭގައި 15 އަހަރު ދިރުއުޅުނުކަމަށް ބަލާނެއެވެ. 

ދިވެހިރައްޔިތުންގެ ބޯހިޔާވަހިކަން ކަށަވަރުކޮށް ދިނުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ގެންގުޅުއްވާ ބޯހިޔާވަހިކަމުގެ ސިޔާސަތު، "ބޯހިޔާވަހިކަން އެންމެންނަށް" އިފްތިތާޙްކުރީ ރޭ ދަރުމަވަންތަ ހޮސްޕިޓަލުގައި ބޭއްވި ރަސްމިއްޔާތެއްގައެވެ.