މިރޭ އޮތް ކޮންގްރެސް ޕާޓީގެ "ދިވެހީންގެ ރާއްޖެ" ބިޔަ ބޮޑު ޖަލްސާ ގައި 13,000 ވުރެ ގިނަ ރައްޔިތުން ބައިވެރިވާ ކަމުގެ މަޢުލޫމާތު ލިބިފައިވާ ކަމަށް ރައީސުލްޖުމްހޫރިއްޔާ އަދި ކޮންގްރެސް ޕާޓީގެ ރައީސް ޑރ. މުޙައްމަދު މުޢިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ މިރޭ އޮތް "ދިވެހީންގެ ރާއްޖެ" ޖަލްސާގައި ތަޤުރީރު ކުރައްވަމުންނެވެ.

ކުރީން ވެސް ބެލެވިފައި އޮތް ގޮތުން މިއީ ރާއްޖޭގެ ސިޔާސީ ތާރީޚުގައި މިގޮތަށް ބޭއްވޭނެ އެންމެ ފޯރިގަދަ އަދި އެންމެ ބައިބޯ ޖަލްސާ އެވެ. ޖަލްސާ ފެށުމުގެ ބައިގަޑިއެއްހާއިރު ކުރީން ފެށިގެން މުޅި އާޓިފިޝަލް ބީޗް ސަރަހައްދު އޮތީ ކޮންގްރެސްގެ މެންބަރުންނާއި ސަޕޯޓަރުންނައިގެން ފުރިފަ އެވެ.

އެ ރައްޔިތުން ތިބީ ޤައުމީ ދިދަތަކާއި ކޮންގްރެސް ޕާޓީގެ ދިދަތައް ހިފައިގެންނެވެ. މުޅި އާޓިފިޝަލް ބީޗް ސަރަހައްދާއި މަޖީދީމަގުގެ ބަޔަކާއި ބޮޑުތަކުރުފާނު މަގުން ބައެއް ވަނީ އެއްކޮށް ފުރިފަ އެވެ.

މިރޭގެ ޖަލްސާގައި ރައީސް ވިދާޅުވީ މިއީ ސިޔާސީ ޙަޔާތުގައި މުޅިން އައު ސަފްޙާއެއް ހުޅުވައިލެވޭ ރެއެއް ކަމަށެވެ. މިއީ ސިޔާސީ މިފަދަ ޖަލްސާއެއްގައި އެންމެ ގިނަ ބަޔަކު ބައިވެރިވާ ޖަލްސާކަން އެމަނިކުފާނު ފާހަގަ ކުރެއްވި އެވެ. އަދި ވިދާޅުވީ މި ބިޔަ ބޮޑު ޖަލްސާ ގައި 13,000 ވުރެ ގިނަ ރައްޔިތުން ބައިވެރިވާ ކަމުގެ މަޢުލޫމާތު ލިބިފައިވާ ކަމަށެވެ.

ރައީސުލްޖުމްހޫރިއްޔާ ޑރ. މުޙައްްމަދު މުޢިއްޒުގެ ވެރިކަމަށް މި މަހުގެ 17 ވަަނަ ދުވަހަށް ދެ އަހަރު ފުރޭނެ އެވެ. މިއީ ރައީސްގެ ޒަޢާމަތަށް ދެ އަހަރު ފުރުމާއި ދިމާކޮށް ކޮންގްރެސް ޕާޓީން ބޭއްވި ކާމިޔާބީގެ ޖަލްސާ އެކެވެ. މި ޖަލްސާއިން އެމަނިކުފާނުގެ ސަރުކާރަށް ރައްޔިތުންގެ އޮތް ތާޢީދު ވަނީ ވަރަށް ފުރިހަމައަށް ދައްކުވައިދީފަ އެވެ.