އާޓިފިޝަލް އައިލެންޑެއް ނުވަތަ މަސްނޫއީ ޖަޒީރާއެއް ބެލްޖިއަމުން ހަދަމުން އަންނަ ކަމަށް އެ ގައުމުން ބުނެފިއެވެ.

ބެލްޖިއަމުގެ އިއާދަކުރަނިވި ހަކަތައިގެ ޤާބިލުކަން އިތުރުކުރުމަށްޓަކައި ނޯތު ސީގައި ބޮޑު މަސްނޫއީ ޖަޒީރާއެއް ބިނާކުރަމުންދާ ކަމަށް އެ ގައުމުގެ ސަރުކާރުން ވަނީ ހާމަކޮށްފައެވެ. "ޕްރިންސެސް އެލިޒަބެތު" ގެ ނަންދީފައިވާ މި ޖަޒީރާ 2027 ވަނަ އަހަރު ނިމުމަކަށް އަންނާނެކަމަށް ލަފާކުރެވެ އެވެ. މި ޖަޒީރާއިން 3.5 ގިގަވޮޓުގެ އޮފްޝޯ ވައިގެ ހަކަތަ ބެލްޖިއަމުގެ ކަރަންޓު ވިއުގެ ތެރެއަށް އިތުރުކުރެވޭނެ އެވެ. މިއީ ތިން މިލިއަނަށްވުރެ ގިނަ ގޭބިސީތަކަށް ކަރަންޓު ދިނުމަށް ފުދޭ މިންވަރެކެވެ.

ހަ ސަތޭކަ ފަންސާސް މިލިއަން ޔޫރޯ (702 މިލިއަން ޑޮލަރު) ގެ މި މަޝްރޫއު ފަންޑުކުރަނީ ޔޫރަޕިއަން އިންވެސްޓްމަންޓް ބޭންކުންނެވެ. އެ ބޭންކުން ވަނީ ފުރަތަމަ ފިޔަވަހި ފެށުމަށްޓަކައި ބެލްޖިއަމުގެ ޓްރާންސްމިޝަން އޮޕަރޭޓަރ އެލިއާއާ އެކު ގްރީން ކްރެޑިޓް އެއްބަސްވުމެއްގައި ސޮއިކޮށްފަ އެވެ. މި މަޝްރޫއަކީ ފޮސިލް ފިއުލް ބޭނުންކުރުން ހުއްޓާލައި، އިއާދަކުރަނިވި ހަކަތައަށް ފުރިހަމައަށް ބަދަލުވުމަށް ޔޫރަޕިއަން ޔޫނިއަނުން އެކުލަވާލާފައިވާ ރީޕަވަރ ޔޫރަޕް ޕްލޭންގެ މުހިންމު ބައެކެވެ.

މި ޖަޒީރާ ބިނާކުރެވޭނީ ބެލްޖިއަމުގެ އައްސޭރިފަށުން ގާތްގަނޑަކަށް 45 ކިލޯމީޓަރު ދުރުގައިވާ ޕްރިންސެސް އެލިޒަބެތު ވައިގެ ސަރަހައްދުގައެވެ.

އިއާދަކުރަނިވި ހަކަތަ އުފެއްދުމުގެ އިތުރުން، މި ޖަޒީރާއަކީ މުޅި ޔޫރަޕަށް ހަކަތަ ވިއްކުމުގެ މަރުކަޒަކަށް ވެސް ވާނެއެވެ. މި ޕްލޭންގައި ހިމެނެނީ ޖަޒީރާ އަވައްޓެރި ގައުމުތަކާ ގުޅުވައިދޭ ޚާއްސަ "ހައިބްރިޑް އިންޓަރކަނެކްޓަރ" ޓްރާންސްމިޝަން ލައިންތަކެކެވެ. މި ހައިބްރިޑް ލައިންތައް ވައިގެ ފާމުތަކާ އިންޓަގްރޭޓްވެ، ދެކޮޅަށް ހަކަތަ ފޯރުކޮށްދެވޭނެއެވެ.

ޖަޒީރާ އުފެއްދުމުގެ ގޮތުން ބިންގާ އެޅުމަށް ބޭނުންކުރާނީ ނެދަލޭންޑްސްގައި މިހާރު އުފައްދަމުންދާ ބޮޑެތި ކޮންކްރީޓު ކެއިސަންތަކެކެވެ. މި ސްޓްރަކްޗަރތައް ކަނޑުގެ އަޑިއަށް ދޫކޮށްލުމަށްފަހު، ވެއްޔާއި އަކިރިން ފުރާލައި، އޭގެ މަތީގައި މަސްނޫއީ ބިމާއި ހަކަތައިގެ ވަސީލަތްތައް ބިނާކުރާނެއެވެ.