ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޢާއްމު ކޮންގްރެސްގައި ބައިވެރިވި ހުރިހާ މެންބަރު ކްލަބުތަކުގެ އިއްތިފާޤުން އެ އެސޯސިއޭޝަނުގެ އައު އަސާސީ ޤަވާއިދު މިއަދު ފާސްކޮށްފިއެވެ.

މި ކޮންގްރެސް އަކީ ފީފާ އިން އެފްއޭއެމްގެ ހިންގުން ނޯމަލައިޒޭޝަން ކޮމިޓީއާ ހަވާލުކުރި ފަހުން ބޭއްވުނު ފުރަތަމަ ޢާއްމު ކޮންގްރެސް އެވެ. މިއީ 2022 ވަނަ އަހަރަށްފަހު އެފްއޭއެމްގެ ޢާއްމު ކޮންގްރެސްއެއް ބޭއްވުނު ފުރަތަމަ ފަހަރު ވެސް މެއެވެ.

މީރުމާ ހޮޓެލްގައި މިއަދު ކުރިއަށްދިޔަ ކޮންގްރެސްގައި ވަނީ މުހިއްމު ގިނަ ކަންތައްތަކެއް ފާސްކޮށްފައެވެ. އެގޮތުން، އެފްއޭއެމްގެ 2023 އަދި 2024 ވަނަ އަހަރުގެ އަހަރީ ރިޕޯޓާއި، އެ އަހަރުތަކުގެ އޮޑިޓްކޮށްފައިވާ މާލީ ބަޔާންތައް ހުށަހަޅައި ވަނީ ފާސްކޮށްފައެވެ. އަދި، 2025 ވަނަ އަހަރުގެ ބަޖެޓުވެސް ވަނީ ފާސްކޮށްފައެވެ.

މީގެއިތުރުން، ނޯމަލައިޒޭޝަން ކޮމިޓީގެ މެންޑޭޓުގައި ހިމެނޭ އެންމެ މުހިއްމު އެއް މަސައްކަތްކަމަށްވާ، އެފްއޭއެމްގެ ހިންގާ ޤަވާއިދު އިސްލާހުކުރުންވެސް ވަނީ މިއަދުގެ ކޮންގްރެސްގައި ފުރިހަމަކޮށްފައެވެ.

މިއަދުގެ ކޮންގްރެސްގައި އިސްލާހުކުރެވުނު ހިންގާ ޤަވާއިދަކީ، ފީފާ އާއި އޭއެފްސީގެ ލަފަޔާއެކު، އަދި އެފްއޭއެމްގެ މެންބަރުންނާ އެކިފަހަރުމަތިން މަޝްވަރާކުރެވި، ފީފާ އިން ކަނޑައަޅާފައިވާ މިންގަނޑުތަކާ އެއްގޮތަށް އެކުލަވާލެވުނު ޤަވާއިދެކެވެ.

މި ޤަވާއިދުގައި ހިމަނާފައިވާ މުހިއްމު ކަންތައްތަކުގެ ތެރޭގައި؛

އަދި، މީގެއިތުރުން، އެފްއޭއެމްގެ އައު އިލެކްޓޯރަލް ކޯޑު ކޮންގްރެސްގައި ފާސްކޮށް، އައު ހިންގާ ކޮމިޓީގެ އިންތިހާބު ބާއްވާނެ ތާރީޚުވެސް ވަނީ ކަނޑައަޅާފައެވެ. އެގޮތުން، ނޯމަލައިޒޭޝަން ކޮމިޓީގެ 1 އަހަރު ދުވަހުގެ މެންޑޭޓް އަންނަ މަހުގެ ނިޔަލަށް ހަމަވުމުގެ ކުރީން، ޖުލައި 26 ވަނަ ދުވަހު، އެފްއޭއެމްގެ ހިންގާ ކޮމިޓީގެ އިންތިހާބު ބޭއްވުމަށް ވަނީ ފާސްކޮށްފައެވެ.