މޯލްޑިވްސް މީޑިއާ ކައުންސިލް (އެމްއެމްސީ) އާއި މޯލްޑިވްސް ބްރޯޑްކާސްޓިން ކޮމިޝަން އެއްކޮށްލުމަށް ފަހު އާ ކޮމިޝަނެއް އުފެއްދުމަށް ރައްޔިތުންގެ މަޖިލީހުގެ އަމިއްލަ މެންބަރަކު ހުށަހެޅި ބިލް އަނބުރާ ގެންދަވަން ރައީސް ޑޮކްޓަރ މުހައްމަދު މުއިއްޒު ނިންމެވުމުން ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އޭޝިއާ އިން މަރުހަބާ ކިޔައިފި އެވެ.

ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު މިދިޔަ ހަފްތާގައި މަޖިލީހަށް ހުަށަހެޅުއްވި ބިލާ ދެކޮޅަށް ނޫސްވެރިންނާއި މީޑިއާތަކުގެ އިތުރުން ސިޔާސީ ޕާޓީތަކުން ވެސް ވަނީ ކަންބޮޑުވުން ފާޅު ކޮށްފައެވެ. މި ކަންބޮޑުވުންތަކާ ގުޅިގެން، ކޮޕް29 ސަމިޓަށް އާޒަބައިޖާނަށް ވަޑައިގެން ހުންނަވައި އެކްސްގައި ރައީސް ކުރެއްވި ޕޯސްޓެއްގައި ވަނީ މީޑިއާތައް ކޮންޓްރޯލް ކުރުމަކީ އެ މަނިކުފާނުގެ ސިޔާސަތެއް ނޫން ކަމަށް ވިދާޅުވެފަ އެވެ.

މީގެ އިތުރުން މި ސަރުކާރަށް އެއް އަހަރު ފުރުން ފާހަގަކުރުމަށް މިދިޔަ އާދިއްތަ ދުވަހުގެ ރޭ ސޯޝަލް ސެންޓަރުގައި ބޭއްވި ހަފުލާގައި ރައީސް ވަނީ މީޑިއާގެ މިނިވަންކަމާ ގުޅޭ ގޮތުން ވާހަކަ ދައްކަވައިފަ އެވެ. އެމަނިކުފާން ވިދާޅުވީ މީޑީއާތައް ކޮންޓްރޯލް ކުރުމުގެ ބަދަލުގައި މަސައްކަތް ކުރައްވާނީ، މީޑިއާތައް ބާރުވެރި ކުރުވައި، ފުރިހަމަ މިިނިވަންކަން ދިނުމަށް ކަމަށެވެ. އޭގެ ތެރޭގައި ސަރުކާރުގެ ބަޖެޓުން މީޑިއާތަކަށް ފުރަތަމަ ފަހަރަށް ފައިސާ ދިނުމާއި މީޑިއާތައް މަސައްކަތް ކުރުމަށް ވަރަށް ހެޔޮ އަގުގައި އޮފީސް ދިނުން ހިމެނޭކަން އެމަނިކުފާން ފާހަގަކުރެއްވިއެވެ.

އެ ހަފުލާ އަށް ފަހު ނުކުމެވަޑައިގެން ސަޕޯޓަރުންނާ ސަލާމްކުރެއްވި ވަގުތު ނޫސްވެރިއަކު ކުރި ސުވާލުގައި ރައީސް ވިދާޅުވީ މަޖިލީހަށް ހުށަހަޅާފައިވާ ބިލުގައި އޮތީ އެ މަނިކުފާނުގެ ސިޔާސަތެއް ނޫން ކަމަށާއި އެ ބިލަށް ޕީއެންސީގެ ޕާލިމަންޓްރީ ގްރޫޕުން ވޯޓް ނުދޭނެ ކަމަށެވެ.

މަޖިލީހަށް ހުށަހަޅާފައި އޮތް ބިލުގައި އޮތީ އާ ކޮމިޝަން އެކުލެވިގެންވާނީ ހަތް މެންބަރުންގެ މައްޗަށް ކަމަށެވެ. އެއީ ރައްޔިތުންގެ މަޖިލީހުގެ ރުހުން ލިބިގެން ރައީސް އައްޔަން ކުރައްވާ ހަތަރު މެންބަރުނާއި މީޑިއާތަކުން އިންތިޚާބު ކުރާ ތިން މެންބަރުންނެވެ.

މީޑިއާތަކާ ގުޅޭ ގޮތުން މަޖިލީހަށް ހުށަހެޅި ބިލް އަނބުރާ ގެންދަން ހުށަހަޅާފައިވާ ކަމަށް އެ ބިލް ހުށަހެޅުއްވި މެންބަރު  އަބްދުލްހަންނާން އަބޫބަކުރު މިއަދު ވަނީ ވިދާޅުވެފަ އެވެ. 

މަޖިލީހަށް ހުށަހެޅި ބިލްގައި ހުރި ނޫސްވެރިންގެ ކަންބޮޑުވުންތަކަށް ހައްލެއް ހޯދައިދޭނެ ކަމުގެ ޔަގީންކަން އެޓާނީ ޖެނެރަލް އަހުމަދު އުޝާމް ވެސް ކުރިން ވަނީ ދެއްވައިފި އެވެ. ބިލާ ގުޅޭ ގޮތުން ނޫސްވެރިންގެ ޖަމިއްޔާގެ ފަރާތުން ހުރި ކަންބޮޑުވުންތައް ވަނީ ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހީމް ޚަލީލް އާއި މީޑިއާތައް ރެގިއުލޭޓްކުރުމުގެ ބާރު އޮންނަ މިިނިސްޓަރު އިބްރާހީމް ވަހީދު (އަސްވާޑް) ވެސް އަޑުއައްސަވައިފައެވެ.