ޗައިނާގެ އެންމެ މުއްސަނދި މީހާގެ ލަގަބު އަނެއްކާވެސް މި ވަނީ އާ މީހަކަށް ލިބިފަ އެވެ.

އެ މަގާމު މިފަހަރު ހޯދާފައި ވަނީ މުޅި ދުނިޔޭގައި ވެސް އެންމެ މަޝްހޫރު އެއް އެޕުގެ ބެލެނިވެރި ކުންފުނި ކަމަށްވާ ބައިޓްޑާންސްގެ ކޯ ފައުންޑަރު އުމުރުން 41 އަހަރުގެ ޒަންގް ޔިމިން އެވެ. ޗައިނާގެ މުއްސަނދިންގެ ރޭންކް ހާމަކުރާ "ހުރުން ޗައިނާ ރިޗް ލިސްޓް" ގައިވާ ގޮތުން ޔިމިންގެ މިލްކިއްޔާތުގެ އަގު ވަނީ 49.3 ބިލިއަން ޑޮލަރަށް އަރައިފަ އެވެ. 

ޗައިނާގެ އެންމެ މުއްސަނދި މީހާގެ ލަގަބު ޔިމިން އަށް ލިބުނު އިރު ބައިޓްޑާންސްގެ މިދިޔަ އަހަރުގެ އާމްދަނީ ވަނީ 30 ޕަސެންޓް އިތުރުވެ 110 ބިލިއަން ޑޮލަރަށް އަރައިފަ އެވެ. 

މެއި 2017 ގައި ޓިކްޓޮކް ލޯންޗުކުރި ފަހުން މުޅި ދުނިޔޭގައި ވެސް އަންނަނީ ވަރަށް ބޮޑު މަގްބޫލްކަމެއް ލިބެމުންނެވެ. ނަމަވެސް އެމެރިކާގައި މިހާރު ވަނީ ޓިކްޓޮކަށް ގާނޫނީ ހުރަސްތަކެއް ކުރިމަތިވެފަ އެވެ. އެ ގައުމުގައި ޓިކްޓޮކް ބޭނުންކުރާ މީހުންގެ އަދަދު ވަނީ 200 މިލިއަނަށް އަރައިފަ އެވެ. 

ރޫމްމޭޓަކާ އެކު 2012 ގައި އުފެއްދި ބައިޓްޑާންސްގެ 20 ޕަސެންޓް ހިއްސާ އޮންނަނީ ޔިންމިން އަށެވެ.