ދުންފަތް ކޮންޓްރޯލް ކުރުމާ ބެހޭ ގާނޫނަށް ސަރުކާރުން ހުށަހެޅި އިސްލާހުގެ ބިލު ރަޢީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަސްދީގުކުރެއްވުމާ އެކު މިރޭ 12 އިން ފެށިގެން ވޭޕާއި ވޭޕުކުރުމަށް ބޭނުންކުރާ އާލާތްތަކާއި ވޭޕުގެ ވަކިވަކި ބައިތަށް ރާއްޖެ އެތެރެކުރުން މަނާވާނެއެވެ.

ނޮވެންބަރު 12، 2024 ވަނަ ދުވަހު ބޭއްވި 20 ވަނަ ރައްޔިތުންގެ މަޖިލީހުގެ 48 ވަނަ ޖަލްސާގައި ފާސްކުރި މި ބިލާއި ގުޅިގެން، މިރޭ 12:00 އިން ފެށިގެން ވޭޕް ރާއްޖެ އެތެރެ ކުރުން މަނާވި ނަމަވެސް ވޭޕާއި ވޭޕުކުރުމަށް ބޭނުންކުރާ އާލާތްތަކާއި ވޭޕުގެ ވަކިވަކި ބައިތަކުގެ ވިޔަފާރިކުރުމާއި ހިލޭ ބެހުން މަނާވާނީ ޑިސެމްބަރ 15، 2024 އިން ފެށިގެންނެވެ.

ވޭޕް ކުރުމަށް ބޭނުން ކުރާ އާލާތްތަކާއި އެ އެއްޗެއްސަށް ބޭނުން ކުރުމަށް ތައްޔާރުކޮށްފައިވާ އުފެއްދުންތައް އެތެރެކޮށްފިނަމަ، 50،000 ރުފިޔާއިން ޖޫރިމަނާ ކުރެވޭނެއެވެ. އަދި އެތެރެކުރި ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް ކުރުމަށް ބޭނުން ކުރާ އާލާތަކަށް 10،000 ރުފިޔާގެ މަގުން ޖޫރިމަނާ ކުރެވޭނެ ކަމަށް ވެސް ގާނޫނުގައިވެއެވެ.

މީގެއިތުރުން، އެފަދަ އާލާތެއް ވިއްކައިފި ނަމަ، 20،000 ރުފިޔާ އިން ޖޫރިމަނާ ކުރެވޭނެ ކަމަށާއި ވިއްކި ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާ ކުރެވޭނެ ކަމަށް ވެސް ހިމަނާފައިވެއެވެ. އަދި އެފަދަ އުފެއްދުމެއް ބޭނުންކޮށް ފިނަމަ، 5،000 ރުފިޔާއިން ޖޫރިމަނާ ކުރެވޭނެ ކަމަށް ވެސް އިސްލާހުގައި ވެއެވެ.

ދުންފަތުންގެ ބާވަތެއް ވިއްކޭނެ އެންމެ ހަގު އުމުރަކީ 18 އަހަރުގެ ބަދަލުގައި 21 އަށް ހެދުމަށް ވެސް ގާނޫނުގައި ވަނީ މިހާރު ކަނޑައަޅައިފައެވެ.