މ. ދިއްގަރު ސިއްޙީ މަރުކަޒުގައި ޤާއިމުކޮށްފައިވާ އެން.ސީ.ޑީ ނުވަތަ ގައިންގައިން ނާރާ ބަލިތަކަށް ޚާއްސަ ކްލިނިކް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު މިއަދު ހުޅުއްވައިދެއްވައިފިއެވެ.

އެކމަަނާ މި ކްލިނިކް ހުޅުއްވައިދެއްވީ މި އަހަރުގެ ދުނިޔޭގެ ހަކުރު ބަލީގެ ދުވަސް ފާހަގަކުރުމަށްޓަކައި ދިއްގަރަށް ކުރެއްވި ދަތުރުފުޅެއްގައެވެ.

ދިއްގަރަށް ވަޑައިގަތުމުން ރައީސުލްޖުމްހޫރިއްޔާގެ އަނބިކަނބަލުންނަށް ވަރަށް ހޫނު މަރުޙަބާއެއް ދެންނެވި އެވެ. އެކަމަނާގެ ދަތުރުފުޅުގެ ތެރޭގައި ދިއްގަރު ސިއްޙީ މަރުކަޒުގައި ތަރައްޤީކޮށްފައިވާ އެންސީޑީ ކްލިނިކް ހުޅުވައިދެއްވުމަށް ފަހު، އެތަން ބައްލަވާލައްވާ މެހެމާނުންގެ ފޮތުގައި ސޮއިކުރައްވާފައިވެއެވެ.

ދިއްގަރު ޞިއްޙީ މަރުކަޒުން މަޢުލޫމާތު ދެއްވިގޮތުގައި، މި ކްލިނިކް ހުޅުވުމުގެ މައިގަނޑު ބޭނުމަކީ ގައިންގަޔަށް ނާރާ ބަލިތައް އިތުރުވަމުންދާތީ، ދުރާލާ އެކަން ދެނެގަނެ ފަރުވާ ދިނުމެވެ. އެރަށުގައި ހަކުރު ބައްޔާއި ލޭ މައްޗަށް ދިޔުން ފަދަ ބަލިތައް އިތުރުވަމުން އަންނަކަމަށާއި، އަތޮޅުގެ ދެވަނައަށް އެންމެ ގިނައިން މިފަދަ ބަލިތައް ތަހައްމަލު ކުރާ މީހުން ދިރިއުޅެނީ އެ ރަށުގައިކަން ފާހަގަކޮށްފައިވެއެވެ.

މި އާ ކްލިނިކްގެ އެހީގައި ގައިންގަޔަށް ނާރާ ބަލިތައް ޖެހިފައި ތިބި މީހުންގެ ހާލަތު ދެނެގަތުމާއި، އެފަދަ ބަލިތަކަށް ޓެސްޓްތައް ހެދުމާއި، ހޭލުންތެރިކުރުމުގެ މަޢުލޫމާތުތައް ބަލި މީހުންނަށް ފޯރުކޮށްދިނުމަށް ހަމަޖެހިފައިވެއެވެ. މި ކްލިނިކް ޤާއިމުކޮށްފައި ވަނީ 2023 ވަނަ އަހަރު ހުޅުވި އޮފީސް އިމާރާތުގެ ބައެއްގައެވެ.

ދެހާސް ހަތަރު ވަނަ އަހަރު ހުޅުވި ދިއްގަރު ސިއްޙީ މަރުކަޒަކީ 24 ގަޑިއިރު ޚިދުމަތްދޭ ތަނެއް ކަމަށާއި، ދެ ޑޮކްޓަރުންނާއެކު ޚިދުމަތް ދެމުންދާކަމަށް އެ ތަނުން މަޢުލޫމާތުދެ އެވެ. މި މަރުކަޒަކީ ރަށުގެ ރައްޔިތުންގެ އިތުރުން ކައިރި ރިސޯޓުތަކުން ވެސް ޞިއްޙީ ޚިދުމަތް ހޯދުމަށް ބަރޯސާވާ ތަނެކެވެ. މި މަރުކަޒުން ލެބޯޓަރީގެ ޚިދުމަތާއި މޯބައިލް ލެބޯޓަރީގެ ޚިދުމަތް ވެސް ފޯރުކޮށްދެއެވެ.