"ބަދަހި ޢާއިލާ - އުފާވެރި މުޖުތަމަޢު" ޝިޢާރުގެ ދަށުން ޖެންޑަރ މިނިސްޓްރީން ޚާއްޞަ ޢާއިލީ ހަވީރެއް ބޭއްވުމަށް ނިންމައިފިއެވެ.

މި ހަވީރު ބޭއްވުމަށް ހަމަޖެހިފައިވަނީ އަންނަ ހޮނިހިރު ދުވަހު ހުޅުމާލޭ ސެންޓްރަލް ޕާކުގައި ހަވީރު 4 އިން 6 އަށެވެ.

މި ހަވީރުގެ މައިގަނޑު މަޤްޞަދަކީ ޢާއިލީ މާޙައުލެއްގައި، ޖެންޑަރ މިނިސްޓްރީން ފާއިތުވި އަހަރު ތެރޭގައި ކުރެވުނު މަސައްކަތްތަކުން ހާޞިލުކުރެވުނު ކާމިޔާބީތައް ރައްޔިތުންނާ ހިއްސާކުރުމެވެ. މީގެ އިތުރުން، އަންހެނުންނާއި، ކުޑަކުދިންނާއި، ނުކުޅެދުންތެރިކަން ހުންނަ ފަރާތްތަކާ އަދި އިސްރަށްވެހިންނަށް އަމާޒުކޮށްގެން ކުރިއަށް ގެންދެވުނު މަސައްކަތްތަކާއި، މިނިސްޓްރީން ފޯރުކޮށްދެމުން އަންނަ ޚިދުމަތްތަކުގެ މަޢުލޫމާތު ރައްޔިތުންނަށް ފޯރުކޮށްދިނުމަށް ވެސް ވަނީ ހަމަޖެހިފައެވެ.

މި ޢާއިލީ ހަވީރުގައި ތަފާތު ގޭމް ސްޓޯލްތަކާއި، ކާބޯތަކެތީގެ ސްޓޯލްތަކުގެ އިތުރުން، ތަފާތު މެސްކޮޓްތަކުގެ ހަރަކާތްތައް ކުރިއަށްދާނެ ކަމަށް މިނިސްޓްރީން މަޢުލޫމާތު ދެއެވެ.

ޖެންޑަރ މިނިސްޓްރީއާ އެކު މި ހަވީރުގައި އިސްކޮށް ހަރަކާތްތެރިވާނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި ހައުސިން ޑިވެލޮޕްމަންޓް ކޯޕަރޭޝަނެވެ. އަދި އުރީދޫ، މޯލްޑިވްސް، ޕެންޝަން އެޑްމިނިސްޓްރޭޝަން އޮފީސް، މޯލްޑިވްސް ޕޮލިސް ސަރވިސް، ނެޝަނަލް ސޯޝަލް ޕްރޮޓެކްޝަން އޭޖެންސީ، އަދި ފެމިލީ ޕްރޮޓެކްޝަން އޮތޯރިޓީން ވެސް މި ހަވީރުގައި ބައިވެރިވާނެއެވެ.