މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން އިންތިޒާމްކޮށްގެން ކުރިއަށް ގެންދިއުމަށް ހަމަޖެހިފައިވާ "ދާލަން: ނެޝަނަލް ސްކިލްސް އެންޑް ކެރިއަރ އެކްސްޕޯ 2024" ގެ ލަކީ ޑްރޯގެ ދަށުން އަގުހުރި އެތައް އިނާމެއް ހާސިލުކުރުމުގެ ފުރުޞަތު ހުޅުވާލައިފިއެވެ.

މި ނޮވެމްބަރު މަހުގެ 15 އަދި 16 ވަނަ ދުވަހުގެ 16:00 އިން ފެށިގެން ހުޅުމާލެ ސެންޓްރަލް ޕާކުގައި ބޭއްވުމަށް ހަމަޖެހިފައިވާ މި އެކްސްޕޯގައި، ގުރުއަތުން ހޮވޭ ނަސީބުވެރިންނަށް އިނާމު ޙަވާލުކުރުމަށް ހަމަޖެހިފައިވަނީ ދެ ދުވަހަކަށް ބަހާލައިގެންނެވެ.

ލަކީ ޑްރޯގައި ހިމެނޭ އިނާމުތަކުގެ ތެރޭގައި ދިރާގުގެ މައި-ފައި ޑިވައިސްގެ 3 މަހުގެ ޕެކޭޖް، ސީގަލް މޯލްޑިވްސްގެ ސީ ސްޕޯޓްސް ގިފްޓް ވައުޗަރ، އަދި ވޮޔޭޖެސް މޯލްޑިވްސްގެ ސީގަލް ކެފޭގެ ގިފްޓް ވައުޗަރ ހިމެނެއެވެ. މީގެ އިތުރުން، ބޮޑީ ޓެކް ޖިމްގެ 3 މަހުގެ މެމްބަރޝިޕް، ކަސަބު އާރޓްސްގެ ބޭސިކް ކަސަބު ކްލާސް ވައުޗަރ، އަދި ކައިމޫ ޓްރެވަލްސް އެންޑް ހޮޓެލްސް ސަރވިސަސްގެ ފަރާތުން އެނބޫދޫ ވިލެޖްގައި ދެ ފަރާތަކަށް އެއްދުވަހު ހުރުމުގެ ފުރުޞަތު ވެސް ހިމެނެއެވެ.

މި އެކްސްޕޯގެ މައިގަނޑު ސްޕޮންސަރުންގެ ގޮތުގައި ސީގަލް ގްރޫޕާއި ވޮޔޭޖަސް މޯލްޑިވްސް ހިމެނެއެވެ. އަދި ޕާޓްނަރުންގެ ގޮތުގައި ދިރާގު، ޕީއެސްއެމް، ޕެންޝަން އޮފީސް، ބޭންކް އޮފް މޯލްޑިވްސް، އެޗްޑީސީ، ވެމްކޯ، ސްޓެލްކޯ އަދި ކެފޭ ޑެލިޒިއޯސޯ ބައިވެރިވެއެވެ.

މި އެކްސްޕޯ އަށް ފަންޑުކޮށްދެނީ މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ދަށުން ވޯލްޑް ބޭންކުން ޚަރަދުކޮށްގެން ހިންގާ ސަސްޓެއިނަބަލް އެންޑް އިންޓެގްރޭޓެޑް ލޭބަރ ސަރވިސަސް (ސެއިލްސް) ޕްރޮޖެކްޓް އަދި މޯލްޑިވްސް: އެންހޭންސިން އެމްޕްލޮޔަބިލިޓީ އެންޑް ރެޒިލިއެންސް އޮފް ޔޫތް (މީރީ) ޕްރޮޖެކްޓެވެ.