ޤާނޫނު ނަންބަރު 2010/15 (ދުންފަތް ކޮންޓްރޯލުކުރުމާބެހޭ ޤާނޫނު) އަށް 1 ވަނަ އިޞްލާޙު ގެނައުމުގެ ބިލް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ތަޞްދީޤުކުރައްވައިފިއެވެ.

މި ބިލަކީ ނޮވެންބަރު 12، 2024 ވަނަ ދުވަހު ބޭއްވި 20 ވަނަ ރައްޔިތުންގެ މަޖިލީހުގެ 48 ވަނަ ޖަލްސާގައި ފާސްކުރި ބިލެކެވެ.

މި އިޞްލާޙުގެ ދަށުން، އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ދިވެހިރާއްޖެއަށް އެތެރެކުރުމާއި، ވިއްކުމާއި، ހިލޭ ބެހުމާއި، އެ ތަކެތި ބޭނުންކުރުން މަނާކޮށްފައިވެއެވެ. މީގެ އިތުރުން، ދައުލަތުގެ އިދާރާތަކުގައި ދުންފަތުގެ އިސްތިޢުމާލުކުރުން މަނާކުރުމާއި، 21 އަހަރުން ދަށުގެ މީހުންނަށް ދުންފަތުގެ އެއްވެސް ބާވަތެއް ވިއްކުން މަނާކުރުން ފަދަ މުހިންމު ބަދަލުތަކެއް މި އިޞްލާޙުގައި ހިމަނާފައިވެއެވެ.

އަދި ދުންފަތުގެ ބާވަތްތައް އިސްތިހާރުކުރުމާއި، ދުންފަތް ހެއްދުމާއި އުފެއްދުން މަނާކުރުމުގެ އިތުރުން، ޤާނޫނާ ޚިލާފަށް ދުންފަތުގެ ބާވަތްތައް އެތެރެކުރުމާއި ބޭރުކުރުން މަނާކޮށްފައިވެއެވެ. މި ޤާނޫނާ ޚިލާފުވާ ފަރާތްތަކަށް ޖޫރިމަނާ ކުރެވޭނެ އަދަދުތަކެއް ވެސް ވަނީ ކަނޑައެޅިފައެވެ.

މި އިޞްލާޙު ތަޞްދީޤުކުރެއްވުމާއެކު، މިއަދު ވަނީ ދިވެހި ސަރުކާރުގެ ގެޒެޓުގައި ޝާއިޢުކޮށްފައެވެ. އިލެކްޓްރޯނިކް ސިނގިރޭޓާއި ވޭޕްކުރުމާ ގުޅޭ މާއްދާތަކަށް ޢަމަލުކުރަން ފަށާނީ 15 ޑިސެމްބަރު 2024 ގައި ކަމަށާއި، ޤާނޫނުގެ އެހެނިހެން މާއްދާތަކަށް ޢަމަލުކުރަން ފަށާނީ 15 ނޮވެންބަރު 2024 އިން ފެށިގެން ކަމަށް ވަނީ ބަޔާންކޮށްފައެވެ.