ނޫސްތަކާއި މީޑިއާތައް ކޮންޓްރޯލް ކުރުމަކީ އެމަނިކުފާން ޤަބޫލުކުރައްވާ ހަމައެއް ނޫން ކަމަށް ރައީސް ޑޮކްޓަރ މުހައްމަދު މުއިއްޒު މިއަދު ވިދާޅުވެއްޖެ އެވެ.

އެކްސްގައި ރައީސް މިއަދު ކުރެއްވި ޕޯސްޓެއްގައި ވިދާޅުވީ މާތް ވެގެންވާ އިސްލާމްދީނާއި ދިވެހި ރާއްޖޭގެ ޤާނޫނު އަސާސީ އާއި ޚިލާފު ނުވާހާ ހިނދަކު ދިވެހި ދައުލަތުގެ ސިޔާދަތީ ބާރު ހިނގާ ސަރަޙައްދުގައި ކޮންމެ ދިވެއްސަކަށް ވެސް އެމީހެއްގެ އަމިއްލަ މިނިވަންކަމާ އެކު އެމީހަކު ބޭނުން ކަމެއްކޮށް އުޅުމުގެ ޙައްޤު އޮންނާނެ ކަމަށެވެ.

ރައީސްގެ މި ޕޯސްޓް ކުރައްވާފައި ވަނީ  މޯލްޑިވްސް މީޑިއާ ކައުންސިލް (އެމްއެމްސީ) އާއި މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އެއްކޮށްލުމަށް ރައްޔިތުންގެ މަޖިލީހަށް ފޮނުވި ބިލަށް ބައެއް މީޑިއާތަކުގެ ފާޑުކިޔުންތައް އަމާޒުވެފައި ވަނިކޮށެވެ.

ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާން އަބޫބަކުރު މަޖިލީހަށް މިއަދު ހުށަހެޅުއްވި ބިލްގައި ވަނީ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ނަމުގައި އާ ކޮމިޝަނެއް އުފައްދައި އެ ކޮމިޝަން އެކުލެވިގެންވާ ގޮތް ބަޔާންކޮށްފަ އެވެ. ހަތް މެމްބަރުންގެ މައްޗަށް އެކުލެވޭ އާ ކޮމިޝަނުގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރައްވާ ހަތަރު މެންބަރަކާއި މީޑިއާތަކުން އައްޔަންކުރާ ތިން މެންބަރެކެވެ.

މަޖިލީހަށް ހުށަހަޅާފައިވާ ބިލަކީ އެ ހުށަހެޅުއްވި މެންބަރުގެ އަމިއްލަ ހިޔާލު ކަމަށާއި އޭގައި ހުރި ކަންކަމާ ގުޅޭ ގޮތުން ދިރާސާ ކުރަމުން އަންނަ ކަމަށް ޔޫތު އެމްޕަވަމަންޓް، އިންފޮމޭޝަން އެންޑް އާޓްސް މިނިސްޓަރު އިބްރާހިމް ވަހީދު (އަސްވާޑު) ވެސް މިއަދު ވަނީ ވިދާޅުވެފަ އެވެ.