އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން އިސްނަގައިގެން ފެމިލީ އެންޑް ޗިލްޑްރެން ސަރވިސް ސެންޓަރުތަކުގެ ކޭސްވަރކަރުންނަށް އަމާޒުކޮށްގެން 04 ދުވަހުގެ ތަމްރީން ޕްރޮގްރާމެއް ފަށައިފިއެވެ.

މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ 2 ބެޗަކަށް ބަހާލައިގެންނެވެ. މި ތަމްރީން ޕްރޮގްރާމްގެ ފުރަތަމަ ބެޗް ކުރިއަށް ގެންދިއުމަށް ހަމަޖެހިފައިވަނީ 12،13،14 އަދި 16 ނޮވެމްބަރު 2024 ގައި 08:00- 16:00 ގައެވެ.

 މި ޕްރޮގްރާމްގެ މަޤްސަދެއްގެ ގޮތުގައި އެ ވުޒާރާއިން ހާމަކޮށްފައިވަނީ އެވުޒާރާގެ ދަށުން ހިނގަމުންދާ ފެމިލީ އެންޑް ޗިލްޑްރެން ސަރވިސް ސެންޓަރުތަކުގައި މަސައްކަތް ކުރާ ކޭސްވަރކަރުންނަށް ބޭނުންވާ ފަންނީ ޢިލްމާއި ތަމްރީނާއި ހުނަރު ފޯރުކޮށްދިނުމެވެ. އަދި ހިދުމަތް ފޯރުކޮށްދިނުމުގައި، އެއްމިންގަނޑަކުން އަމަލު ކުރެވޭކަން ކަށަވަރުކުރުމާއި، ދެވޭ ހިދުމަތުގެ ފެންވަރު ރަނގަޅުކުރުމެވެ.

މި ތަމްރީނު ޕްރޮގްރާމްގެ ތެރެއިން، މިވަގުތު ކޭސް ވޯކަރުންނަށް ކުރިމަތިވެފައިވާ ފަންނީ ގޮންޖެހުންތައް ދެނެގަނެ، ތަމްރީނުފޯރުކޮށް ދެވިގެންދާނެކަމަށް އެ މިނިސްޓްރީއިން ބުންޏެވެ.

"މި ވުޒާރައިގެ މައިގަނޑު އެއް އަމާޒަކީ، ވަށައިޖެހޭފަދަ ހިދުމަތްތަކެއް އާއިލީ ނަޒަރަކުން، ހުށައެޅޭ މައްސަލަތަކުގައި ކޮންމެ އާއިލާއަކަށް ކޭސްވޯކަރަކު ހަމަޖެހި، ލުއިފަސޭހަ ގޮތެއްގައި، އިތުބާރު ކުރެވޭފަދަ ހިދުމަތެއް ފޯރުކޮށްދިނުން. އަދި، މި ތަމްރީނު ޕްރޮގްރާމްގެ ޒަރީއާއިން މި އަމާޒަށް ވާސިލުމުވަށް މުޅިރާއްޖޭގައި މިވަގުތު މަސައްކަތްކުރަމުންދާ ހުރިހާ ކޭސް ވޯކަރުން ތަމްރީނު ކުރެވިގެންދާނެ." އިޖުތިމާޢީ އަދި ޢާއިލީ ތަރައްޤީއާ ބެހޭ މިނިސްޓްރީއިން ބުންޏެވެ.

އެގޮތުން މި ޕްރޮގްރާމްތަކުގެ އެހީގައި ފެމިލީ އެންޑް ޗިލްޑްރެން ސަރވިސް ސެންޓަރު ތަކުގައި މަސައްކަތްކުރާ ކޭސްވަރކަރުން މިހާރު ކުރަމުންގެންދާ މަސައްކަތްތައް އިތުރަށް ހަރުދަނާވެ، މިހާރު ދެވޭ ޚިދުމަތުގެ ފެންވަރު ރަނގަޅުވެގެންދާނެކަމަށް އެމިނިސްޓްރީއިން ބުންޏެވެ.

މި ޕްރޮގްރާމްގެ ފުރަތަމަ ބުރުގައި ޖުމްލަ 25 މުވައްޒަފުން 15 އަތޮޅަކުން ބައިވެރިވާނެއެވެ.