ރާއްޖޭން ބޭރުން އިމާމުންނަށް ތަމްރީން ދިނުމަށް އިސްލާމީ ކަންތައްތަކާ ބެހޭ ވުޒާރާއިން ފަށާފައިވާ ހާއްސަ ޕްރޮގްރާމުގެ ދަށުން އިންޑޮނޭޝިޔާއަށް ދަތުރުކުރި އިމާމުންނާ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ބައްދަލުކުރައްވައިފިއެވެ.

މި މަހުގެ 6 ވަނަ ދުވަހު އިންޑޮނޭޝިޔާއަށް ފުރި އިމާމުން ތަމްރީން ޕްރޮގްރާމް ފުރިހަމަކުރެއްވުމަށްފަހު އެނބުރި އައިސްފައިވަނީ ހޯމަ ދުވަހުގެ ރޭއެވެ. މި ދަތުރުގައި ރާއްޖޭގެ އެކި ހިސާބުތަކުން 15 އިމާމުން ބައިވެރިވެލައްވާފައިވެއެވެ. މި ދަތުރުގައި އިމާމުންވަނީ އިންޑޮނޭޝިޔާގެ ހާއްސަ އިސްލާމީ ތަންތަނަށް ޒިޔާރަތް ކުރައްވާ އެތަންތަނާއި ގުޅޭ މުހިއްމު މަޢުލޫމާތު ހޯދާފައެވެ. މީގެ އިތުރުން އިމާމުންނަށް އިންޑޮނޭޝިޔާގައި ހާއްސަ އެކި ކުލާސްތައް ކުރިއަށް ގެންގޮސްފައިވާކަން ފާހަގަކޮށްލެވެއެވެ.

މި ބައްދަލުކުރެއްވުމުގައި ވަޒީރު ވަނީ މި ދަތުރުގައި އިމާމުންނަށް ކުރެވުނު ތަޖުރިބާގެ މަޢުލޫމާތު އޮޅުންފިލުއްވާ، ދަތުރުގެ ތެރެއިން އެނގިގެންދިޔަ ކަންކަން ބޭނުން ކުރެއްވުމަށް އިމާމުންނަށް ނަސޭހަތްތެރިވެލައްފާފައެވެ.

އިމާމުން ތަމްރީންކުރުމުގެ ޕްރޮގްރާމްގެ ދަށުން ދެ ފަހަރެއްގެ މަތިން އިމާމުން ވަނީ މި އަހަރު ސައުދީ އަރަބިއްޔާއަށް ޒިޔާރަތްކުރައްވައިފައެވެ. މީގެ އިތުރުން ބްރޫނާއިއަށްވެސް އިމާމުން ތަމްރީނަށް ގޮސްފައިވާއިރު މެލޭޝިޔާގައި މިވަގުތު އިމާމުންގެ ތަމްރީނެއް ކުރިއަށްދާކަން ފާހަގަކޮށްލެވެއެވެ. މިއާއެކު މިއަހަރު މިހާތަނަށް 100 އިމާމުން ވަނީ ރާއްޖޭން ބޭރުން އިތުރު ތަމްރީން ޙާސިލްކުރައްވާފައެވެ.