ތަރައްޤީވަމުން އަންނަ ކުދި ޖަޒީރާ ޤައުމުތަކުން މޫސުމީ ބަދަލުތަކާގުޅޭ ލަނޑުދަނޑިތައް ޙާސިލްކުރާ މިންވަރަކުން ދަރަނި މަޢާފުކޮށްދިނުން މުހިންމުކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އަޒަރްބައިޖާނުގައި މިހާރު ކުރިއަށްދާ ކޮޕް-29 ގެ ހަވާސާގައި، މޫސުމީ ބަދަލުތަކާ ބެހޭގޮތުން ބޭއްވި ތަރައްޤީވަމުން އަންނަ ކުދި ޖަޒީރާ ޤައުމުތަކުގެ އިސްވެރިންގެ ބައްދަލުވުމުގައި ވާހަކަފުޅުދައްކަވަމުންނެވެ.

ކުދި ޖަޒީރާ ޤައުމުތަކުގެ އިސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މޫސުމަށް އަންނަ ބަދަލުތަކުގެ ސަބަބުން ރާއްޖެފަދަ ކުދި ޖަޒީރާ ޤައުމުތަކުގެ ތަރައްޤީއަށް ވަރަށް ބޮޑު އަސަރެއްކުރާކަމަށެވެ.

ރައީސުލްޖުމްހޫރިއްޔާ ވިދާޅުވީ މީގެ ކުޑަ ދުވަސްކޮޅެއް ކުރިން ކުރިއަށްއޮތް 10 އަހަރަށް ކުދި ޖަޒީރާ ޤައުމުތަކުން ޙާސިލްކުރަން ބޭނުންވާ ލަނޑުދަނޑިތަކުގެ އެޖެންޑާއެއް އެކުލަވާލާފައިވާ ކަމަށެވެ. ނަމަވެސް އެކަށޭނަ ފައިސާއާ ނުލައި އެ ލަނޑުދަނޑިތައް ޙާސިލްނުކުރެވޭނެކަމަށާއި، ޤައުމުތަކަށް މިހާރު ފައިސާ ދިނުމަށް އޮންނަ އޮނިގަނޑުގެ ދަށުން ލަނޑުދަނޑިތައް ޙާސިލްކުރަން ބޭނުންވާ މިންވަރަށް މާލީ އެހީ ނުލިބޭކަމަށް ރައީސުލްޖުމްހުރިއްޔާ ވިދާޅުވިއެވެ.

އެހެންކަމުން ކުދި ޤައުމުތަކަށް ދެވޭ މާލީ އެހީގެ މިންވަރު އިތުރުކޮށް މާލީ އެހީދޭ ނިޒާމު ހަރުދަނާކުރުމަށް ގެނެވިދާނެ 3 ބަދަލެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުށައެޅުއްވިއެވެ.އެމަނިކުފާނުފުރަތަމަ ހުށައެޅުއްވީ އދ. އާއި ބައިނަލްއަޤުވާމީ ޑިވަލޮޕްމެންޓް ބޭންކުތަކާއި، ބައިނަލްއަޤުވާމީ މާލީ މަރުކަޒުތަކުން ކުދި ޤައުމުތަކަށް މާލީ އެހީދިނުމަށް ގުޅިގެން މަސައްކަތްކުރުމެވެ. މިއާއެކު ކުދި ޤައުމުތަކަށް އިންވެސްޓްމެންޓް ގެނެވޭ މިންވަރު އިތުރުކުރެވޭނެކަން ރައީސް ފާހަގަކުރެއްވިއެވެ.

ދެވަނަ ކަމަކަށް ރައީސް ހުށައެޅުއްވީ ކުދި ޤައުމުތަކަށް މާލީ އެހީތެރިކަން ފޯރުކޮށްދޭ އައު އީޖާދީ ގޮތްތައް ހޯދުމެވެ. މިގޮތުން މޫސުމީ ބަދަލުތަކާ ބެހޭގޮތުން ދުނިޔެއިން ކަނޑައަޅާފައިވާ ލަނޑުދަނޑިތައް ކުދި ޤައުމުތަކުން ޙާސިލްކުރާ މިންވަރަކުން، އެ ބަދަލުތަކަށް ވިލުންތެރިވުމަށް، ބައިނަލްއަޤުވާމީ މާލީ އިދާރާތަކުންދޭ ދަރަނި މަޢާފުކޮށްދިނުން މުހިންމުކަމަށް ރައީސް ވިދާޅުވިއެވެ.

 ރައީސުލްޖުމްހޫރިއްޔާ ވިދާޅުވިއެވެ.

ރައީސް ހުށައެޅުއްވި ތިންވަނަ ކަމަކީ ކޮޕް29 ނިމިގެންދާއިރު މުހިންމު ދެ ކަމެއް ނިންމުމެވެ. އޭގެ ތެރެއިން އެއްކަމަކީ ކުދި ޤައުމުތަކުގެ ބޭނުންތަކަށް އެކށީގެންވާ މާލީ އެހީދިނުމުގެ ލަނޑުދަނޑިތަކެއް ކަނޑައެޅުމެވެ. ދެވަނަ ކަމަކީ ހަރުދަނާ ބައިނަލްއަޤުވާމީ ކާބަން މެކޭނިޒަމް މާކެޓެއް ޤާއިމްކުރުމެވެ.

ރައީސް ވިދާޅުވީ ކާބަން މެކޭނިޒަމް މާކެޓުތައް ވާންޖެހޭނީ އައު ޓެކްނޮލޮޖީތައް ބަދަލުކުރެވޭނެ ބާޒާރަކަށް ކަމަށެވެ.ރައީސްގެ ވާހަކަފުޅު ނިންމަވާލެއްވުމުން ކުދި ޖަޒީރާ ޤައުމުތަކުން ގުޅިގެން މަސައްކަތްކޮށް، މޫސުމީ ބަދަލުތަކަށް ވިލުންތެރިވުމަށް ބޭނުންވާ މާލީ އެހީތެރިކަން ހޯދުމުގައި ހުރިހާ ކުދި ޖަޒީރާ ޤައުމުތަކުން ގުޅިގެން މަސައްކަތްކުރެއްވުމަށް ގޮވާލެއްވިއެވެ.