ENGLISH

04 އޭޕްރީލު 2025

Advertisement

ޖޫން މަހު ކުޅޭ ބައިނަލްއަގުވާމީ މެޗުތައް އަލުން ތާވަލުކުރުމަށް ޓުޗެލް ގޮވާލައިފި

27 މާރިޗު 2025

|

މުޙައްމަދު އަދުހަމް

އިންގްލެންޑްގެ ކޯޗު، ޓުޗެލް. --ފޮޓޯ: ރޮއިޓާސް

އަންނަ ޖޫން މަހު ކުރިއަށް ހުރި ބައިނަލްއަގުވާމީ މެޗުތައް އަލުން ތާވަލްކޮށްދިނުމަށް ދުނިޔޭގެ ފުޓްބޯޅައިގެ މައި އިދާރާ، ފީފާގެ ކިބައިން އިންގްލެންޑްގެ ކޯޗު، ތޯމަސް ޓުޗެލް އެދިއްޖެއެވެ.

ޓުޗެލް މިހެން ބުނީ، އިނގިރޭސި މީޑިއާ އަށް ދިން އިންޓަވިއުއެއްގައެވެ.

ޓުޗެލްގެ ބުނީ، މިހާރު ފީފާ އިން އެކުލަވާލާފައިވާ ބައިނަލްއަގުމާވީ މެޗުތަކުގެ ކަލަންޑަރުގައިވާ ގޮތުން ފުޓްބޯޅަ ސީޒަން ނިމުމަށްފަހު ކުޅުންތެރިންނަށް އެކަށީގެންވާ މިންވަރަށް އަރާމުކުރާނެ ވަގުތު ނުލިބޭ ކަމަށެވެ.

"ޖޫން މަހުގެ މެޗުތަކުގެ ދުވަސްވަރަކީ އެއްވެސް ބަޔަކަށް، ހާއްސަކޮށް ކުޅުންތެރިންނަށް އެންމެ ރަނގަޅު ދުވަސްވަރެއް ނޫން،" ޓުޗެލް ބުންޏެވެ.

އެ ދުވަސްވަރަށް ތާވަލްކުރެވިފައިވާ މެޗުތައް ކޮންމެވެސް އެހެން ދުވަސްވަރަކަށް ބަދަލުކޮށް، ކުޅުންތެރިންނަށް އެންމެ ފައިދާވާނެ ގޮތަށް އެކަން ކުރެވޭނީ ފީފާ އަށް ކަމަށް ވެސް ޓުޗެލްގެ ވާހަކައިގައި ފާހަގަކުރިއެވެ.

ޓުޗެލް ބުނީ، ކޮންމެ ސީޒަނެއްގައި ކުޅުންތެރިން ކުޅޭ މެޗުތަކުގެ އަދަދާމެދު ކަންބޮޑުނުވާ ކަމަށާއި، އޭނާގެ އޮތް ހަމައެކަނި ކަންބޮޑުވުމަކީ އެ ކުޅުންތެރިންނަށް ތިނެއް ނުވަތަ ހަތަރު ވަރަކަށް ހަފްތާގެ ހަގީގީ ބްރޭކެއް ނުލިބޭތީވެ ކަމަށެވެ.

އިންގްލެންޑްގެ ކެޕްޓަން، ހެރީ ކޭން ބުނީ، ކުޅުންތެރިންގެ ވެލްފެއާ އާ ގުޅޭގޮތުން އެ ޓީމުގެ ކޯޗު، ޓުޗެލް ދެއްކި ވާހަކަތައް ގަބޫލުކުރާ ކަމަށާއި އެންމެން ގުޅިގެން، ހާއްސަކޮށް ކުލަބުތަކާ ކޯޗުންގެ އެހީތެރިކަމާއެކު އެކަންކަން ރަނގަޅުކުރެވޭނެ ކަމަށް ފެންނަ ކަމަށެވެ.

ކޭން ވަނީ، މިފަދަ ކަންކަމުގައި އެއްވެސް ވަރަކަށް ކުޅުންތެރިންގެ ބަސް އަޑުނާހާ ކަމަށް ފާހަގަކޮށްފައެވެ.

އޭނާ ފުޓްބޯޅަ ކުޅުމަށް ލޯބިކުރާ ކަމަށާއި، އެހެންކަމުން ދުވަހަކުވެސް ފުޓްބޯޅަ ކުޅުމާމެދު ޝަކުވާ ނުކުރާނެ ކަމަށް ވެސް ކޭން ބުންޏެވެ.

އެކަމަކު، ހުރިހާ ކޯޗުންނާއި ކުލަބުތަކުން އެއްކޮށް ގުޅިގެން މަސައްކަތްކޮށްގެން ކުޅުންތެރިންނަށް އެކަށީގެންވާ މިންވަރަކަށް އަރާމުކުރަން ފުރުޞަތު ލިބޭނެހެން މެޗުތައް ރޭވިގެން ކުރިއަށްގެންދެވޭނެ ކަމަށް ވެސް ކޭން ބުނެފައިވެއެވެ.

ކިޔުންތެރިންގެ ހިޔާލު