އިސްލާމިކް ޑިވެލޮޕްމަންޓް ބޭންކުން ފަންޑުކުރާ "މޯލްޑިވްސް ފިޝް ސެކްޓަރ ކެޕޭސިޓީ ސްޓްރެންތެނިންގ" ޕްރޮޖެކްޓްގެ ދަށުން ކަނޑުއޮތްގިރީގައި ހެދުމަށް ނިންމި މަސް ޕްރޮސެސް ކުރާ ޔުނިޓު ހުޅުމާލެއަށް ބަދަލުކުރަން ނިންމައިފި ކަމަށް ސަރުކާރުގެ މަސް ކުންފުނި މިފްކޯ އިން ބުނެފިއެވެ.

މިފްކޯއިން ރޭގައި ނެރުނު ނޫސްބަޔާނެއްގައި ބުނީ ކެބިނެޓްގެ ނިންމެވުމާ ގުޅިގެން ކަނޑުއޮތްގިރީގައި ހެދުމަށް ނިންމި މަސް ޕްރޮސެސިން ޔުނިޓް ހުޅުމާލޭގައި އެޅުމަށް ނިންމައިފައިވާ ކަމަށެވެ. ކެބިނެޓުގެ ނިންމެވުމާ އެއްގޮތަށް، ފިޝަރީޒް މިނިސްޓްރީގެ ވެސް އެއްބާރުލުމާއެކު ހައުސިންގ ޑިވެލޮޕްމެންޓް ކޯޕަރޭޝަން(އެޗްޑީސީ) ވަނީ މިފްކޯއަށް މި ފެސިލިޓީ ޤާއިމްކުރަން ބިމެއް ހަމަޖައްފައިދީފައި ކަމަށް މި ނޫސް ބަޔާނުގައި ވެއެވެ.

މިފްކޯއިން ނެރުނު ނޫސް ބަޔާން. ފޮޓޯ: މިފްކޯ

މިހާރު އައިއެސްޑީބީ އާއި ފިނޭންސް މިނިސްޓްރީއާ ދެމެދު ފަހުމުނާމާއެއްގައި ސޮއިކުރެވިފައިވާ ކަމަށް ވެސް މިފްކޯއިން މައުލޫމާތު ދެއެވެ. އަދި މި ޕްރޮޖެކްޓް ތެރޭގައި ހިމެނޭ އެންމެހާ ކޮމްޕޮނެންޓުތަކުގެ އިދާރީ މަސައްކަތްތައް ފެށިގެން ކުރިއަށްދާ ކަމަށް ވެސް މިފްކޯއިން ބުނެއެވެ.

މި މަޝްރޫޢުއަކީ އިސްލާމިކް ޑިވެލޮޕްމެންޓް ބޭންކުން ދޫކުރާ 65 މިލިއަން ޑޮލަރުގެ ލޯނުގެ ދަށުން ކުރިއަށްގެންދިޔުމަށް ހަމަޖެހިފައިވާ ޕްރޮޖެކްޓެކެވެ. މި ޔުނިޓްގައި 35 ޓަނުގެ މަސް ޕްރޮސެސް ކުރެވޭނެއެވެ.