ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ދަރަނީގެ މައްސަލައަށް ހައްލެއް ހޯދައިދިނުމަށް ސްޕޯޓްސް މިނިސްޓްރީން ގިނަ މަސައްކަތްތަކެއް ފަށައިފައިވާކަމަށް މިނިސްޓަރ ޢަބްދުﷲ ރާފިޢު ވިދާޅުވެއްޖެއެވެ.

އެފްއޭއެމުން ސަރުކާރު ކުންފުނިތަކަށް ދައްކަން ޖެހޭ ދަރަނީގެ ކަންކަމަށް ހައްލެއް ހޯދުމަށް މިހާރު އެ ކުންފުނިތަކާއެކު މަޝްވަރާތަކެއް ކުރައްވަމުން ދާ ކަމަށާއި އަދި މި މަޝްވަރާތަކަށް ފަހު އެފްއޭއެމުން ސަރުކާރުގެ ކުންފުނިތަކަށް ދައްކަންޖެހޭ ދަރަންޏަށް ފަހި ގޮތެއް ހަމަޖެހިގެންދާނެ ކަމަށްވެސް މިނިސްޓަރ ވިދާޅުވިއެެވެ.

މިނިސްޓަރ ރާފިޢު މިހެން ވިދާޅުވީ ރޭގައި ކުރިއަށްދިޔަ އެފްއޭއެމްގެ އެކްސްޓްރާ އޯޑިނަރީ ކޮންގްރެސްގައި ވާހަކަ ދައްކަވަމުންނެވެ.

އެފްއޭއެމް އެކްސްޓްރާ އޯޑިނަރީ ކޮންގްރެސްގެ ތެރެއިން-- ސްޕޯޓްސް މިނިސްޓްރީ

މިނިސްޓަރުގެ ވާހަކައިގައި ވަނީ މިހާރުވެސް އެފްއޭއެމަށް މިނިސްޓްރީގެ ފަރާތުން ފޯރުކޮށްދޭ އެހީތެރިކަން ފާހަގަ ކުރައްވާފައެވެ. އެގޮތުން އެފްއޭއެމްގެ މަސައްކަތްތައް ކުރިއަށް ގެންދިއުމަށް ގަލޮޅު ދަނޑުގައި އޮފީސް ހަދައިދިނުމާއި، މުބާރާތްތައް ބާއްވައިދިނުމަށް އެހީތެރިވުމުގެ ގޮތުން ވުޒާރާގެ މުވައްޒަފުން ބޭނުން ކުރެވޭނެ ގޮތްވެސް ހަމަޖައްސާދީފައިވާނެ ކަމަށް މިނިސްޓަރ ވިދާޅުވިއެވެ. އަދި ކުރިޔަށް އޮތްތަނުގަވެސް އެފްއޭއެމްގެ ހިންގުން ހަރުދަނާ ކުރުމަށް މިނިސްޓްރީގެ ފަރާތުން އެހީތެރިކަން ފޯރުކޮށްދޭނެކަމުގެ ޔަގީންކަން މިނިސްޓަރ ވަނީ ދެއްވާފައެވެ.

މިސަރުކާރު ހަވާލުވިއިރު އެފްއޭއެމްގެ ހާލަތުވަނީ ރާއްޖޭގެ ފުޓުބޯޅައިގެ ތާރީހުގައިވެސް ނުދާހާ ދަށަށްގޮސްފައެވެ. އެފްއޭއެމްގެ ދަރަނި 150 މިލިއަން ރުފިޔާ އަށް ވުރެ މައްޗަށް އަރާއިރު، ސަރުކާރު ކުންފުނިތަކުގެ ތެރެއިން އެފްއޭއެމުން ފައިސާ ދައްކަން ޖެހިފައިވާ ކުންފުނިތަކަކީ، މޯލްޑިވިއަން، އެސްޓީއޯ އަދި އެޗްޑީސީ އެވެ.