ENGLISH
26 ނޮވެމްބަރު 2024
ޖުމްހޫރީ ދުވަހަކީ ރައްޔިތުންގެ ދުވަހެއް: ރައީސް
10 ނޮވެމްބަރު 2024
|
ޖުމްހޫރީ ދުވަހުގެ ޖަލްސާގައި ރައީސުލްޖުމްހޫރިއްޔާ މިރޭ ވާހަކަފުޅު ދައްކަވަނީ
އެންމެ މަޤްބޫލު
ޖުމްހޫރީ ދުވަހަކީ ރައްޔިތުންގެ ދުވަހެއް ދުވަހެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
ޖުމްހޫރީ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަ ދައްކަވަމުން އެމަނިކުފާނު ވިދާޅުވީ ވެރިކަމަކީ ރައްޔިތުންގެ ފަރާތުން ކަންކަންކުރުމަށްޓަކައި ރައްޔިތުން ހަވާލުކުރާ ވަރަށް ބޮޑު އަމާނާތެއް ކަމަށެވެ. އެހެންކަމުން ވެރިކަމާއި ހަވާލުވެވަޑައިގަތުމަށްފަހު މިދިޔަ އަހަރެއްހާ ދުވަހު މަސައްކަތްކުރެއްވީ ރައްޔިތުންގެ ފަޅީގައި ހުންނަވައިގެން ހެޔޮވެރިކަމެއް ކުރެއްވުމަށް ކަމަށް ރައީސް ވިދާޅުވިއެވެ.
"ވެރިކަމަކީ އެއްވެސް ޙާލެއްގައި ލިބޭ މާބޮޑު މޮޅެއް ނޫން. އަދި އެއީ ލިބޭ މުދާ ގަނޑެއްވެސް ނޫން. އެއީ ވަރުގަދަ ޒިންމާއެއް. މަސްއޫލިއްޔަތެއް އަދި އަމާނާތެއް،"
ރައީސް ޑރ.މުޢިއްޒު ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ވެރިކަމާއި ވެރިންގެ މަސްއޫލިއްޔަތާ ގުޅޭގޮތުން އެމަނިކުފާނުގެ ބައްޕާފުޅު އަލްމަރުހޫމް އުސްތާޒުއްއްޝައިހް ހުސައިން އަބްދުއްރައްމާނު ދައުލަތާއި ވެރިންނާއި މަސްއޫލިއްޔަތުގެ މަފުހޫމްތައް ބަޔާންކުރައްވައި ލިއްވާފައިވާ ފޮތުގެ އެކި ސަފްހާތަކުން މިސާލު ނަންގަވަމުން ވިދާޅުވީ އެމަނިކުފާނު ވެރިކަން ކުރެއްވުމުގައި ފުރަތަމަ ދުވަހުން ފެށިގެންވެސް އެފޮތުގައިވާ ގޮތަށް ވެރިކަން ކުރެއްވުމަށް މަސައްކަތްކުރައްވަމުން ގެންދަވާ ކަމަށެވެ.
އެފޮތަކީ އިސްލާމީ ނަޒަރަކުން ވެރިކަމުގެ ޒިންމާތަކާއި ބާރުތަކާއި ވާޖިބުތައް، ވަށާޖެހޭ ގޮތަށް، ދިވެހި މާހައުލަށް ފެތޭ ގޮތަށް ލިއުއްވާފައިވާ ފޮތެކެވެ.
ރައީސުލްޖުމްހޫރިއްޔާ ވިދާޅުވީ ވެރިކަމާއި ހަވާލުވެ ވަޑައިގަތުމަށް ފަހު މިވީ އެއް އަހަރެއްހާ ދުވަހުގެ ތެރޭގައި މަސައްކަތް ކުރެއްވީ ރައްޔިތުންގެ ފަޅީގައި ހުރެގެން، ރައްޔިތުންގެ ފަރާތުން ހެޔޮވެރިކަމެއް ކުރެއްވުމަށް ކަމަށެވެ. އެގޮތުން މީގެ ކުރީ ސަރުކާރުތަކުން އަޅާނުލާ ހުރި ބޮޑެތި މައްސަލަތައް ހައްލުކުރުމަށް މަސައްކަތްކުރައްވަނީ ވެސް ރައްޔިތުންނަށްޓަކައިކަންވެސް އެމަނިކުފާނު ފާހަގަކުރެއްވިއެވެ.
"އެހެންވީމަ ޑްރަގްގެ މައްސަލަ ހައްލުކުރަން ތެދުވީ. އެހެންވީމަ މިތަނުގަ ގޭންގް މާރާމާތަކުގެ މައްސަލަ ހައްލުކުރުމަށް އަޅުގަނޑުމެން ތެދުވީ. އެހެންވީމަ ވޭޕް މަނާކުރުމަށް އަޅުގަނޑުމެން ނިންމީ. އެހެންވީމަ މިތަނުގަ އޮތް ބޭހުގެ މާފިއާ ނައްތާލަން ތެދުވީ. އެހެންވީމަ ވަކި ބައެއްގެ އަތުގައި އޮތް ޑޮލަރުގެ ކަޅުބާޒާރު ނިމުމަކަށް ގެނެސް ރައްޔިތުންނަށް ޑޮލަރުގެ މުއްސަނދިކަން ގެނެސްދިނުމަށް ނިންމީ. ނުގަވާއިދުން އުޅޭ ބޭރު މީހުންގެ މައްސަލަ ހައްލުކުރަން ވެސް ތެދުވީ އެހެންވެގެން،"
ރައީސުލްޖުމްހޫރިއްޔާ ވިދާޅުވިއެވެ.
"މިމަސައްކަތުގައި ރައްޔިތުންގެ އެއްބާރުލުން ލިބޭނެކަމަށް އުއްމީދުކުރަން. ރައްޔިތުންގެ އެއްބާރުލުން ލިބިއްޖެނަމަ އެކަންކަން ހައްލުވެގެންދާނެ "
ރައީސުލްޖުމްހޫރިއްޔާ ވިދާޅުވީ ވެރިކަމާއި ހަވާލުވެވަޑައިގަންނަވަމުން ވެވަޑައިގެންނެވި ވައުދުތައް ފުއްދެވުމަށް މަސައްކަތްކުރައްވަމުން ގެންދަވާކަމަށެވެ.
އެގޮތުން ސިޔާސީގޮތުން މީހުންނަށް އަދަބު ދީ ބަދަލު ނުހިފާނެ ކަމަށާއި ޖުޑީޝަރީއަށް ނުފޫޒު ނުފޯރުވާނޭ ކަމަށް ވިދާޅުވެ، ވެވަޑައިގެންނެވި ވައުދުގެ މަތީގައި ހުންނެވިކަން ރައީސުލްޖުމްހޫރިއްޔާ ވިދާޅުވިއެވެ.
އަދި ދިފާޢީގޮތުންނާއި ޚާރިޖީގޮތުން ޤައުމު ވަރުގަދަކުރެއްވުމަށް ވެވަޑައިގެންނެވި ވައުދު ފުއްދެވުމަށް ކުރައްވާ މަސައްކަތްތަކުގެ މައްޗަށްވެސް ރައީސުލްޖުމްހޫރިއްޔާގެ ވާހަކަފުޅުގައި އަލިއަޅުއްވާލެއްވިއެވެ.
ރައީސުލްޖުމްހޫރިއްޔާ ވިދާޅުވީ ދިވެހި ޤައުމަށް ވަފާތެރިވުމަށްވުރެ ބޮޑު އުފަލެއް އެމަނިކުފާނަށް ނެތްކަމަށެވެ. އަދި ވެރިކަމާއި ހަވާލުވެވަޑައިގަތުމަށްފަހު މިވޭތުވެދިޔަ 52 ހަފްތާތެރޭގައި އެކަން ފަޚުރުވެރިކަމާއެކު ސާބިތުކޮށްދެއްވާފައި ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރާއްޖޭގެ ޖުމްހޫރީ ދުވަހުގެ ގޮތުގައި ފާހަގަކުރަނީ ނޮވެމްބަރު މަހުގެ 11 ވަނަ ދުވަހެވެ.
