ވޯލްޑް ބޮޑީބިލްޑިން ޗެމްޕިއަންޝިޕް ރާއްޖޭގައި ކުރިއަށް ގެންދަން ރައީސް ޑޮކްޓަރ މުހައްމަދު މުއިއްޒުގެ ތަސައްވުރާއި ސްޕޯޓްސް މިނިސްޓްރީން އިރުޝާދު ދެއްވާފައިވާ ގޮތަށް މުބާރާތް ކުރިއަށް ގެންދެވޭތޯ މަސައްކަތްކުރި ނަމަވެސް އެގޮތަށް އެކަން ކުރެވިފައި ނުވާތީ ރާއްޖޭގެ ބޮޑީބިލްޑިން އެސޯސިއޭޝަން މިއަދު މައާފަށް އެދިއްޖެ އެވެ.

އައްޑޫ ކެނެރީފް ރިސޯޓުގައި މިހާރު ކުރިއަށްދާ 15 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕާ ގުޅޭގޮތުން ފެތުރެމުންދާ ހަބަރުތަކާ ގުޅިގެން އާއްމުންގެ ކަންބޮޑުވުން ހުރުމާ އެކު، ރައީސް އާއި ރައްޔިތުންގެ ކިބައިން މާފަށް އެދޭ ކަމަށް އެސޯސިއޭޝަނުން ނެރުނު ނޫސްބަޔާނުގައި ބުނެފައިވެ އެވެ.

"މިފަދަ ބައިނަލްއަގްވާމީ މުބާރާތެއް ރާއްޖޭގައި ބާއްވަން މަސައްކަތް ކުރީ، ރާއްޖޭގެ ނަން ބައިނަލްއަގްވާމީ ކުޅިވަރުގެ ދުނިޔޭގައި މަތިކޮށް، ރާއްޖޭގެ ޕްރޮފައިލް ވަރުގަދަކޮށް އަދި އެކަމުގެ ސަބަބުން ރާއްޖޭގެ އިގްތިސާދަށާއި ޓޫރިޒަމަށް ލިބޭނެ ކުރިއެރުމަށް ވިސްނައިގެން،" އެސޯސިއޭޝަނުގެ ބަޔާނުގައި ބުނެފައިވެ އެވެ.

އެ އެސޯސިއޭޝަނުން އިތުރަށް ބުނީ މި އަހަރުގެ މުބާރާތަކީ ވަރަށް ދުރާލައި މަސައްކަތްކޮށްގެން އަދި އެހެން ގައުމުތަކާ ވެސް ވާދަކޮށް ރާއްޖޭގައި ހޯސްޓް ކުރަން ލިބުނު ފުރުސަތެއް ކަމަށެވެ. ބައިނަލްއަގުވާމީ މި މުބާރާތް ރާއްޖޭގައި ބޭއްވުމަށް ކޮންޓްރެކްޓް ހެދުމަށް ފަހު ރާއްޖޭން މި މުބާރާތް ބޭއްވުން ކެންސަލްކޮށްފި ނަމަ، ރާއްޖޭގެ ކުޅިވަރު އެސޯސިއޭޝަންތަކަށާއި ޖުމްލަ ގޮތެއްގައި ރާއްޖެ އަށް މާލީ ގޮތުންނާއި އެހެނިހެން ގޮތްގޮތުން ލިބިދާނެ ގެއްލުންތަކަށް ވިސްނުމަށް ފަހު މުބާރާތް ކުރިއަށް ގެންދަން އެސޯސިއޭޝަނުން ނިންމީ ކަމަށް ވެސް ބުނެފައިވެ އެވެ. 

މުބާރާތް ކުރިއަށް ގެންދަނީ އާއްމުން ދިރިނޫޅޭ، ޓޫރިސްޓުން އައިސް އެ މީހުންގެ ވައްޓަފާޅިއާ އެއްގޮތަށް އުޅެވޭ ގޮތަށް ޓޫރިސްޓް ރިސޯޓެއްގެ ގޮތުގައި ހިންގާ އައްޑޫ ކެނެރީފް ރިސޯޓުގައިކަން ވެސް އެސޯސިއޭޝަނުން ފާހަގަކޮށްފައިވެ އެވެ. 

މުސްތަގްބަލްގައި މިފަދަ ކަމެއް ތަކުރާރު ނުވާނެކަަމުގެ ފުރިހަމަ ޔަގީންކަން ދިވެހި ރައްޔިތުންނަށް އަރުވާ ކަމަށް ވެސް ބޮޑީބިލްޑިން އެސޯސިއޭޝަނުން ބުނެފައިވެ އެވެ.

ދުނިޔޭގެ އެކި ގައުމުތަކުން ބޮޑީބިލްޑަރުން ބައިވެރިވި މި މުބާރާތުގެ މައްސަލަ ބޮޑަށް ހޫނުވީ ސްޓޭޖް މަތީގެ ބައެއް ހަރަކާތްތަކަށް ފަހު އެވެ. އަދި މިސް ޔުނިވާސް ރީތީގެ މުބާރާތުގައި ދިވެއްސަކު ބައިވެރިވުމުން ސަރުކާރުން އެކަން ކުށްވެރިކޮށްފައިވަނިކޮށް، ހަށިގަނޑުގެ ބޮޑު ބައެއް ހާމަކޮށް ބާއްވާ މުބާރާތެއް ރާއްޖޭގައި ބާއްވާތީ އެވެ.